Al-daʼiif wa l-gawi fi l-iimaan
1 Akhbalo al-muʼmin al-daʼiif fi iimaanah wa ma tikhaalutuuh fi fikrah. 2 Hasab iimaan naas waahidiin, kulla nafar hana akil halaal. Wa laakin al-naas al-iimaanhum daʼiif yaakulu illa l-khadaar. 3 Al-naadum al-yaakul ayyi nafar hana akil, ma waajib yahgir al-muʼmin al-yaakul illa l-khadaar. Wa l-yaakul illa l-khadaar, ma waajib yuluum al-naadum al-yaakul kulla cheyy. Achaan akhuuk da, Allah khibilah khalaas. 4 Inta yaatu al-tuluum al-khaddaam al-inta ma siidah ? Siidah bas yuguul kan yanjah aw yafchul. Wa akiid hu yanjah achaan Rabbina bas yinajjihah.
5 Wa fi fikir naas waahidiin, fiyah yoom waahid muhimm ziyaada min al-ayyaam al-aakhariin. Wa fi fikir naas aakhariin, kulla l-ayyaam sawa sawa. Khalli ayyi naadum yukuun muʼakkid min nafsah. 6 Al-naadum al-yikhassis yoom waahid yikhassisah fi chaan Allah. Wa l-naadum al-yaakul kulla nafar hana akil yaakulah fi chaan Allah wa yachkurah fi chaanah. Wa l-naadum al-yaakul illa l-khadaar yaaba ma yaakulah fi chaan Allah wa hu kula yachkurah. 7 Ma fi naadum minnina yiʼiich fi chaan nafsah bas wa ma fi naadum minnina yumuut fi chaan nafsah bas. 8 Kan niʼiichu, niʼiichu fi chaan Rabbina wa kan numuutu, numuutu kula fi chaan Rabbina. Wa misil da, kan aniina hayyiin walla maytiin kula, aniina hana Rabbina. 9 Fi chaan da bas, al-Masiih maat wa baʼas achaan yabga Rabb al-hayyiin wa Rabb al-maytiin.
10 Wa inta, maala gaaʼid tuluum akhuuk ? Wa inta, maala gaaʼid tahgir akhuuk ? Ayyi waahid minnina yagiif giddaam kursi Allah fi yoom al-Hisaab. 11 Achaan da maktuub fi l-Kitaab : <Allah gaal : «Ana halaft be nafsi kadar kulla rukba tabruk giddaami wa ayyi lisaan yachhad kadar ana Allah.»> 12 Wa be misil da fi yoom al-Hisaab, ayyi waahid minnina masʼuul giddaam Allah fi l-cheyy al-hu sawwaah.
13 Achaan da, khalliina ma nuluumu akhwaanna. Akheer nichiilu niiye achaan abadan ma nisawwu cheyy al-yiwaddi akhuuna le l-zanib, lahaddi yamurgah min al-derib. 14 Achaan al-Rabb Isa maʼaayi, ana muʼakkid kadar kulla nafar hana akil halaal fi zaatah. Laakin al-akil yabga haraam le l-naadum al-fi fikrah al-akil da haraam. 15 Kan al-akil al-taakulah yisabbib le akhuuk muchkila, inta ma maachi fi derib al-mahabba. Ma tikhalli aklak yisabbib halaak le akhuuk al-Isa al-Masiih maat fi chaanah. 16 Ya akhwaani, ma tikhallu al-cheyy al-adiil leeku yanti fursa le yuguulu foogku kalaam fasil. 17 Achaan al-muhimm fi mamlakat Allah ma al-akil wa l-charaab, laakin hu al-adaala wa l-salaam wa l-farha fi l-Ruuh al-Khudduus. 18 Al-naadum al-yitaabiʼ al-Masiih misil da, Allah yarda beyah wa l-naas kula yikarrumuuh.
19 Be misil da, khalli nijaahudu achaan nisawwu al-cheyy al-yisabbit al-salaam ambeenaatna wa l-yigawwiina kullina. 20 Ma titallif amal Allah be sabab al-akil. Sahiih, ayyi nafar hana akil halaal fi zaatah. Laakin ayyi akil al-taakulah al-yiwaddi akhuuk fi l-zanib, da haraam leek. 21 Kan ma taakul al-laham wa ma tachrab al-khamar wa kan taaba ayyi cheyy al-yiwaddi akhuuk fi l-zanib, khalaas misil da inta gaaʼid tisawwi al-cheyy al-adiil. 22 Al-cheyy al-tiʼaamin beyah fi l-kalaam da, khalli yabga beenak wa been Allah. Mabruuk le l-naadum al-gaaʼid yisawwi al-cheyy al-nafsah tarda beyah wa ma yuluum nafsah be sababah. 23 Wa ayyi naadum al-yichakkik fi galbah fi l-cheyy al-gaaʼid yaakulah, Allah yuluumah achaan ma gaaʼid yitaabiʼ iimaanah. Ayyi cheyy al-ma nisawwuuh be l-iimaan, hu zanib.
© Arabe tchadien (alphabet latin) Bible © Alliance Biblique du Tchad, 2019.
