Al-damiin bikaffi
1 Ya wileedi, kan dimint rafiigak
aw anteet kalaam le naadum ma maʼruuf
2 wa kan wagaʼt fi charak be sabab khachmak
aw ankarabt be sabab lisaanak
3 khalaas, ya wileedi, sawwi misil da
achaan inta wagaʼt fi iideen siid al-deen.
Le tinajji nafsak,
amchi achhadah yikhalliik.
4 Amchi ajala !
Wa la targud wa la tunuum.
5 Anbalis minnah misil al-khazaal min al-charak
aw misil al-teer min iid al-gannaasi.
Al-kaslaan fi l-khidme
6 Ya l-kaslaan, fakkir fi l-nimle
wa chiif khidmitha wa abga hakiim.
7 Hi ma indaha khaayid
wa la muraakhib wa la siid.
8 Laakin tilimm maʼaachha fi wakt al-gatiʼ
wa takhzin akilha fi wakt al-darat.
9 Ya l-kaslaan, le mata tunuum
wa mata tugumm min noomak ?
10 Inta tuguul tunuum chiyya
wa tinjamm chiyya
wa titabbig iideenak
wa targud chiyya.
11 Wa be da, al-fagur yajiik
misil al-sarraag
wa l-taʼab yakurbak
misil rabbaat al-duruub.
Al-kaddaab wa natiijat amalah
12 Al-naadum al-fasil ma naafiʼ
wa khachmah yuguul daayman al-kidib.
13 Hu yisawwi ichaara be uyuunah wa rijileenah wa iideenah
wa da, le yukhuchch al-naas.
14 Galbah malaan be l-khachch
wa yikhattit al-charr
wa daayman yazraʼ
illa l-huraaj been al-naas.
15 Be l-sabab da,
damaarah yaji ajala.
Yinrahik marra waahid
wa battaan ma yalga ilaaj.
Al-achya al-Allah yakrahhum
16 Fiyah sitte achya Allah yakrahhum.
Wa doolhumman al-sabʼa
al-Allah harramhum.
17 Al-een al-gawiiye
wa l-lisaan al-yakdib be niiye
wa l-iid al-taktul bala hinniiye
18 wa l-galib al-yanwi al-khiyaana
wa l-rijil al-tajri le l-fasaala
19 wa l-naadum al-yachhad be l-kidib al-hawaan
wa l-yigawwim al-fitne ambeenaat al-akhwaan.
Angariʼ min al-zina
20 Ya wileedi, ahfad wasiiyat abuuk
wa ma taaba taʼliim ammak.
21 Ahfadhum adiil fi galbak
wa arbuthum gawi fi ragabatak.
22 Achaan wakit tamchi, humman yuguuduuk
wa wakit tunuum, yahfadook
wa wakit tugumm min noomak, yiwassuuk.
23 Al-wasiiye hi misil faanuus
wa l-taʼliim misil nuur
wa l-adab wa ikhaabah yiwadduuk
fi tariig al-haya.
24 Wa humman yahfadook
min al-mara al-fasle
wa min al-lisaan al-khachchaach hana l-ajnabiiye.
25 Ma titmanna fi galbak jamaalha
wa ma tikhalliiha tasharak be uyuunha.
26 Achaan al-charmuuta talgaaha rakhiise
misil al-khubza
wa laakin mart al-raajil
tiwaddir hayaatak al-khaaliye.
27 Tagdar tahdin naar fi sadrak
wa ma tiharrig khulgaanak walla ?
28 Aw tamchi fi jamur
wa ma yutuchch rijileenak walla ?
29 Nafs al-cheyy al-naadum
al-yamchi le marit jaarah.
Kan yalʼab maʼaaha,
ma yajʼalooh bari.
30 Al-naas ma yakraho al-sarraag
wakit yasrig le yachbiʼ nafsah.
31 Laakin wakit yakurbuuh,
yikaffi sabʼa marraat
wa da yikammil kulla khumaam beetah.
32 Wa laakin al-zaani ma indah fihim
wa be l-zina yidammir nafsah.
33 Yalga al-dagg wa l-hugra
wa eebah ma yiwaddir abadan.
34 Achaan al-nindili yilizz al-raajil
fi l-zaʼal al-haarr
wa ma yarham al-zaani
wakit yilkaffa foogah al-taar.
35 Ma yakhbal gurus al-zaani
al-yikaffiih leyah
wa kan yiziid hadaaya kula,
ma yarda beyah.
© Arabe tchadien (alphabet latin) Bible © Alliance Biblique du Tchad, 2019.
