Wasiiye le kabiir al-khannaayiin : Mazmuur le Dawuud
1 Ya Allah, khallisni min al-raajil al-fasil
wa ahfadni min siid al-unuf,
2 min humman al-yanwu al-fasaala
wa yisabbubu al-duwaas kulla yoom.
3 Humman yitarrugu lisneehum misil daabi
wa chalaaliifhum induhum samm amchideegaat. Wagfa.
4 Ya Allah, ahfadni min iid al-aasi
wa ahmiini min siid al-unuf,
min humman al-induhum niiye le yarmuuni.
5 Al-mustakbiriin kajjo charak wa hubaal leyi
wa maddo churukka wa amkajjaamaat fi tuul derbi. Wagfa.
6 Wa gult le Allah : «Inta Ilaahi !
Ya Allah, asmaʼ hissi hana l-chihde.
7 Ya Allah Rabbi, inta gudurti wa najaati
wa fi yoom al-harib, inta hameetni.
8 Ya Allah, ma tikhalli chahwat al-aasi tukuun
wa ma tikhalli khittitah tilhaggag wa yugumm. Wagfa.
9 «Ya Allah, ma tikhalli niiyit al-fasliin tilhaggag
wa ma tikhalli khittithum tanjah wa yihaasuruuni.
10 Khalli yittartaʼo fi l-jamur wa yagaʼo fi l-naar
wa fi nugra tawiile al-ma yamurgu minha.
11 Khalli al-lisaanah tawiil ma yagood fi l-balad
wa l-fasaala titaarid siid al-unuf.»
12 Ya Allah !
Ana naʼarif kadar tihaakim be l-adil le l-mazluum
wa tidaafiʼ le huguug al-masaakiin.
13 Aywa, al-saalihiin yachkuru usmak
wa l-adiiliin yaskunu fi hadaratak.
© Arabe tchadien (alphabet latin) Bible © Alliance Biblique du Tchad, 2019.
