Allah yidoor yibaarik chaʼabah
1 Wa daahu Allah al-Gaadir hajja leyi wa gaal :
2 «Indi khiira chadiide le jabal Sahyuun
wa nihibbah be mahabba chadiide.»
Wa da Allah al-Gaadir bas gaalah.
3 Wa daahu Allah gaal :
«Ana nigabbil fi jabal Sahyuun
wa naskun battaan fi usut Madiinat al-Khudus.
Wa Madiinat al-Khudus
yinaaduuha Madiinat al-Amaan.
Wa jabal Allah al-Gaadir
yinaaduuh al-jabal al-mukhaddas.»
4 Wa daahu Allah al-Gaadir gaal :
«Al-chiyyaab wa l-ajaayiz battaan yagoodu
fi chawaariʼ Madiinat al-Khudus.
Wa ayyi waahid asaatah fi iidah
achaan aacho umur tawiil.
5 Wa chawaariʼ al-madiina
yinmalu be l-awlaad wa l-banaat
al-gaaʼidiin yalʼabo fooghum.»
6 Wa daahu Allah al-Gaadir gaal :
«Hassaʼ fi l-wakit da,
intu al-faddaltu min chaʼabi,
tahsubu al-cheyy da gaasi walla ?
Wa laakin ana ma nahsibah gaasi.»
Wa da kalaam Allah al-Gaadir.
7 Wa daahu Allah al-Gaadir gaal :
«Aywa, ana ninajji chaʼabi
min balad al-sabaah
wa min balad al-kharib.
8 Ana nijiibhum
wa yaskunu battaan
fi usut Madiinat al-Khudus.
Humman yabgo chaʼabi
wa ana nabga Ilaahhum
be amaan wa adaala.»
9 Wa daahu Allah al-Gaadir gaal :
«Chiddu heelku !
Min wakit khatteetu asaas beet Allah al-Gaadir
le tabnu al-beet da battaan,
gaaʼidiin tasmaʼo kalaam al-anbiya.
10 Gabul ma badeetu al-khidme di,
khidmit al-naas ma indaha faayde
wa khidmit al-bahaayim kula ma indaha natiija.
Ma fi amaan le l-yamchu wa l-yaju
wa da be sabab al-adu.
Wa ana khalleet kulla l-naas
ayyi waahid yugumm didd akhuuh.»
11 Wa daahu kalaam Allah al-Gaadir.
«Wa laakin hassaʼ le l-faddalo min al-chaʼab,
ana ma nabga leehum misil awwal.
12 Hassaʼ nazraʼ al-salaam
wa jineenit al-inab talda
wa l-ard tanti intaajha
wa l-sama tinazzil matar.
Wa nanti kulla l-cheyy da misil warasa
le l-faddalo min al-chaʼab.
13 Ya Bani Yahuuza wa Bani Israaʼiil,
awwal intu bigiitu laʼana fi ust al-umam.
Wa laakin hassaʼ, ninajjiiku wa tabgo baraka.
Ma takhaafo, chiddu heelku !»
14 Achaan daahu Allah al-Gaadir gaal :
«Awwal, ana kharrart nitaʼʼibku
achaan juduudku khaddabooni.
Wa fi l-wakit da,
ana ma khalleet kharaari.
Wa da Allah al-Gaadir bas gaalah.15 Wa hassaʼ, ana khalleet kharaari hana l-taʼab
wa kharrart nisawwi al-kheer
le naas Madiinat al-Khudus
wa le Bani Yahuuza
wa be da, ma takhaafo.
16 Daahu al-cheyy al-waajib tisawwuuh.
Kallumu ambeenaatku be l-sahiih.
Wa fi chariiʼitku, ahkumu be l-hagg
wa be l-adaala al-tijiib al-salaam.
17 Ma tichiilu niiye
le tisawwu al-fasaala ambeenaatku
wa ma tihibbu
al-haliife be kidib
achaan kulla l-achya dool,
ana nakrahhum.»
Wa da kalaam Allah.
Ayyaam al-siyaam yabgo ayyaam al-iid
18 Wa Allah al-Gaadir hajja leyi wa gaal : 19 «Daahu Allah al-Gaadir gaal :
‹Ayyaam al-siyaam
hana l-chahar al-raabiʼ
wa l-chahar al-khaamis
wa l-chahar al-saabiʼ
wa l-chahar al-aachir
yabgo le Bani Yahuuza ayyaam iid
al-yiʼayyuduuhum be suruur wa farha.
Wa laakin hibbu al-hagg wa l-salaam.›»
20 Wa daahu Allah al-Gaadir gaal :
«Battaan yaju chuʼuub
wa sukkaan min hillaal katiiriin.
21 Wa sukkaan hille waahide
yamchu le sukkaan hille aakhara.
Wa yuguulu :
‹Yalla namchu nachhado Allah.
Khalli nifattuchu Allah al-Gaadir.›
Wa yuruddu leehum wa yuguulu :
‹Aywa, aniina kula namchu !›
22 Wa chuʼuub katiiriin wa umam gawiyiin
yaju fi Madiinat al-Khudus
le yifattuchu Allah al-Gaadir
wa yachhadooh.»
23 Wa daahu Allah al-Gaadir gaal : «Fi l-wakit da, yaju min al-umam achara rujaal ayyi waahid be lukhkhitah. Wa kulla l-rujaal dool yakurbu daayir khalag hana waahid min al-Yahuud wa yachhadooh wa yuguulu leyah : ‹Khalluuna namchu maʼaaku achaan simiʼna kadar al-Rabb gaaʼid maʼaaku.›»
© Arabe tchadien (alphabet latin) Bible © Alliance Biblique du Tchad, 2019.
