Le Dawuud
1 Ma tazʼal didd al-fasliin
wa ma tahsid al-yisawwu al-fasaala.
2 Achaan humman misil al-gechch al-yamrad ajala
wa misil al-ziraaʼa al-taybas.
3 Atwakkal ale Allah wa sawwi al-kheer
wa fi l-balad, taskun be amaan.
4 Wa maʼa Allah, talga kulla cheyy sameh
wa hu yantiik talabaat galbak.
5 Wajjih khatwaatak ale Allah
wa atwakkal aleyah
wa hu yisawwi leek kulla cheyy.
6 Hu yibayyin adaaltak misil al-nuur
wa huguugak misil nuur al-gaayle.
7 Agood saakit giddaam Allah
wa khutt achamak foogah.
Wa ma tazʼal didd al-yanjah fi tariigah
wa la didd al-naadum al-yisawwi muʼaamara.
8 Khalli al-zaʼal wa aaba al-khadab
wa ma takhdab chadiid lahaddi tisawwi al-fasaala.
9 Achaan al-fasliin, yafsuluuhum
wa laakin al-yukhuttu achamhum fi Allah yawrusu al-ard.
10 Baʼad chiyya, al-aasi yabga ma fiih.
Kan tifattichah fi bakaanah,
ma talgaah fi ayyi bakaan.
11 Wa laakin al-masaakiin yawrusu al-ard
wa yafraho be salaam katiir.
12 Al-aasi yikhattit didd al-saalih
wa diddah hu, yiʼaddi sunuunah.
13 Wa laakin al-Rabb yadhak leyah
achaan hu yaʼarif kadar yoomah yaji.
14 Al-aasiyiin yarfaʼo al-seef
wa yajbudu al-nubbaal
le yarmu al-mazluum wa l-miskiin,
le yadbaho al-maachiin fi l-derib al-adiil.
15 Wa laakin seefhum yigabbil yatʼanhum fi guluubhum
wa nubbaalhum yilkassar.
16 Al-chiyya hana l-saalih
akheer min al-katara hana l-aasiyiin.
17 Achaan iideen al-aasiyiin yilkassaro
wa laakin Allah yisaaʼid al-saalihiin.
18 Allah yahfad ayyaam al-saalihiin
wa warasathum tagood ila l-abad.
19 Wa fi chaanah hu, ma yalgo eeb fi wakt al-masiibe
wa fi ayyaam al-juuʼ, humman yachbaʼo.
20 Laakin al-fasliin yumuutu
aywa, udwaan Allah yiddammaro misil nuwwaar al-kadaade
wa yufuutu misil al-dukhkhaan al-yabga ma fiih.
21 Al-aasi yiddayyan wa ma yikaffi
wa l-saalih yihinn wa yanti.
22 Aywa, al-yibaarikhum Allah yawrusu al-balad
wa l-naas al-hu yalʼanhum, yafsuluuhum.
23 Wa be Allah, khatwaat al-naadum yabgo saabtiin
wa hu yabga farhaan be derbah.
24 Wa kan attartaʼ kula, ma yagaʼ
achaan Allah kaarib iidah.
25 Ana kunt sabi wa lahaddi chayyabt
wa ma chift saalih al-Allah abaah
wa la zurriiytah chahado akil.
26 Kulla yoom al-aadil yihinn wa yisaaʼid
wa zurriiytah mubaaraka.
27 Baʼʼid min al-fasaala wa sawwi al-kheer
wa inta taskun al-balad kulla ayyaam hayaatak.
28 Achaan Allah yihibb al-adaala
wa ma yaaba al-aamano beyah.
Hu yahfadhum daayman
wa laakin zurriiyit al-aasiyiin, yafsuluuhum.
29 Al-saalihiin yawrusu al-ard
wa yaskunu foogha ila l-abad.
30 Khachum al-saalih daayman yuguul al-hikma
wa lisaanah yantug be l-hagg.
31 Wa Tawraat Rabbah gaaʼid fi galbah
wa khatwaatah ma yittartaʼo.
32 Al-aasiyiin yiraakhubu al-saalih
wa yifattuchu tariiga al-yaktuluuh beeha.
33 Wa laakin Allah ma yikhalliih fi iideehum
wa ma yarda yihaakumuuh
kan waddooh al-chariiʼa kula.
34 Khutt achamak fi Allah wa ahfad derbak,
hu yiʼazzimak wa yantiik al-balad misil warasa
wa inta tichiif wakit al-aasiyiin yafsuluuhum.
35 Ana chift al-aasi siid al-unuf
zaad misil chadara khadra.
36 Wa laakin hu faat wa bigi ma fiih
wa ana fattachtah wa ma ligiitah.
37 Chiif al-naadum al-tamaam
aywa, chiif al-naadum al-saalih.
Siid al-salaam
indah mustakhbal tawiil.
38 Wa laakin al-aasiyiin yiddammaro sawa
wa mustakhbal siyaad al-fasaala ma fiih.
39 Najaat al-saalihiin jaaye min Allah,
hu maljaʼhum fi wakt al-diige.
40 Allah yafzaʼhum wa yinajjiihum,
aywa, yinajjiihum min al-aasiyiin wa yafzaʼhum
achaan al-adiiliin yaljaʼo leyah hu.
© Arabe tchadien (alphabet latin) Bible © Alliance Biblique du Tchad, 2019.
