Wasiiye le kabiir al-khannaayiin : Mazmuur le Dawuud, wakit al-nabi Naataan ja leyah wa da baʼad Dawuud dakhal fi Batchaabaʼ
1 Ya Rabbi ! Hinn foogi hasab niʼmatak
wa be rahmatak al-kabiire, amha khataayi.
2 Guchch khataayi marra waahid
wa tahhirni min zanbi.
3 Achaan ana irift khataayi
wa zanbi gaaʼid daayman fi agli.
4 Diddak inta wiheedak bas, ana aznabt
wa sawweet cheyy fasil giddaamak.
Wa fi chaan da, inta saadikh wakit tikallim
wa aadil wakit tihaakim.
5 Daahu min wildooni, ana fi l-khata
aywa, min ammi khilbat beyi, ana muznib.
6 Laakin inta tafrah be l-hagg al-fi daakhal al-galib.
Fi daakhili, arrifni al-hikma.
7 Tahhirni min zanbi be warchaal zuufa
wa nabga taahir.
Khassilni lahaddi nabga abyad karr
ziyaada min al-gutun.
8 Antiini al-farah wa l-suruur
wa khalli al-jisim al-inta rihiktah yafrah.
9 Ma tiwajjih ale zunuubi
wa amha kulla khataayi.
10 Ya Rabbi ! Akhlig fi daakhili galib taahir
wa gabbil leyi ruuhi al-saabte !
11 Ma tazgulni baʼiid min hadaratak
wa ma tichiil minni Ruuhak al-mukhaddas.
12 Antiini farah najaatak
wa gawwiini be ruuh kariime.
13 Niʼallim duruubak le l-aasiyiin
wa l-muznibiin yigabbulu leek.
14 Ya Rabbi, ya Ilaahi,
ya munajji hayaati !
Najjiini min al-dimme
wa lisaani yikallim be adaaltak.
15 Ya Rabb, aftah khachmi
wa lisaani yachkurak.
16 Inta ma tidoor nadbah dahiiye.
Hatta kan nigaddim leek dahiiye muharraga kula,
inta ma takhbalha.
17 Al-dahiiye al-yakhbalha al-Rabb,
hi dahiiyat al-ruuh al-muhattama.
Ya Ilaahi, inta ma taaba
al-galib al-maksuur wa marhuuk.
18 Be ridaak, sawwi al-kheer le Sahyuun
wa abni battaan daraadir Madiinat al-Khudus.
19 Wa be da, tarda be l-dahaaya al-muwaafgiin
wa dool al-dahaaya al-muharragiin
wa l-hadaaya al-kaamiliin.
Aywa, yigaddumu tiiraan fi madbahak.
© Arabe tchadien (alphabet latin) Bible © Alliance Biblique du Tchad, 2019.
