Tura bula lə Israɛlje dɔdilaloo gə́ Sinai
1 Ndɔ gə́ doŋgɔr lə naḭ gə́ njekɔm’g joo, mee ləb gə́ njekɔm’g joo gə́ orè goo kunda gə́ d’unda loo mee ɓee gə́ Ejiptə teḛ lé Njesigənea̰ ula Moyis ta dɔdilaloo gə́ Sinai mee kəi-kwa-dɔ-na̰’g pana : 2 Seḭ gə Aaro̰ lé ar deeje tura koso-dəwje lə Israɛlje lai gə goo njémeekəije lə dee ləm, gə goo gel-bɔje lə dee ləm tɔ, ar deeje tura diŋgamje lai gə ri dee ri dee, 3 un kudee dɔ deḛ gə́ ra ləb rɔ-joo gə́ tar ləm gə d’a to njé gə́ Israɛl gə́ d’askəm kaw loo rɔ’g ləm tɔ. Seḭ a tura deeje gə goo kudu njérɔje lə dee lə dee. 4 Maji kar sí arje mbai dɔ kəije kára-kára wɔji ne dɔ gin bauje lə dee kára-kára d’aw sə sí gə́ njéla sə síje. 5 Aa ooje, ri njéla sə síje lé ɓa nee: Ginkoji Rubḛje: Elisur, ŋgolə Sedeur, 6 ginkoji Simeo̰je: Selumiel, ŋgolə Surisadai, 7 ginkoji Judaje: Nason, ŋgolə Aminadab, 8 ginkoji Isakarje: Netaneel, ŋgolə Suar, 9 ginkoji Jabilo̰je: Eliab, ŋgolə Helo̰, 10 ginkoji lə ŋgalə Jisəb: ginkoji lə Eprayimje: Elisama, ŋgolə Amiud, ginkoji Manasəje: Gamaliel, ŋgolə Pedasur, 11 ginkoji Bḛjamije: Abidan, ŋgolə Gideoni, 12 ginkoji Danje: Ahiejer, ŋgolə Amisadai, 13 ginkoji Aserje: Pagiel, ŋgolə Okran, 14 ginkoji Gadje: Eliasap, ŋgolə Deuel, 15 ginkoji Neptalije: Ahira, ŋgolə Enan.
16 Yee ɓa to deḛ gə́ ɓar dee loo-kwa-dɔ-na̰’g lə koso-dəwje lé, deḛ to dəwje gə́ boo gə́ wɔji dɔ ginkoji lə bɔ deeje gə deḛ gə́ to njékaa dɔ Israɛlje gə́ bula digi-digi lé tɔ. 17 Moyis gə Aaro̰ d’ar dəwje gə́ d’ɔr dee neelé to njéla sə deeje, 18 ndá mee ndɔ gə́ dɔtar lə naḭ gə́ njekɔm’g joo lé deḛ ɓar koso-dəwje lai na̰’d. Deḛ ndaŋg ri dee gə goo gel-bɔje lə dee ləm, gə goo njémeekəije lə bɔ deeje-je ləm tɔ. Tɔɓəi deḛ tura dee gə ri dee ri dee, un kudee dɔ deḛ gə́ ra ləb rɔ-joo gə́ tar. 19 Moyis tura bula lə dee togə́bè dɔdilaloo gə́ Sinai to gə́ Njesigənea̰ un ne ndia aree lé tɔ.
20 Deḛ ndaŋg ri ŋgalə Rubḛ gə́ to ŋgondər Israɛl lé, gə goo gel-bɔje lə dee ləm, gə goo njémeekəije lə bɔ deeje-je ləm tɔ, tura ne diŋgamje kára-kára lai, un kudee dɔ deḛ gə́ ra ləb rɔ-joo’d gə́ tar gə́ d’askəm kaw loo rɔ’g lé to: 21 bula lə diŋgamje gə́ to gə́ ginkoji Rubḛje gə́ deḛ tura dee lé aḭ tɔl-dɔg-loo rɔ-sɔ giree-misa̰ gə dəa tɔl-mi (46.500).
22 Deḛ ndaŋg ri ŋgalə Simeo̰ gə goo gel-bɔje lə dee ləm, gə goo njémeekəije lə bɔ deeje-je ləm tɔ, deḛ tura diŋgamje kára-kára lai, un kudee dɔ deḛ gə́ ra ləb rɔ-joo gə́ tar, gə́ d’askəm kaw loo rɔ’g lé to: 23 bula lə diŋgamje lai gə́ to gə́ ginkoji Simeo̰je gə́ deḛ tura dee lé d’aḭ tɔl-dɔg-loo rɔ-mi giree-jinaikara gə dəa tɔl-munda (59.300).
24 Deḛ ndaŋg ri ŋgalə Gad, gə goo gel-bɔje lə dee ləm, gə goo njémeekəije lə bɔ deeje-je ləm tɔ, tura ne diŋgamje kára-kára lai, un kudee dɔ deḛ gə́ ra ləb rɔ-joo’g gə́ tar, gə́ d’askəm kaw loo rɔ’g lé to: 25 bula lə diŋgamje lai gə́ to gə́ ginkoji Gadje’d gə́ deḛ tura dee lé aḭ tɔl-dɔg-loo rɔ-sɔ giree-mi gə dɔ dee tɔl-misa̰ gə dəa rɔ-mi (45.650).
26 Deḛ ndaŋg ri ŋgalə Juda, gə goo gel-bɔje lə dee ləm, gə goo njémeekəije lə bɔ deeje-je ləm tɔ, tura dee ne kára-kára lai, un kudee dɔ deḛ gə́ ra ləb rɔ-joo gə́ tar, gə́ d’askəm kaw loo rɔ’g lé to: 27 bula lə diŋgamje gə́ to gə́ ginkoji Judaje’d gə́ deḛ tura dee lé aḭ tɔl-dɔg-loo rɔ-siri giree-sɔ gə dəa tɔl-misa̰ (74.600).
28 Deḛ ndaŋg ri ŋgalə Isakar gə goo gel-bɔje lə dee ləm, gə goo njémeekəije lə bɔ deeje-je ləm tɔ, tura dee ne kára-kára lai, un kudee dɔ deḛ gə́ ra ləb rɔ-joo gə́ tar, gə́ d’askəm kaw loo rɔ’g lé to: 29 bula lə diŋgamje gə́ to gə́ ginkoji Isakarje gə́ deḛ tura dee lé aḭ tɔl-dɔg loo rɔ-mi giree-sɔ gə dəa tɔl-sɔ (54.400).
30 Deḛ ndaŋg ri ŋgalə Jabulo̰, gə goo njémeekəije lə dee ləm, gə goo njémeekəije lə bɔ deeje-je ləm tɔ, tura dee ne kára-kára lai, un kudee dɔ deḛ gə́ ra ləb rɔ-joo gə́ tar, gə́ d’askəm kaw loo rɔ’g lé to: 31 bula lə diŋgamje lai gə́ to gə́ ginkoji Jabulo̰’d gə́ deḛ tura dee lé aḭ tɔl-dɔg-loo rɔ-mi giree-siri gə dəa tɔl-sɔ (57.400).
32 Mbuna ŋgalə Jisəb’g lé deḛ ndaŋg ri ŋgalə Eprayim gə goo gel-bɔje lə dee ləm, gə goo njémeekəije lə bɔ deeje-je ləm tɔ, tura dee ne kára-kára lai, un kudee dɔ deḛ gə́ ra ləb rɔ-joo gə́ tar, gə́ d’askəm kaw loo rɔ’g lé ya: 33 bula lə diŋgamje gə́ to gə́ ginkoji Eprayimje’d gə́ deḛ tura dee lé aḭ tɔl-dɔg-loo rɔ-sɔ gə dəa tɔl-mi (40.500).
34 Deḛ ndaŋg ri ŋgalə Manasə gə goo gel-bɔje lə dee ləm, gə goo kəije lə bɔ deeje-je ləm tɔ, tura deḛ gə ri dee ri dee, un kudee dɔ deḛ gə́ ra ləb rɔ-joo gə́ tar, deḛ lai gə́ d’askəm kaw loo rɔ’g: 35 bula lə diŋgamje lai gə́ to gə́ ginkoji Manasə’d gə́ deḛ tura dee lé aḭ tɔl-dɔg-loo rɔ-munda giree-joo gə dɔ dee tɔl-joo (32.200).
36 Deḛ ndaŋg ri ŋgalə Bḛjami gə goo gel-bɔje lə dee ləm, gə goo njémeekəije lə bɔ deeje-je ləm tɔ, tura dee ne kára-kára lai, un kudee dɔ deḛ gə́ ra ləb rɔ-joo gə́ tar, gə́ d’askəm kaw loo rɔ’g lé to: 37 bula lə diŋgamje lai gə́ to gə́ ginkoji Bḛjami’d gə́ deḛ tura dee lé aḭ tɔl-dɔg-loo rɔ-munda giree-mi gə dɔ dee tɔl-sɔ (35.400).
38 Deḛ ndaŋg ri ŋgalə Dan gə goo gel-bɔje lə dee ləm, gə goo njémeekəije lə bɔ deeje-je ləm tɔ, tura dee ne kára-kára lai, un kudee dɔ deḛ gə́ ra ləb rɔ-joo gə́ tar gə́ d’askəm kaw loo rɔ’g lé to: 39 bula lə diŋgamje lai gə́ to ginkoji Dan gə́ deḛ tura dee lé aḭ tɔl-dɔg-loo rɔ-misa̰ giree-joo gə dɔ dee tɔl-siri (62.700).
40 Deḛ ndaŋg ri ŋgalə Aser gə goo gel-bɔje lə dee ləm, gə goo njémeekəije lə bɔ deeje-je ləm tɔ, tura dee ne kára-kára lai, un kudee dɔ deḛ gə́ ra ləb rɔ-joo gə́ tar, gə́ d’askəm kaw loo rɔ’g lé ya: 41 bula lə diŋgamje gə́ to gə́ ginkoji Aser’d gə́ deḛ tura dee lé aḭ tɔl-dɔg-loo rɔ-sɔ giree-kára gə dɔ dee tɔl-mi (41.500).
42 Deḛ ndaŋg ri ŋgalə Neptali gə goo gel-bɔje lə dee ləm, gə goo njémeekəije lə bɔ deeje-je ləm tɔ, tura dee ne kára-kára lai, un kudee dɔ deḛ gə́ ra ləb rɔ-joo gə́ tar gə́ d’askəm kaw loo rɔ’g lé to: 43 bula lə diŋgamje gə́ to gə́ ginkoji’g lə Neptali gə́ deḛ tura dee lé aḭ tɔl-dɔg-loo rɔ-mi giree-munda gə dɔ dee tɔl-sɔ (53.400).
44 Yee ɓa to bula lə deḛ gə́ Moyis gə Aaro̰ gə ŋgan-mbaije lə Israɛlje gə́ dɔg-gir-dee-joo tura dee lé tɔ, dəw kára wɔji dɔ njémeekəije lə bɔ deeje-je kára-kára. 45 Ŋgan Israɛlje lai gə́ deḛ tura dee gə goo njémeekəije lə bɔ deeje-je lé, un kudee dɔ deḛ gə́ ra ləb rɔ-joo’d gə́ tar, gə́ to Israɛlje gə́ d’askəm kaw loo rɔ’g lé 46 to dəwje tɔl-dɔg-loo-tɔl-misa̰ giree-munda gə dɔ dee tɔl-mi gə rɔ-mi (603.550).
47 Ləbije, gə goo ginkoji lə bɔ deeje-je lé deḛ tura dee sə dee el. 48 Njesigənea̰ ula Moyis pana: 49 I a tura bula lə ginkoji Ləbije el ləm, i a tura dee kára kara mbuna Israɛlje’g el ləm tɔ. 50 Kəi-surum lə Ala gə́ ka̰ kɔrgoota ləm, gə nékulaje gə́ mée’g ləma, gə néje lai gə́ wɔji dəa ləm tɔ lé maji kari ar Ləbije tɔs kəm dee dɔ’g bao-bao. D’a kodo kəi-kubu lé ləm, gə nékulaje gə́ mée’g lai ləm, d’a ra kula keneŋ ləma, d’a si gugu dɔ kəi-kubu neelé sub ləm tɔ. 51 Loo gə́ d’a gə kḭ kaw gə kəi-kubu lé loo gə́ raŋg’d ndá Ləbije ɓa d’a tɔr kaw ne ya, loo gə́ d’a gə ra kəi-kubu lə Ala keneŋ ndá Ləbije ɓa d’a la tar ya ləm tɔ, dəw gə́ gelee ɓəd ɓa tibi mbɔree ndá d’a tɔlee gə́ tɔl ya. 52 Israɛlje lé nana kara a si loo-siée’g-siee’g ləm, a si mbɔr nékɔr ginee’g-ginee’g ləm tɔ, gə kudu dee kudu dee ya. 53 Nɛ Ləbije lé ya ba ɓa d’a si gugu dɔ kəi-kubu gə́ ka̰ kɔrgoota lé, gə mba kar oŋg ləm ḭ səm pu dɔ koso-dəwje’g lə Israɛlje lé el ndá Ləbije d’a kaḭ ŋgaŋ kəi-kubu gə́ ka̰ kɔrgoota lé kɔr-kɔr ya.
54 Néje lai gə́ Njesigənea̰ un ndia dɔ’g ar Moyis lé Israɛlje ra d’aree ɔr rɔd ya.
© Ngambai Bible © Alliance Biblique du Tchad 1989, 2015.
