Wasiiye le kabiir al-khannaayiin : Le yikhannuuh hasab al-hiss al-binaaduuh «Moot al-wileed», mazmuur le Dawuud
1 Ya Allah, ana nachkurak be kulla galbi
wa nihajji be kulla ajaaybak.
2 Nafrah beek wa ninbasit
wa nikhanni be usmak, ya Allah al-Aali !
3 Wakit udwaani yiʼarrudu,
humman yittartaʼo
wa yiddammaro giddaamak.
4 Achaan inta chilt daliimti
wa daafaʼt le huguugi.
Inta gaaʼid fi archak
wa tahkim be l-adil.
5 Inta haddadt al-umam
wa dammart al-aasiyiin.
Wa gachcheet usumhum
daayman wa ila l-abad.
6 Al-adu bigi ma fiih
wa kharaabhum bigi daayim.
Wa l-mudun al-inta dammartuhum,
battaan ma yizzakkaroohum.
7 Laakin Allah gaaʼid ila l-abad
wa sabbat archah le yichaariʼ.
8 Hu yichaariʼ al-aalam be l-adil
wa yahkim al-chuʼuub be l-hagg.
9 Khalli Allah yukuun maljaʼ le l-mazluum,
aywa, yabga maljaʼ fi wakt al-diige.
10 Al-yaʼarfu usmak yitwakkalo aleek
achaan inta ma taaba al-yifattuchuuk, ya Allah !
11 Khannu le Allah,
hu al-yahkim fi Sahyuun
wa khabburu al-chuʼuub
be aʼmaalah al-kubaar !
12 Achaan hu yikaffi al-taar
wa yizzakkar al-mayyit
wa ma yansa siraakh al-masaakiin.
13 Ya Allah ! Arhamni wa chiif taʼabi
al-sawwooh leyi al-yakrahooni,
ya inta al-maragtini min al-moot.
14 Achaan nihajji be kulla chukrak
fi biibaan Sahyuun al-misil bineeye
wa nafrah be sabab najaatak.
15 Al-umam wagaʼo
fi l-nugra al-humman hafarooha.
Wa charakhum al-kajjooh
karab rijleehum humman bas.
16 Allah arraf nafsah
wa sawwa al-adaala.
Wa karab al-aasi fi charakah
al-hu zaatah kajjaah. Le yikhannuuh be hudu. Wagfa.
17 Khalli al-aasiyiin yigabbulu fi l-haawiye !
Aywa, kulla l-umam al-niso al-Rabb.
18 Laakin Allah ma yansa al-daʼiifiin
wa l-miskiin kula,
achamah ma yingatiʼ ila l-abad.
19 Ya Allah, gumm !
Ma tikhalli al-insaan yinnasir
wa khalli al-umam yilʼaakhabo giddaamak !
20 Ya Allah, nazzil khoof chadiid fooghum !
Wa khalli al-umam yaʼarfu
kadar humman insaan bas. Wagfa.
© Arabe tchadien (alphabet latin) Bible © Alliance Biblique du Tchad, 2019.
