Meekɔr jol-jol gə́ to gə no̰
1 Maji kar sí pidije Njesigənea̰
Mbata yeḛ lé maji dum,
Mbata meekɔrjol ləa lé to saar-saar gə no̰.
2 Pidije Ala gə́ to njekur dɔ magəje’g lai lé
Mbata meekɔrjol ləa lé to saar-saar gə no̰.
3 Pidije Mbaidɔmbaije gə́ to njekur dɔ mbaije’g lai,
Mbata meekɔrjol ləa lé to saar-saar gə no̰.
4 Yeḛ nja kára ba ra nédumkooje gə́ d’al dɔ loo sula
Mbata meekɔrjol ləa lé to saar-saar gə no̰.
5 Yeḛ gə́ to njera dara gə goo gosonégər lé
Mbata meekɔrjol ləa lé to saar-saar gə no̰.
6 Yeḛ gə́ to njeyal naŋg dɔ manje’g lé
Mbata meekɔrjol ləa lé to saar-saar gə no̰
7 Yeḛ gə́ to njera néndogóje gə́ boo-boo lé
Mbata meekɔrjol ləa lé to saar-saar gə no̰.
8 Kàr gə mba karee o̰ ɓee dɔ lookàr’g lé
Mbata meekɔrjol ləa lé to saar-saar gə no̰.
9 Gə naḭ gə kéréméje gə mba kar dee d’o̰ ɓee dɔ loondul’g lé
Mbata meekɔrjol ləa lé to saar-saar gə no̰.
10 Yeḛ gə́ to njekunda ŋgandər njé
Gə́ Ejiptə’g vaga-vaga tɔl dee lé
Mbata meekɔrjol ləa lé to saar-saar gə no̰.
11 Yeḛ ar Israɛlje d’unda loo mbuna dee’g teḛ
Mbata meekɔrjol ləa lé to saar-saar gə no̰.
12 Gə goo ji siŋgamoŋ ləa gə́ ɓar mèr-mèr ləm,
Gə kag jia gə́ yeḛ ula ndiŋ ləm tɔ lé
Mbata meekɔrjol ləa lé to saar-saar gə no̰.
13 Yeḛ gə́ to njekunda baa-boo gə́ ria lə Baa-Kas gaŋg dana loo joo lé
Mbata meekɔrjol ləa lé to saar-saar gə no̰.
14 Ar Israɛlje dəs mbuna’g dana lé
Mbata meekɔrjol ləa lé to saar-saar gə no̰.
15 Ar Parao̰ gə njérɔje ləa ɓugu ne dan baa-boo gə́ ria lə Baa-Kas’g neelé wɔlɔg ya,
Mbata meekɔrjol ləa lé to saar-saar gə no̰.
16 Yeḛ nja ɔr no̰ koso-dəwje ləa dɔdilaloo’g lé
Mbata meekɔrjol ləa lé to saar-saar gə no̰.
17 Mbaije gə́ boo-boo lé yeḛ kunda dee
Mbata meekɔrjol ləa lé to saar-saar gə no̰.
18 Mbaije gə́ to njésiŋgamoŋje lé yeḛ tɔl dee
Mbata meekɔrjol ləa lé to saar-saar gə no̰.
19 Siho̰ gə́ to mbai lə Amɔrje lé
Mbata meekɔrjol ləa lé to saar-saar gə no̰.
20 Gə Ɔg mbai gə́ Basan lé
Mbata meekɔrjol ləa lé to saar-saar gə no̰.
21 Ar ɓee lə dee to nénduba ya
Mbata meekɔrjol ləa lé to saar-saar gə no̰.
22 To nénduba lə Israɛlje gə́ to kuraje ləa
Mbata meekɔrjol ləa lé to saar-saar gə no̰.
23 Yeḛ ar mée olé teḛ dɔ sí’g loo gə́ d’ula sul dɔ sí’g
Mbata meekɔrjol ləa lé to saar-saar gə no̰.
24 Yeḛ ɔr sí ji njékula kəm sí ndooje’g
Mbata meekɔrjol ləa lé to saar-saar gə no̰.
25 Néje lai gə́ d’aw kəmba lé
Yeḛ nja ar dee nésɔ dee
Mbata meekɔrjol ləa lé to saar-saar gə no̰.
26 Pidije Ala gə́ to mbai dɔ dara lé
Mbata meekɔrjol ləa lé to saar-saar gə no̰.
© Ngambai Bible © Alliance Biblique du Tchad 1989, 2015.
