Mazmuur le Dawuud
1 Le Allah al-ard wa kulla cheyy al-foogha
wa leyah hu al-aalam wa l-saakniin foogah.
2 Achaan hu assas al-ard fi l-buhuur
wa sabbatha fi l-almi.
3 Yaatu indah hagg yatlaʼ jabal Allah ?
Wa yaatu yagiif fi bakaanah al-mukhaddas ?
4 Illa naadum al-iideenah bariyiin
wa galbah nadiif.
Illa hu al-ma yiwaddi nafsah fi l-kidib
wa ma yahlif le yukhuchch.
5 Al-naadum da yalga barakat Allah
aywa, yalga adaala min Ilaahah al-yinajjiih.
6 Al-naas al-yifattuchu wijhak,
humman misil da, ya Allah.
Aywa, al-yiwajjuhu aleek,
dool zurriiyit Yaakhuub. Wagfa.
7 Anfathu, ya biibaan !
Anfathu, ya madaakhil al-daaymiin !
Wa khalli yadkhul foogku al-malik al-aziim.
8 Yaatu al-malik al-aziim ?
Hu Allah al-gawi wa l-chadiid,
Allah al-chadiid fi l-harib.
9 Anfathu, ya biibaan !
Anfathu, ya madaakhil al-daaymiin !
Wa khalli yadkhul foogku
al-malik al-aziim.
10 Yaatu al-malik al-aziim ?
Hu Allah al-Gaadir,
hu al-malik al-aziim. Wagfa.
© Arabe tchadien (alphabet latin) Bible © Alliance Biblique du Tchad, 2019.
