1 Al-mara al-indaha hikma tabni beetha
wa l-munaafikhe be nafisha takhrib beetha.
2 Al-maachi fi l-derib al-adiil,
khaayif min Allah.
Wa l-chaayil al-derib al-aʼwaj,
aasi Allah.
3 Kalaam al-munaafikh al-fachchaar yijiib leyah al-dagg
wa laakin lisaan al-saalih yahfadah.
4 Kan ma fi tiiraan hana l-hiraate,
al-dabanga yaabse
wa laakin be gudrat al-tiiraan,
yaktar al-maʼaach.
5 Al-chaahid al-amiin ma yakdib
wa laakin chaahid al-zuur,
kalaamah kula kidib.
6 Al-chammaati yifattich al-hikma wa ma yalgaaha
wa laakin al-maʼrafa le l-faahim, lagaaha hayyin.
7 Amchi baʼiid min al-matmuus
achaan ma talga ilim min kalaamah.
8 Hikmat al-aagil hi fihim tariig hayaatah
wa laakin tamaasit al-matmuus tukhuchchah.
9 Hadiiyat al-khufraan hana l-munaafikh tichchammat foogah
wa laakin al-adiiliin yalgo rida Allah.
10 Al-galib hu yaʼarif wijeeʼtah
wa farhitah kula ma yigassimha maʼa l-aakhariin.
11 Beet al-aasiyiin yiddammar
wa kheemit al-adiiliin taʼamir.
12 Fiyah derib yinchaaf fi uyuunak adiil
wa laakin fi aakhirah, talga al-moot.
13 Marraat al-dihik yilabbid taʼab al-galib
wa mumkin aakhir al-farah yukuun hizin.
14 Siid al-galib al-hawaan
yalga natiijat khidimtah
wa l-yamchi adiil
yalga mukaafa ziyaada.
15 Al-jaahil yisaddig
be kulla l-kalaam al-yuguuluuh leyah
wa l-aagil yifakkir
hatta fi l-bakaan al-yukhutt foogah rijlah.
16 Al-hakiim yakhaaf
wa yibaari al-khutuura,
al-matmuus maachi
wa indah damaan fi nafsah.
17 Al-zaʼʼaal, hu matmuus
wa l-yanwi al-fasaala, makruuh.
18 Al-juhhaal yawrusu illa l-nifaakh
wa laakin al-ilim yabga taaj le l-aagil.
19 Al-fasliin yasjudu le l-zeeniin
wa l-aasiyiin yachhado fi biibaan al-saalihiin.
20 Al-fagri, yakrahooh naasah al-gariibiin
wa l-khani, al-yihibbuuh katiiriin !
21 Al-yahgir jiiraanah yiziid zunuubah
wa laakin mabruuk le l-yihinn fi l-masaakiin.
22 Al-yanwi al-fasaala yiwaddir nafsah
wa l-yanwi al-kheer yalga rahma wa amaan.
23 Al-yakhdim be wakharah yalga natiija
wa laakin kalaam saakit wiheedah yijiib al-fagur.
24 Al-khuna taaj le l-hakiim
wa l-munaafikh matmuus wa yagood be nifaakhah.
25 Al-yachhad be l-hagg, yinajji al-naas
wa l-yachhad be kidib, khachchaach.
26 Al-khoof min Allah yiʼayyichak fi amaan kaamil
wa awlaadak yalgo bakaan al-yaljaʼo leyah.
27 Al-khoof min Allah
misil een almi al-tanti al-haya
wa yinajjiik min al-charak
al-yijiib al-moot.
28 Katarat al-chaʼab charaf le l-malik
wa gillit al-chaʼab kharaab le l-haakim.
29 Al-ma yazʼal ajala
yiwassif fihimah le l-naas
laakin al-zaʼʼaal
yiwassif kadar hu ma indah raas.
30 Al-galib al-tayyib yanti haya le jismak
wa l-galib al-hasuud misil suusa fi udaamak.
31 Al-yazlum al-miskiin yahgir Khaaligah
wa laakin al-yihinn fi l-miskiin yimajjidah.
32 Al-aasi yagaʼ fi fasaaltah
wa laakin al-saalih hatta fi mootah yalga maljaʼ.
33 Fi galib al-faahim,
taskun al-hikma.
Wa laakin fi galib al-matmuus,
hi tinlagi walla ?
34 Al-adaala ticharrif al-umma
wa laakin al-zanib yiʼayyib al-chaʼab.
35 Al-khaddaam al-fahiim
yalga rida min al-malik
wa laakin al-yijiib al-eeb
yalga khadabah.
© Arabe tchadien (alphabet latin) Bible © Alliance Biblique du Tchad, 2019.
