Wasiiye le kabiir al-khannaayiin : Mazmuur le awlaad Khuurah
1 Ya l-chaʼab !
Asmaʼo kulluku al-cheyy da !
Ya sukkaan al-dunya !
Khuttu kulluku adaanku !
2 Wa intu kula, ya Bani Adam !
Wa intu kula, ya l-naas,
al-khaniyiin wa l-fagraaniin, kulluku sawa !
3 Khachmi yuguul kalaam al-hikma
wa galbi yihajji be l-fihim.
4 Le l-masal, ana naftah adaani
wa be jigindiiyti, ana nifassirah.
5 Maala nakhaaf fi ayyaam al-fasaala
wakit khata udwaani muhawwigni ?
6 Humman yitwakkalo ale gudrithum
wa yifaachuru be khunaahum.
7 Al-insaan ma yagdar yafda akhuuh
wa la yikaffi taman fidyatah le l-Rabb.
8 Wa fidyat al-nafis di gaasiye,
ma tilkaffa ila l-abad.
9 Al-insaan yagdar yiʼiich daayman walla ?
Wa abadan ma yichiif al-khabur walla ?
10 Wa laakin nichiifu al-hukama yumuutu
wa l-matmuus wa l-mukhaffal yiddammaro sawa
wa yikhallu khunaahum le l-aakhariin.
11 Humman yahsubu buyuuthum yagoodu ila l-abad
wa masaakinhum min zurriiye le zurriiye,
humman al-sammo arduhum be asaameehum.
12 Wa laakin al-insaan be kulla charafah,
ma yufuut muddit leele,
hu misil bahiime, yumuut !
13 Wa da derib al-naas al-yitwakkalo ale nufuushum
wa mustakhbal hana l-yardo be kalaamhum. Wagfa.
14 Humman misil al-khanam yarjo al-moot
wa l-moot yasrah beehum.
Wa ambaakir, al-saalihiin yahkumu fooghum
wa jamaalhum yiwaddir
wa l-khabur yabga maskanhum.
15 Wa laakin al-Rabb yafda hayaati min al-moot
aywa, hu yichiilni. Wagfa.
16 Ma takhaaf min al-insaan wakit yakhna
wa wakit charaf aayiltah yiziid.
17 Achaan wakit yumuut,
al-maal ma yamchi maʼaayah
wa charafah kula,
ma yanzil maʼaayah fi l-khabur.
18 Fi hayaatah,
hu yachkur nafsah wa yuguul :
«Aywa, ana ligiit al-kheer.»
19 Laakin hu kula yalhag juduudah
al-battaan ma yichiifu al-nuur.
20 Al-insaan al-khani
wa ma indah fihim,
hu misil bahiime al-tumuut.
© Arabe tchadien (alphabet latin) Bible © Alliance Biblique du Tchad, 2019.
