1 Al-hamdulillah !
Aywa, adiil kan nikhannu le Ilaahna
wa halu wa sameh le nahmuduuh.
2 Allah yabni Madiinat al-Khudus battaan
wa yilimm Bani Israaʼiil al-muchattatiin.
3 Hu yachfi al-galibhum majruuh
wa yiʼaalij wajaʼhum.
4 Hu yahsib adad al-nujuum
wa le kulli waahide yanti usum.
5 Rabbina hu kabiir wa gudurtah kula katiire
wa ilmah ma indah hadd.
6 Allah yisaaʼid al-masaakiin
wa yarmi al-aasiyiin fi l-turaab.
7 Khannu le Allah be chukur
wa adurbu le Ilaahna al-jigindiiye.
8 Da hu al-yamla al-sama be l-sahaab
wa yijahhiz al-matara wa yinazzilha fi l-turaab
wa yigawwim al-gechch fi l-jibaal.
9 Hu yanti akil le l-bahaayim
wa le iyaal al-khuraab wakit yabku.
10 Gudrat al-juwaad ma taʼajibah
wa be manaʼ al-raajil, ma lammaah.
11 Laakin Allah yafrah be l-yakhaafo minnah
wa l-yukhuttu achamhum fi rahmatah.
12 Ya Madiinat al-Khudus, majjidi Allah !
Aywa, ya Sahyuun, ahmudi Ilaahki !
13 Achaan hu gawwa hawaadir biibaanki
wa baarak awlaadki fi usutki.
14 Hu yisabbit al-salaam fi ardiki
wa be afdal gameh, yachbiʼki.
15 Hu yirassil kalaamah fi l-ard
wa kalaamah yajri be surʼa.
16 Hu yafruch al-talaj misil gutun
wa yichattit al-karany misil rumaad.
17 Hu yinazzil al-barad misil hashas
wa yaatu yagdar yahmal bardah ?
18 Hu yirassil kalaamah wa yimawwiʼhum
wa yanfukh al-riih wa l-almi yajri.
19 Allah yikallim kalaamah le zurriiyit Yaakhuub
aywa, le Bani Israaʼiil yuguul gawaaniinah wa churuutah.
20 Wa da, hu ma sawwaah le ayyi umma
wa l-umam ma yaʼarfu churuutah.
Al-hamdulillah !
© Arabe tchadien (alphabet latin) Bible © Alliance Biblique du Tchad, 2019.
