Raʼuus machat tikachchib
1 Wa fiyah raajil waahid usmah taaliʼ wa hu min ahal Aliimalik, raajilha le Naʼiima. Wa l-raajil da usmah Buʼaaz. 2 Wa Raʼuus al-Muwaabiiye gaalat le Naʼiima : «Khalliini namchi fi l-ziraaʼa nikachchib kan siyaad al-ziraaʼa yardo leyi.» Wa Naʼiima gaalat leeha : «Amchi, ya bineeyti.»
3 Wa khalaas, Raʼuus machat tilaggit wara l-lammaamiin wa be sudfa hi machat fi zereʼ hana Buʼaaz min ahal Aliimalik. 4 Wa baʼad chiyya, Buʼaaz kula ja min Beet Laham wa gaal le l-lammaamiin : «Allah maʼaaku !» Wa humman gaalo leyah : «Allah yibaarikak !»
5 Wa Buʼaaz gaal le khaddaamah al-wakkalah kabiir al-lammaamiin : «Al-bitt di min ween ?» 6 Wa kabiir al-lammaamiin gaal leyah : «Di al-bineeye al-Muwaabiiye al-jaat maʼa Naʼiima min balad Muwaab. 7 Hi jaat leyi wa saʼalat wa gaalat : ‹Antuuni izin nikachchib wa nilimm kulla l-ganaadiil al-khalloohum al-lammaamiin waraahum.› Wa min al-fajur hi jaat wa gaaʼide takhdim lahaddi hassaʼ wa ma anjammat fi l-dull illa chiyya bas.»
8 Wa baʼad da, Buʼaaz gaal le Raʼuus : «Asmaʼe, ya bineeyti. Ma tikhalli al-zereʼ da wa tamchi tilaggiti fi zereʼ aakhar. Akhdimi hini maʼa khaddaamaati. 9 Wa fakkiri fi l-bakaan al-gaaʼidiin yagtaʼooh wa amchi waraahin. Wa ana kallamt le l-khaddaamiin ma yilammusuuki. Wa kan atchaane kula, amchi acharbe min al-mawaaʼiin al-humman maloohum.» 10 Wa min simʼat kalaamah da, hi barakat giddaamah wa gaalat : «Kikkeef ridiit beyi be ziyaada, ana al-khariibe, lahaddi tifakkir foogi misil da ?»
11 Wa Buʼaaz radda leeha wa gaal : «Ana simiʼt be kulla l-kheer al-inti sawweetiih le nasiibitki amm raajilki baʼad hu maat. Wa naʼarif inti khalleeti abuuki wa ammiki wa ardiki al-wildooki foogha wa jiiti le naas al-ma taʼarfiihum min awwal. 12 Wa Allah yantiiki ajur hana l-kheer al-inti sawweetiih. Allah Ilaah Bani Israaʼiil, al-jiiti le lajaʼti tihit janaaheeh, hu bas yantiiki ajur kaamil !» 13 Wa Raʼuus gaalat : «Inta ridiit leyi, ya sayyidi, wa chajjaʼtini be kalaamak al-halu. Wa laakin ana ma nisaawi waahide min khaddaamaatak.»
14 Wa wakit jahhazo al-akil, Buʼaaz gaal le Raʼuus : «Taʼaali hini aakuli. Chiili al-khubza di wa mallihiiha fi l-asiir al-haamud.» Wa hi gaʼadat jamb al-lammaamiin wa Buʼaaz antaaha fariiki wa akalat wa chibʼat lahaddi faddalatah.
15 Wa baʼad hi gammat tilaggit, Buʼaaz amar khaddaamiinah wa gaal : «Khalluuha tilaggit al-ganaadiil al-mudaffigiin ambeenaat al-juruun. Ma tiʼaazuuha. 16 Wa laakin daffugu leeha be niiyitku ganaadiil min al-juruun wa khalluuha tilaggithum, ma tikhawwufuuha.»
17 Wa Raʼuus laggatat fi l-zereʼ da lahaddi l-achiiye. Wa chakkat al-gameh al-abyad al-lammatah wa bigi gariib 10 kooro.
Naʼiima chakarat Raʼuus
18 Wa khalaas, Raʼuus chaalat al-gameh al-abyad al-laggatatah wa gabbalat al-hille antatah kulla le nasiibitha amm raajilha. Wa jaabat maʼaaha kula al-akil al-hi chibʼat wa faddalatah wa antatah le nasiibitha. 19 Wa nasiibitha gaalat leeha : «Al-yoom macheeti laggatti ween ? Wa khadamti ween ? Allah yibaarik al-naadum al-fakkar foogki !» Wa Raʼuus khabbarat nasiibitha be l-naadum al-hi khadamat fi bakaanah wa gaalat : «Al-raajil al-ana khadamt fi bakaanah al-yoom usmah Buʼaaz.» 20 Wa Naʼiima gaalat le marit waladha : «Baarak Allah fi Buʼaaz ! Wa ya hassaʼ kula naʼarif Allah gaaʼid yarham al-hayyiin wa l-maytiin.» Wa Naʼiima gaalat battaan : «Al-raajil da gariibna wa hu wariis raajli .»
21 Wa Raʼuus al-Muwaabiiye gaalat : «Wa hu gaal leyi battaan : ‹Akhdimi hini maʼa khaddaamaati lahaddi kulla l-lammiin yikammil.›» 22 Wa Naʼiima gaalat le Raʼuus marit waladha : «Akheer leeki ya bitti, takhdimi maʼa khaddaamaatah achaan kan macheeti fi zereʼ aakhar mumkin yiʼaazuuki.»
23 Wa khalaas, Raʼuus khadamat maʼa khaddaamaat Buʼaaz fi laggitiin al-ganaadiil lahaddi lammiin al-gameh al-abyad wa l-ahmar kulla kammal. Wa hi sakanat maʼa nasiibitha amm raajilha.
© Arabe tchadien (alphabet latin) Bible © Alliance Biblique du Tchad, 2019.
