Wasiiye le kabiir al-khannaayiin : Le yikhannuuh hasab al-hiss al-binaaduuh «Zahrat al-muʼaahada», chiʼir le Dawuud, le taʼliim.
Wa da wakit Dawuud haarab al-Araamiyiin al-saakniin fi Araam been al-Nahreen wa fi hillit Suuba wa Yuwaab ja wa katal 12 000 Adoomiyiin fi waadi al-Mileh
1 Ya Rabb ! Inta abeetna wa dammartina.
Inta khidibt leena laakin gabbilna aleek !
2 Inta rajjaft al-ard wa chaggagtaha.
Aalij chuguugha achaan hi tidoor tinhazza !
3 Inta chawwaft al-murr leena aniina chaʼabak,
aywa, charrabtina khamar al-yiliff al-raas.
4 Le l-yakhaafo minnak, inta wassaft leehum alaama
le yiʼarrudu min siyaad al-nuchchaab. Wagfa.
5 Rudd leena wa be iidak al-zeene, najjiina
achaan mahbuubiinak yalgo al-naja.
6 Al-Rabb kallam fi bakaanah al-mukhaddas :
«Ana ninbasit ! Wa nigassim hillit Chakiim
wa nigaawis waadi Sukkuut.
7 Turaab Gilʼaad leyi
wa ard Manassa kula leyi.
Wa ard Afraayim misil taagiiye al-tahmi raasi
wa balad Yahuuza misil asaat mulki.
8 Balad Muwaab misil maaʼuun baruudi
wa balad Adoom misil bakaan al-nazgul foogah naʼaali.
Wa didd balad al-Filistiyiin,
nikoorik korooraak al-harib.»
9 Yaatu al-yiwaddiini le l-madiina al-gawiiye ?
Yaatu al-yuguudni lahaddi balad Adoom ?
10 Ma inta, al-Ilaah al-taradtina walla ?
Ma inta, al-Rabb, al-aba ma yamrug maʼa askarna walla ?
11 Taʼaal ! Saaʼidna didd aduuna
achaan fazaʼ al-insaan ma madmuun.
12 Wa laakin maʼa l-Rabb, nalgo al-gudra
wa hu bas yifajjikh udwaanna !
© Arabe tchadien (alphabet latin) Bible © Alliance Biblique du Tchad, 2019.
