Khine, mazmuur le awlaad Khuurah, wasiiye le kabiir al-khannaayiin : Le yikhannuuh be hiss al-suffaara. Taʼliim min Heemaan al-Azraahi
1 Ya Allah Ilaahi al-tinajjiini !
Leel wa nahaar, ana nachhadak.
2 Khalli salaati talhagak
wa inta asmaʼ chakwiti.
3 Achaan nafsi chabʼaane min al-bala
wa ana garrabt le l-moot.
4 Jaʼalooni maʼa l-yanzulu fi l-khubuur
wa gudurti kula kammalat.
5 Wa raggadooni maʼa l-maytiin
misil al-maktuuliin wa muraggadiin fi l-khabur
wa misil al-naas al-inta ma tifakkir fooghum
wa lazamt iidak minhum.
6 Inta rameetni fi nugra ma indaha hadd
wa fi dalaam haalik.
7 Khadabak nazal foogi
wa be mooj al-moot khatteetni. Wagfa.
8 Inta baʼʼadtini min kulla l-yaʼarfuuni
wa sawweetni makruuh leehum.
Wa ana masjuun,
ma nagdar namrug.
9 Uyuuni kallo min al-taʼab
wa naadeetak kulla yoom, ya Allah !
Wa maddeet iideeni leek.
10 Hal tisawwi ajaayib le l-maytiin walla ?
Hal al-maytiin yugummu yachkuruuk walla ? Wagfa.
11 Fi l-khabur yihajju be rahmatak walla ?
Wa fi l-halaak yihajju be sidkhak walla ?
12 Ajaaybak yinʼarfu fi l-dalaam walla ?
Wa adaaltak fi balad al-nisyaan walla ?
13 Wa laakin ana ninaadiik le l-fazaʼ, ya Allah,
wa be fajur, nigaddim leek salaati.
14 Ya Allah ! Maala khalleetni
wa abeet ma tiwajjih wijhak aleyi ?
15 Min ana sakhayyar
ana miskiin wa mayyit
wa inta hammaltini be khoofak
wa ana khalaas addaayagt.
16 Khadabak nazal foogi
wa l-khoof minnak sakkatni.
17 Kulla yoom, humman bigo
misil almi hawaaleeyi
wa hawwagooni min kulli jiihe.
18 Inta baʼʼadt minni mahbuubiini wa rufgaani
wa l-dalaam bas bigi rafiigi.
© Arabe tchadien (alphabet latin) Bible © Alliance Biblique du Tchad, 2019.
