1 Al-hamdulillah !
Ahmudu Allah min al-sama,
wa ahmuduuh fi l-aali.
2 Ahmuduuh intu malaaʼikatah,
wa ahmuduuh intu kulluku khuwwaatah al-fi l-sama.
3 Ahmuduuh intu al-harraay wa l-gamar,
wa ahmuduuh intu kulluku al-nujuum al-tiraaru.
4 Ahmuduuh intu al-samaawaat al-aaliyiin
wa inta al-almi al-min foog leehum.
5 Khalli yahmudu usum Allah
achaan be amrah, hu khalagaahum.
6 Hu sabbataahum daayman wa ila l-abad
wa khatta leehum huduud al-abadan ma yufuutuuhum.
7 Ahmudu Allah min al-ard,
intu khuul al-buhuur wa kulla almi al-khariig,
8 intu al-naar wa l-barad wa l-talaj wa l-khamaam
wa l-zoobaʼaane al-titabbig amrah !
9 Ahmudu Allah min al-ard,
intu al-jibaal wa kulla l-hujaar,
al-chadar al-indah fawaakih wa kulla chadar al-arz
10 intu al-bahaayim wa kulluku al-haywaanaat
wa l-zawaahif wa l-tuyuur.
11 Ahmudu Allah min al-ard,
muluuk al-ard wa kulla l-chuʼuub,
al-kubaaraat wa kulla gudiya al-ard,
12 al-subyaan wa l-banaat
wa l-chiyyaab wa l-chabaab.
13 Aywa, ahmudu Allah
achaan usmah hu bas al-Aali
wa majdah yamla al-samaawaat wa l-ard.
14 Hu rafaʼ raas chaʼabah
wa kulla muʼminiinah yachkuruuh,
aywa, Bani Israaʼiil chaʼabah al-khaali leyah.
Al-hamdulillah !
© Arabe tchadien (alphabet latin) Bible © Alliance Biblique du Tchad, 2019.
