Wasiiye le kabiir al-khannaayiin : Le yikhannuuh hasab al-hiss al-binaaduuh «Ma tidammir», mazmuur le Asaaf, khine
1 Aniina nachkuruuk, ya Rabb,
wa nachkuru usmak achaan inta gariib
wa nihajju be ajaaybak.
2 Wa l-Rabb gaal : «Fi l-wakit al-nihaddidah,
ana nihaakim be l-hagg.
3 Wakit al-ard tarjif be kulla sukkaanha,
ma ana bas nisabbit asaasha walla ? Wagfa.
4 «Ana gult le l-mustakbiriin : ‹Ma tistakbaro !›
Wa gult le l-aasiyiin : ‹Ma tarfaʼo ruuseeku !
5 Ma tarfaʼo ruuseeku foog ziyaada
wa ma tihajju misil da
wa la tihajju be raas gawi.›»
6 Achaan al-azama ma taji
min al-sabaah wa la min al-kharib
wa la min al-sahara.
7 Achaan al-Rabb hu bas al-haakim.
Hu yinazzil al-waahid wa yarfaʼ al-aakhar.
8 Allah kaarib fi iidah kaas
malaan be khamar al-bisakkir
wa da khadabah.
Wa yacharbo minnah kulla l-aasiyiin
al-gaaʼidiin fi l-ard.
Aywa, yacharbooh lahaddi aakhirah.
9 Wa ana kamaan nikhabbir daayman
wa nahmud Ilaah Yaakhuub al-gaal :
10 «Nidalli ruuse al-aasiyiin
wa narfaʼ ruuse al-saalihiin.»
© Arabe tchadien (alphabet latin) Bible © Alliance Biblique du Tchad, 2019.
