1 Al-muʼaddab yichiil wasiiyat abuuh wa ammah
wa laakin al-haggaar ma yasmaʼ al-luwaama.
2 Al-lisaan al-halu yijiib al-kheer
laakin al-khaddaariin niiyithum illa l-unuf.
3 Al-hafad lisaanah hafad nafsah,
al-talag lisaanah halak nafsah.
4 Al-kaslaan yitmanna wa ma yalga
wa laakin al-nachiit yanjah wa yachbaʼ.
5 Al-saalih yakrah al-kidib,
al-aasi yisawwi illa l-afaana wa l-eeb.
6 Al-adaala tahmi al-maachi fi l-derib al-adiil
wa laakin al-zanib yidammir al-aasi.
7 Da yuguul hu khani
wa laakin ma indah cheyy.
Wa da yuguul hu fagri
wa indah kulla cheyy.
8 Al-khani be maalah yafda nafsah
wa laakin al-fagri, ma fi naadum yakurbah.
9 Nuur al-saalihiin yifarrih
wa deyy al-aasiyiin yumuut.
10 Fi bakaan al-istikbaar,
fiyah huraaj
wa fi bakaan al-yasmaʼo al-wasiiye,
fiyah hikma.
11 Al-maal al-talgaah min al-haraam misil al-riih
wa laakin al-talgaah min wakharak yiziid.
12 Al-acham kan yitawwil, yimarrid al-galib
wa l-muna kan alhaggag, misil chadarat al-haya.
13 Al-aba al-hidaaya yalga khasaara
wa l-yitabbig al-wasiiye yalga mukaafa.
14 Taʼliim al-hakiim yijiib al-haya misil een almi.
Hu yibaʼʼid min charak al-moot.
15 Al-agul al-adiil yijiib al-rida
wa tariig al-khaddaariin yuruuh fi l-hawa.
16 Ayyi naadum aagil yakhdim be maʼrafa
wa laakin al-matmuus yiwassif nifaakhah.
17 Al-mursaal al-hawaan yagaʼ fi l-charr
wa l-amiin yijiib al-salaam.
18 Al-fagur wa l-ihaana le l-yaaba al-adab
wa laakin al-yakhbal al-luwaama, yicharrufuuh.
19 Yabga halu le l-insaan
kan munaayah alhaggag.
Wa l-matmuus yichiif haraam leyah
yatruk fasaaltah.
20 Al-yuruukh maʼa l-hakiimiin yabga hakiim
wa l-yiraafig al-mataamiis yalga al-fasaala.
21 Al-bala yatbaʼ al-muznibiin
wa l-kheer yaji le l-saalihiin.
22 Al-raajil al-zeen yikhalli warasatah
le iyaal iyaalah
wa laakin al-muznib,
maalah yudummuuh le l-saalihiin.
23 Ziraaʼat al-masaakiin tijiib intaaj katiir
wa laakin intaajha da, al-zulum yiwaddirah.
24 Al-yiriid sakhiirah yiʼaddibah
wa laakin al-ma yadrub sakhiirah yakrahah.
25 Al-saalih yaakul wa yachbiʼ nafsah
wa laakin al-aasi batnah ma tinmali abadan.
© Arabe tchadien (alphabet latin) Bible © Alliance Biblique du Tchad, 2019.
