1 Khannu le Allah khine jadiid.
Khannu le Allah, ya kulla sukkaan al-ard !
2 Khannu le Allah wa baaruku usmah
wa kulla yoom bachchuru be najaatah.
3 Hajju be majdah le kulla l-umam
wa be ajaaybah le kulla l-chuʼuub.
4 Achaan Allah aziim
wa waajib leyah al-hamd al-katiir.
Hu mukhiif ziyaada
wa faayit kulla l-ilaahaat.
5 Achaan kulla ilaahaat al-chuʼuub ma naafʼiin
laakin Allah hu bas khalag al-samaawaat.
6 Al-majd wa l-azama hineeyah
wa l-gudra wa l-jalaal fi beetah al-mukhaddas.
7 Majjudu Allah,
ya gabaayil al-ard !
Majjudu Allah
achaan hu al-Majiid wa l-Gaadir.
8 Majjudu Allah
achaan usmah al-Majiid !
Adkhulu fi fadaayit beetah
wa gaddumu hadaayaaku.
9 Asjudu le Allah
achaan hu al-Khudduus.
Arjufu giddaamah,
ya kulla sukkaan al-ard.
10 Guulu fi ust al-umam :
«Allah hu al-malik !
Wa be da, al-aalam yagood saabit, ma yinhazza.
Hu yahkim al-chuʼuub be l-hagg.»
11 Khalli al-sama tinbasit
wa l-ard tafrah.
Wa khalli al-bahar yidagdig
be kulla cheyy al-fi lubbah.
12 Khalli al-kadaade tafrah
be kulla cheyy al-foogha.
Wa khalli chadar al-khaaba yizakhrutu
13 giddaam Allah.
Achaan Allah jaayi,
hu jaayi yahkim al-ard.
Hu yahkim al-aalam be l-adaala
wa l-chuʼuub be l-hagg.
© Arabe tchadien (alphabet latin) Bible © Alliance Biblique du Tchad, 2019.
