Wasiiye le kabiir al-khannaayiin : Taʼliim min awlaad Khuurah
1 Ya Ilaahna !
Aniina simiʼna kalaam juduudna.
Wa humman kallamo leena
be l-cheyy al-sawweetah leehum fi wakithum,
fi l-zaman al-faat.
2 Le timakkinhum,
inta galaʼt ard al-umam be gudurtak.
Wa le tisakkinhum,
inta darabt al-chuʼuub.
3 Achaan ma be silaahhum, humman waraso al-balad
wa ma be gudrithum, annasaro.
Laakin be zeenaaytak inta
wa be duraaʼak inta wa be nuur wijhak
achaan inta ridiit beehum.
4 Ya Ilaahi, inta bas maliki
wa inta bas al-yikharrir najaat zurriiyit Yaakhuub !
5 Beek inta, aniina nihaarubu udwaanna
wa be usmak, nifajjukhu al-yugummu diddina.
6 Ana ma nitwakkal ale nubbaali
wa seefi kula ma yinajjiini.
7 Achaan inta bas al-tinajjiina min udwaanna
wa inta bas al-tiʼayyib al-yakrahoona.
8 Kulla yoom nahmuduuk, ya Rabb,
wa nachkuru usmak ila l-abad. Wagfa.
9 Wa be da kula, inta abeetna wa khajjaltina
wa abadan ma kunt maʼa askarna.
10 Inta taradtina giddaam udwaanna
wa l-yakrahoona nahaboona misil yidooruuh.
11 Inta sallamtina misil khanam al-juzur
wa chattattina fi ust al-umam.
12 Wa anteetna le l-chuʼuub bala faayde
wa biʼtina bala taman.
13 Inta sawweetna iyyeere maʼa jiiraanna
wa sawweetna chimmeete
wa mahguuriin maʼa l-naas al-muhawwigiinna.
14 Inta sawweetna masal fi ust al-umam
wa naas yihizzu ruuseehum leena fi ust al-chuʼuub.
15 Kulla yoom nichiif charafi yiwaddir
wa l-eeb yikhatti wijhi
16 be sabab al-adu al-yiʼayyir wa yichammit
wa l-yilkaffa foogi al-taar.
17 Da kula ja foogna
wa aniina ma nisiinaak
wa la nagadna muʼaahadatak.
18 Guluubna daayman maʼaak
wa rijleena abadan ma talago derbak.
19 Wa laakin wakit dammartina,
baladna bigat kharaab
wa l-kadaade bigat margad hana baʼaachiim
wa khatteetna be l-dalaam al-haalik.
20 Wa kan nisiina usum Ilaahna
wa fattachna ilaah aakhar ajnabi,
21 al-Rabb ma yaʼarfah walla ?
Hu yaʼarif asraar al-guluub.
22 Wa laakin fi chaanak inta,
yaktuluuna kulla yoom
wa yajʼaloona misil khanam al-juzur.
23 Gumm, ya Rabb, ma taskut saakit !
Gumm, ma tikhalliina ila l-abad !
24 Maala ma tiwajjih aleena ?
Wa maala tansa taʼabna wa diigitna ?
25 Achaan ruuhna addammarat wa wagaʼna fi l-ard
wa be butuunna, anbatahna fi l-turaab.
26 Gumm wa afzaʼna !
Achaan rahmatak, najjiina !
© Arabe tchadien (alphabet latin) Bible © Alliance Biblique du Tchad, 2019.
