SORTA LƎ DABID, MBAI GƎ NJEGELƁEJE GƎ ISRAƐL
Kwəi lə Sawul
1Sam 31.1-131 Pilistije d’ɔr rɔ d’aw rɔ gə Israɛlje ndá Israɛlje d’aḭ no̰ Pilistije’g ar dee tɔl dee bula dɔ mbal gə́ Gilboa. 2 Pilistije korə Sawul gə ŋganeeje ɓiri-ɓiri ndá deḛ tɔl Jonatan gə Abinadab gə Malki-Sua, ŋgalə Sawul lé. 3 Rɔ lé nuŋga kəd-kəd dɔ Sawul’g ar njérɔ-ɓandaŋgje d’uree d’aree iŋga doo. 4 Yen ŋga Sawul ula njekodo nérɔje ləa pana: Ɔr kiambas ləi ɔsm ne tɔlm nà njépole-magəje d’a ree kula sul dɔm’g.
Nɛ njekodo nérɔje ləa lé mbad mbata ɓəl undá badə gaŋgee. Ndá Sawul ya ɔr kiambas ləa mbad rəa piriŋ oso dɔ’g. 5 Njekodo nérɔje lə Sawul lé loo gə́ yeḛ oo to gə́ Sawul wəi mba̰ ndá yeḛ kara mbad rəa piriŋ oso dɔ kiambas’g ləa-yeḛ wəi səa na̰’d tɔ.
6 Togə́bè ɓa Sawul gə ŋganeeje gə́ munda lé d’wəi ne mee ndɔ gə́ kára ba ar gel bɔ ləa gə́ ka̰ ko̰ɓee lé godo. 7 Israɛlje lai gə́ d’aar kel wəl-loo’g lé loo gə́ d’oo to gə́ njérɔje d’aḭ ləm, Sawul gə ŋganeeje d’wəi ləm tɔ ndá deḛ kara d’uba ɓee-booje lə dee d’ya̰ d’aḭ tɔ. Yen ɓa Pilistije d’aw d’isi ne tɔr dee’g ya.
8 Bèlè lookàree ndá Pilistije ree gə mba tɔr néje rɔ dee gə́ d’wəi’g lé ndá deḛ d’iŋga nin Sawul gə nin ŋganeeje gə́ munda gə́ to naŋg dɔ mbal gə́ Gilboa lé. 9 Deḛ tɔr néje rɔ Sawul’g ləm, deḛ tuga dəa gaŋg ləma, d’odo nérɔje ləa ləm tɔ. Tɔɓəi d’ula kula mee ɓeeko̰ gə́ Pilisti lai d’ar dee d’ila mber ta gə́ maji neelé mee kəi-magəje’d lə deḛ lai ləm, gə mbuna koso-dəwje’g lai ləm tɔ. 10 Deḛ d’ɔm nérɔje lə Sawul mee kəi-magə’d tɔɓəi deḛ tɔ ka dəa tar mee kəi’g lə magə-Dago̰.
11 Yen ŋga loo gə́ koso-dəwje gə́ Jabɛs gə́ Galaad lai d’oo ta né gə́ Pilistije ra gə Sawul ndá, 12 dəwje lai gə́ to bao-rɔje d’ḭ d’aw d’odo nin Sawul gə nin ŋganeeje lé d’aw ne Jabɛs. Deḛ dubu siŋga dee gel kag-terebḭtə’d gə́ to Jabɛs tɔɓəi d’ɔg meḛ dee ɓoo as ndɔ dee siri tɔ.
13 Sawul wəi mbata yeḛ al ta ta Njesigənea̰’g aa ne dɔ ta ləa el ləm, mbata yeḛ aw dəji deḛ gə́ to njéɓar ndil dəwje gə́ d’wəi lé ɓa ta ləm tɔ . 14 Yeḛ dəji Njesigənea̰ ta el, togə́bè ɓa Njesigənea̰ aree wəi ne ləm, yeḛ un ne ɓeeko̰ ar Dabid, ŋgolə Isai ləm tɔ.
© Ngambai Bible © Alliance Biblique du Tchad 1989, 2015.
