Al-juzu al-taalit hana l-Zabuur
Mazmuur le Asaaf
1 Be l-sahiih, al-Rabb rahiim le Bani Israaʼiil
wa le l-naas al-guluubhum saafiyiin.
2 Laakin ana kamaan, garrabt nittartaʼ
wa faddal leyi chiyya bas nagaʼ.
3 Achaan ana hasadt al-mustakbiriin
wa chift raahat al-aasiyiin.
4 Achaan ma yalgo taʼab lahaddi moothum
wa ajsaamhum sumaan.
5 Humman ma yatʼabo
misil taʼab Bani Adam
wa ma fi cheyy yadrubhum
misil yadrub al-naas al-aakhariin.
6 Wa fi chaan da, al-istikbaar bigi kijeel fi ragabathum
wa l-unuf bigi khalag al-yaksiihum.
7 Wa min wujuuhhum al-sumaan,
uyuunhum bigo dugaag
wa l-fasil al-fi guluubhum
ma indah hadd.
8 Humman yichchammato
wa yijahhuzu al-fasaala wa l-zulum
wa yihajju be istikbaar.
9 Wa be khuchuumhum,
yiʼayyuru al-sama
wa be lisaanhum,
ma yikhallu muʼyaar fi l-ard.
10 Wa hatta chaʼab Allah yamchu waraahum
wa yifattuchu kalaamhum be katara misil almi.
11 Wa l-aasiyiin yuguulu :
«Kikkeef al-Rabb yaʼarfah ?
Al-Aali ma indah maʼrafa !»
12 Aywa ! Dool humman al-aasiyiin
al-daayman ma induhum hamm
wa gaaʼidiin yiziidu khunaahum.
13 Bala faayde ana saffeet galbi
wa hatteet khalagi le niwassif baraaʼti.
14 Wa be da kula, ana taʼbaan kulla yoom
wa muʼaakhab kulli sabaah.
15 Wa kan gult nihajji misilhum
khalaas, ana bigiit khaayin le chaʼabak.
16 Wa ana fakkart le naʼarif
wa laakin bigi leyi gaasi bilheen
17 lahaddi dakhalt beetak al-mukhaddas
wa khalaas, ana fihimt mustakhbalhum.
18 Be l-sahiih, inta khatteethum fi bakaan amlas
le yizzahlato wa yagaʼo fi l-halaak.
19 Be surʼa, anbahato wa bigo ma fiihum,
angachcho min al-khariiʼe.
20 Ya Rabb ! Yiwadduru misil hilim
wakit tugumm didduhum.
21 Wakit galbi anjarah
wa wakit hasseet be taʼne fi daakhili,
22 ana bigiit mukhaffal
wa ma irift cheyy
wa giddaamak inta,
ana bigiit misil bahiime.
23 Wa be da kula, ana daayman maʼaak
wa inta karabt iidi al-zeene.
24 Inta gaaʼid tuguudni hasab wasiiytak
wa tiwaddiini fi majdak.
25 Ana nalga yaatu fi l-sama,
balaak inta ?
Wa kan inta maʼaayi,
ma niriid cheyy aakhar fi l-ard !
26 Jismi addammar wa galbi kula
laakin al-Rabb hu maljaʼ le nafsi
wa warasati ila l-abad.
27 Achaan al-yibaʼʼudu minnak yiddammaro
wa inta tahlik ayyi waahid al-yaabaak.
28 Wa kheeri ana,
da wakit nigarrib le l-Rabb.
Wa wakit naljaʼ le Allah al-Rabb,
niballikh kulla khidimtah.
© Arabe tchadien (alphabet latin) Bible © Alliance Biblique du Tchad, 2019.
