Gawaaniin wa churuut iid al-Fisha
1 Wa fi l-chahar al-awwal hana l-sana al-taaniye baʼad Bani Israaʼiil marago min balad Masir, Allah hajja le Muusa fi saharat Siinaaʼ wa gaal : 2 «Guul le Bani Israaʼiil yiʼayyudu iid al-Fisha fi l-wakit al-muhaddad leyah. 3 Wa fi yoom 14 hana l-chahar da, fi l-makhrib, intu tiʼayyudu al-iid da fi l-wakit al-muhaddad leyah hasab kulla gawaaniinah wa churuutah.»
4 Wa Muusa gaal le Bani Israaʼiil yiʼayyudu iid al-Fisha. 5 Wa fi saharat Siinaaʼ, Bani Israaʼiil ayyado al-iid da fi yoom 14 hana l-chahar al-awwal fi l-makhrib. Wa humman sawwo kulla cheyy misil Allah amar beyah Muusa.
6 Wa laakin fi l-yoom da, fi naas waahidiin limso janaaza wa najjaso nufuushum. Wa fi chaan da, humman ma yagdaro yiʼayyudu al-iid fi l-yoom da. Wa khalaas al-naas dool jo giddaam Muusa wa Haaruun fi nafs al-yoom 7 wa gaalo : «Sahiih aniina ma taahiriin be sabab limisna janaaza. Laakin maala ma nagdaro nigaddumu hadiiye le Allah fi l-wakit al-muhaddad misil Bani Israaʼiil al-aakhariin ?» 8 Wa Muusa gaal leehum : «Arjooni lahaddi Allah yantiini amur fi chaanku.»
9 Wa Allah hajja le Muusa wa gaal : 10 «Guul le Bani Israaʼiil, humman wa kulla zurriiyaathum kan naas minhum ma taahiriin be sabab limso janaaza aw musaafiriin baʼiid kula, khalli yiʼayyudu iid al-Fisha le Allah. 11 Wa laakin humman dool waajib yiʼayyudu al-iid da be taʼkhiir yaʼni fi yoom 14 hana l-chahar al-taani fi l-makhrib. Wa yaakulu al-hamal wa l-khubza bala tawwaara wa l-khadaar al-murr. 12 Wa ma yifaddulu cheyy min al-akil da yagood lahaddi fajur. Wa ma yaksuru adum min laham al-hamal. Wa yiʼayyudu iid al-Fisha hasab gaanuunah sawa sawa.
13 «Wa laakin kan naadum taahir wa ma musaafir wa aba ma yiʼayyid iid al-Fisha, al-naadum da waajib yafsuluuh min ahalah be sabab hu ma gaddam hadiiye le Allah fi l-yoom al-muhaddad. Wa l-naadum da waajib yilhammal masʼuuliiyit al-zanib al-hu sawwaah.
14 «Wa kan naadum ajnabi gaaʼid maʼaaku kula, khalli yiʼayyid iid al-Fisha le Allah hasab kulla l-gawaaniin wa l-churuut hana iid al-Fisha. Leeku intu al-muwaatiniin wa le l-ajnabi al-maʼaaku kula, al-gaanuun waahid bas.»
Al-sahaabaay wa l-kheema
15 Wa wakit bano kheemat al-ibaada, al-sahaabaay nazalat wa khattat al-kheema wa di l-kheema al-foogha al-sanduug al-indah liihaan al-muʼaahada. Wa be l-leel, al-sahaabaay tidawwi misil al-naar fi raas al-kheema lahaddi fajur. 16 Wa l-sahaabaay gaaʼide daayman mukhattiye al-kheema wa be l-leel tidawwi misil al-naar. 17 Wa wakit al-sahaabaay tugumm min al-kheema, Bani Israaʼiil yisiiru. Wa wakit tanzil fi ayyi bakaan, Bani Israaʼiil yanzulu fi l-bakaan da. 18 Bani Israaʼiil yisiiru be amur Allah wa yanzulu be amur Allah. Wa wakit al-sahaabaay gaaʼide mukhattiye al-kheema, humman yagoodu fi bakaanhum. 19 Wa kan al-sahaabaay tagood titawwil mukhattiye kheemat al-ibaada kula, Bani Israaʼiil yitiiʼu Allah wa ma yisiiru. 20 Hatta kan al-sahaabaay tagood fi kheemat al-ibaada le muddit ayyaam chiyya kula, Bani Israaʼiil yagoodu be amur Allah wa yisiiru be amur Allah. 21 Wa kan al-sahaabaay tagood min achiiye lahaddi fajur wa tugumm tamchi kula, humman yisiiru. Wa kan tagood yoom wa leele wa tugumm tamchi kula, humman yisiiru. 22 Wa kan al-sahaabaay tagood tiʼakhkhir mukhattiye al-kheema misil yoomeen aw chahar aw ziyaada kula, Bani Israaʼiil yagoodu ma yisiiru abadan. Wa laakin wakit al-sahaabaay tugumm tamchi, khalaas Bani Israaʼiil kula yisiiru. 23 Bani Israaʼiil yanzulu be amur Allah wa yisiiru be amur Allah. Wa humman yitiiʼu amur Allah al-hu antaah be waasitat Muusa.
© Arabe tchadien (alphabet latin) Bible © Alliance Biblique du Tchad, 2019.
