Le Dawuud
1 Ya Allah ! Khaasim al-yikhaasumuuni
wa haarib al-yihaarubuuni !
2 Chiil daragatak wa dirʼak
wa gumm afzaʼni !
3 Midd haribtak wa arfaʼ tabiigak
le tigaabil al-yitaaruduuni.
Wa guul leyi : «Ana munajjiik !»
4 Khalli yiʼiibu wa yinhaano,
humman al-yidooru mooti !
Khalli yiʼarrudu khajlaaniin,
humman al-yidooru leyi al-fasaala !
5 Khalli yabgo misil uttaab fi ust al-riih
wakit malak Allah yitaaridhum !
6 Khalli deribhum yabga adlam wa amzahaloota
wakit malak Allah yatrudhum !
7 Achaan bala janiiye, kajjo leyi charak
wa bala janiiye, nakato nugra le yarmuuni.
8 Khalli yagaʼ fooghum halaak be khafla
wa yakrubhum charakhum al-labbadooh
wa fi l-halaak yagaʼo !
9 Laakin nafsi tinbasit be Allah
wa ana nafrah be najaatah.
10 Wa fi nafsi nuguul :
«Ya Allah, yaatu mislak ?
Inta tinajji al-miskiin
min al-gawi minnah
wa tinajji al-miskiin wa l-daʼiif
min al-yaglaʼ minhum.»
11 Chuhuud al-zuur gammo yathamooni
be cheyy al-ana ma naʼarfah.
12 Wa humman yisawwu leyi fasil
fi badal al-zeen
wa ana faddalt wiheedi.
13 Wa fi wakit maradhum,
ana libist khulgaan al-hizin
wa maskant nafsi be siyaam
wa gaaʼid nisalli daayman leehum.
14 Ana macheet wa jiit
misil fi moot hana akhu aw rafiig
wa dangart raasi
misil al-haznaan le ammah.
15 Laakin wakit attartaʼt,
humman lammo diddi wa firho.
Wa min duun naʼarfah,
al-fasliin gammo diddi
wa daayman yigattuʼu laham jildi.
16 Maʼa l-chammaatiin, yadhako foogi
wa daayman yiwassufuuni sunuunhum al-turaan.
17 Ya Rabb, kikkeef tahmal al-cheyy da ?
Najji ruuhi min damaarhum
wa najji nafsi min al-diidaan dool !
18 Fi lubb al-mujtamaʼ, ana nachkurak
aywa, fi lubb al-naas al-katiiriin, nahmudak.
19 Humman al-bigo udwaani bala janiiye,
khalli ma yafraho be sababi.
Humman al-yakrahooni bala janiiye,
khalli ma yukujju uyuunhum le yiʼayyuruuni !
20 Achaan abadan ma yihajju be salaam
didd sukkaan al-aaychiin be hudu fi l-balad.
Wa kulla cheyy al-yuguulu,
hu kalaam khachch.
21 Wa yaftaho khuchuumhum kubaar
wa yuguulu diddi :
«Ha ha ! Uyuunna chaafooh !»
22 Wa inta kula chift, ya Allah. Ma taskut !
Ya Rabbi, ma tibaʼʼid minni !
23 Gumm, ya Ilaahi, daafiʼ leyi fi daliimti !
Wa daafiʼ leyi fi chaan huguugi, ya Rabbi !
24 Haakimni hasab adaaltak, ya Allah Ilaahi,
wa khalli udwaani ma yafraho be sababi.
25 Wa khalli ma yuguulu fi guluubhum :
«Ha ha ! Hu da, lugma waahide ma tamma !»
Wa khalli ma yuguulu :
«Da khalaas ! Aniina zaratnaah !»
26 Khalli al-eeb wa l-chamaate yakurbuuhum,
humman al-yafraho be masiibti.
Khalli al-eeb wa l-ihaana yikhattuuhum,
humman al-yugummu diddi.
27 Khalli yiʼiitu wa yizakhrutu min al-farah
humman al-yidooru leyi al-adaala
wa daayman yuguulu :
«Allah hu akbar ! Hu yidoor salaamat abdah.»
28 Wa khalaas, lisaani yikallim be adaaltak
aywa, kulla yoom nahmudak.
© Arabe tchadien (alphabet latin) Bible © Alliance Biblique du Tchad, 2019.
