1 Al-hamdulillah !
Mabruuk le l-naadum al-yakhaaf min Allah
wa yafrah ziyaada be wasiiyaatah.
2 Iyaalah yabgo fahaliin fi l-balad
aywa, zurriiyit al-saalihiin talga baraka.
3 Wa fi beetah yinlagu maal wa khuna
wa adaaltah tagood daayman.
4 Fi l-dalaam, yibiin nuur le l-naadum al-adiil
wa le l-hanuun wa l-rahiim wa l-saalih.
5 Adiil hu al-naadum al-yihinn wa yidayyin
wa yistaʼmal maalah hasab al-adaala.
6 Wa be da, ma yittartaʼ abadan
aywa, al-saalih yizzakkarooh daayman.
7 Hu ma yakhaaf min al-khabar al-cheen
wa galbah saabit wa mutawakkil ale Allah.
8 Galbah gawi, hu ma yakhaaf
lahaddi haziimat khusmaanah tinchaaf.
9 Hu yanti le l-masaakiin be juud
wa adaaltah tagood daayman
wa be charaf, hu yarfaʼ raasah.
10 Al-aasi yichiifah wa yakhdab
wa yiʼaddi chalaaliifah wa yiʼayyis
aywa, acham al-aasiyiin
yingatiʼ marra waahid.
© Arabe tchadien (alphabet latin) Bible © Alliance Biblique du Tchad, 2019.
