Wasiiye le kabiir al-khannaayiin : Mazmuur le Dawuud
1 Ana khatteet kulla achami fi Allah
wa hu wajjah aleyi
wa simiʼ siraakhi le l-fazaʼ.
2 Hu maragaani min nugrat al-halaak
wa min al-wahale wa l-amzahaloota.
Hu waggafaani be tuuli fi l-hajar
wa sabbat khatwaati.
3 Hu khatta fi khachmi khine jadiid,
khine hana chukur le Ilaahna.
Katiir yichiifu wa yakhaafo
wa yitwakkalo ale Allah.
4 Mabruuk le l-naadum al-yitwakkal ale Allah
wa ma yinlafit le l-mustakbiriin wa l-kaddaabiin.
5 Ya Allah Ilaahi !
Inta sawweet leena ajaayib
wa haggagt ahdaaf katiiriin
wa ma fi naadum al-yisaawiik.
Ana nidoor nihajji be ajaaybak wa niballikhhum
laakin humman katiiriin ma binhasbu.
6 Inta ma dawwart wa la dahiiye wa la hadiiye
wa laakin fataht udneeyi le nafham.
Inta ma talabt dahaaya muharragiin
wa la dahaaya le kaffaarat al-zanib.
7 Khalaas, ana gult : «Daahu ana jiit !
Ana jiit be kitaab malfuuf al-katabooh leyi.»
8 Ya Ilaahi ! Ana nisawwi ridaak wa nafrah
wa nahfad Tawraatak fi daakhal galbi.
9 Nibachchir be adaaltak le mujtamaʼ kabiir.
Ya Allah, chiif ! Ana ma naskut, inta taʼarfah.
10 Ana ma labbadt adaaltak fi daakhal galbi
wa laakin hajjeet be sidkhak wa najaatak.
Ana ma labbadt kheerak
wa amaanak le mujtamaʼ kabiir.
11 Ma tadharni min rahmatak, ya Allah !
Kheerak wa amaanak yahfadooni le l-abad.
12 Achaan masaayib bala adad haasarooni
wa khataayi faatooni, ma nagdar nahmalhum.
Humman kitro wa bigo ziyaada min suuf raasi
wa ana ma indi gudra.
13 Ya Allah, nachhadak najjiini !
Wa taʼaal ajala afzaʼni !
14 Khalli al-eeb wa l-chamaate yakurbuuhum kulluhum,
humman al-yidooru mooti.
Wa l-yihibbu leyi al-charr,
khalli yiʼarrudu wa yakhjalo.
15 Al-yichchammato leyi,
khalli al-eeb yakhribhum.
16 Wa laakin khalli kulla l-yifattuchuuk
yafraho wa yinbastu beek.
Wa khalli al-yihibbu najaatak yuguulu daayman :
«Allah hu akbar !»
17 Ana miskiin wa fagraan.
Ya Rabb, fakkir foogi !
Inta leyi fazaʼ wa munajji.
Ya Ilaahi, ma tiʼakhkhir !
© Arabe tchadien (alphabet latin) Bible © Alliance Biblique du Tchad, 2019.
