Wasiiye le kabiir al-khannaayiin : Le yikhannuuh hasab al-hiss al-binaaduuh «Nuwwaar al-sitteeb», chahaadat Asaaf, mazmuur
1 Ya inta al-tuguud zurriiyit Yuusuf misil khanam,
ya raaʼi Israaʼiil, asmaʼ !
Ya inta al-gaaʼid foog al-makhluugiin al-samaawiyiin,
bayyin nafsak !
2 Giddaam gabaayil Afraayim
wa Banyaamiin wa Manassa,
gumm be kulla khuwwatak
wa taʼaal najjiina !
3 Ya Rabb, gabbilna aleek !
Wajjih aleena nuur wijhak
wa be da, aniina nanjo.
4 Ya Allah al-Ilaah al-Gaadir !
Lahaddi mata yigabbid khadabak
didd salaat chaʼabak ?
5 Inta tiʼakkilhum
khubza maʼjuuna be dumuuʼ.
Wa ticharribhum
talaata mikyaal hana dumuuʼ.
6 Wa inta sawweetna sabab hana huraaj le jiiraanna
wa udwaanna yichchammato foogna.
7 Ya l-Ilaah al-Gaadir, gabbilna aleek !
Wajjih aleena nuur wijhak
wa be da, aniina nanjo.
8 Min balad Masir,
inta maragt chadarat al-inab.
Wa taradt al-umam
wa maggant chadarat al-inab di.
9 Inta jahhazt leeha al-ard
wa hi dassat uruugha
wa malat al-balad.
10 Dullaha khatta al-jibaal
wa furuuʼha tuwaal misil al-arz al-kubaar.
11 Hi maddat furuuʼha lahaddi l-bahar al-Abyad
aywa, maganha lahaddi bahar al-Furaat.
12 Maala sawweet khuram katiiriin fi zariibitha
al-beehum al-naas al-faaytiin yagtaʼo al-inab ?
13 Wa halluuf al-khaaba yakhribha
wa haywaanaat al-kadaade yartaʼo foogha.
14 Ya l-Ilaah al-Gaadir, gabbil
wa min al-sama foog, anzur wa chiif !
Gumm wa fakkir
le chadarat al-inab di.
15 Ahmi al-magganatha iidak al-zeene
aywa, ahfad al-magan al-addaltah le nafsak.
16 Al-naas gataʼooh wa harragooh fi l-naar.
Khalli yiddammaro giddaam khadabak.
17 Khutt iidak fi l-naadum al-gaaʼid be zeenaaytak,
fi l-insaan al-inta zaatak anteetah gudra.
18 Khalaas, aniina ma nikissu minnak abadan.
Antiina al-haya wa be da, aniina ninaadu usmak.
19 Ya Allah al-Ilaah al-Gaadir,
gabbilna aleek !
Wajjih aleena nuur wijhak
wa be da, aniina nanjo.
© Arabe tchadien (alphabet latin) Bible © Alliance Biblique du Tchad, 2019.
