1 Kan ma yaturduuh kula,
al-aasi yajri wa yinbalis.
Wa laakin al-saalih
fahal misil al-duud.
2 Al-isyaan kan kitir fi l-balad,
hukkaamha yabgo katiiriin
wa l-salaam ma yaji
illa be raajil faahim wa hakiim.
3 Al-raajil al-fagraan al-yazlum al-daʼiifiin
hu misil matara chadiide
al-tidammir kulla cheyy.
Baʼadha ma fi maʼaach.
4 Al-yaabo al-gaanuun,
yachkuru al-aasiyiin
wa l-yahfado al-gaanuun,
yugummu didduhum.
5 Al-fasliin ma yafhamo cheyy fi l-adaala
wa laakin al-yifattuchu Allah yafhamo kulla cheyy.
6 Akheer fagri maachi be sahiih
min khani aayich be kidib.
7 Al-wileed al-faahim yitaabiʼ taʼliim abuuh
wa laakin al-yiraafig al-mukhaalifiin yiʼayyibah.
8 Al-yakhna be l-riba al-katiir
maalah da, Allah yantiih
le l-yihinn fi l-masaakiin.
9 Al-yisidd adaanah min wasaaya Allah,
salaatah kula Allah yajʼalha haraama wa ma yakhbalha.
10 Al-yuguud al-naas al-adiiliin
fi l-derib al-fasil,
hu kula yagaʼ fi l-nugra al-nakatha.
Wa laakin al-naas al-tamaamiin
yawrusu al-kheer.
11 Al-khani kan yichiif nafsah hakiim kula,
al-fagri al-faahim yagdar yaʼarif al-fi galbah.
12 Be nasur al-saalihiin,
al-naas yafraho
wa be najaah al-aasiyiin,
al-naas yillabbado.
13 Al-yilabbid khataayah ma yanjah.
Wa laakin al-yutuub min khataayah wa yikhalliih,
Allah yarhamah.
14 Mabruuk le l-insaan
al-daayman yakhaaf min Allah
wa laakin al-yigawwi raasah
yagaʼ fi l-charr.
15 Al-haakim al-fasil le chaʼabah al-miskiin
hu misil duud al-yikirr
wa nimir al-yifirr.
16 Al-haakim al-ma indah fihim
yikattir zulmah
wa laakin al-yakrah al-maal al-haraam
yutuul umrah.
17 Kaatil al-dimme yajri le l-haawiye.
Khalluuh, ma tiwaggufuuh !
18 Al-yamchi adiil, yanja
wa l-aʼwaj yichiil duruub tineen wa yagaʼ ajala.
19 Al-yahrit ardah yachbaʼ be l-maʼaach
wa laakin al-yitaabiʼ al-hawa yachbaʼ be l-fagur.
20 Al-naadum al-amiin yalga baraka kabiire
wa laakin al-yissaʼjal le l-khuna, ma yajʼalooh bari.
21 Al-gaadi ma waajib yidangis al-chariiʼa
wa laakin be sabab lugma waahide bas, al-insaan yakhta.
22 Al-raajil al-tammaaʼ yajri wara l-khuna
wa ma yaʼarif kadar al-fagur yagaʼ foogah.
23 Al-yuluum akhuuh,
fi l-akhiir yalga ridaayah
wa da akheer min yukhuchchah be kalaam halu.
24 Al-yasrig abuuh wa ammah
wa yuguul : «Da ma khata»,
hu da naadum al-yijiib al-kharaab.
25 Al-tamaʼ yijiib al-huraaj
wa laakin al-yitwakkal ale Allah yalga al-kheer.
26 Al-yitwakkal ale nafsah,
hu da matmuus
wa laakin al-yamchi be hikma,
hu da yanja.
27 Al-yarham al-masaakiin,
cheyy ma yigassir leyah
wa laakin al-aba ma yichiif taʼab al-aakhariin,
yalga laʼana katiire.
28 Wakit al-aasiyiin yanjaho,
al-naas yillabbado.
Wakit al-aasiyiin yiddammaro,
al-saalihiin yaktaro.
© Arabe tchadien (alphabet latin) Bible © Alliance Biblique du Tchad, 2019.
