Mbɔr Ala’g lé loo ɓəl godo keneŋ
1 Pakɔs lə Dabid gə́ ar bao-pa mba karee ɔs sə dee gə goo ta lə Jedutun lé.
2 Oiyo, loo si lɔm ləm lé
To mbɔr Ala’g lé ya kára ba,
Yeḛ nja ɓa gə́ njegin kajim gə́ m’aji ne.
3 Oiyo, yeḛ lé to biri mbal ləm
Gə njegin kaji ləm ya ləm tɔ.
Yeḛ to njo̰loo-kula-dɔ ləm gə́ to tar sab,
Bèe ɓa né a yə ne ŋgiram yaa̰ el.
4 See ndɔ gə́ ra ɓa seḭ a kəwje kḭ kɔmje na̰ dɔ dəw’g lé wa.
See ndɔ gə́ ra ɓa seḭ lai a kəwje kḭ saŋgje loo mbata kṵdáje
Kareje to asəna gə ndògo-bɔrɔ gə́ to podé lé
Esé asəna gə ŋgalaŋ gə́ unda naŋg bèe lé wa.
5 D’ɔm meḛ dee na̰’d téréré
Gə mba kɔs dəw neelé gə́ loo-siée to tar sab karee oso tuji ne,
D’al rɔ dee dɔ taŋgɔm’g,
Dɔ ta dee ɓa ndutɔr ḭ keneŋ
Nɛ meḛ dee gə́ kəi lé ta ndɔl ɓa teḛ keneŋ tɔ.
6 Oiyo, maji kam m’isi lɔm mbɔr Ala’g lé ya kára ba ɓa
Mbata meekundayel ləm lé ḭ rəa’g ya.
7 Oiyo, yeḛ lé to biri mbal ləm gə njegin kaji ləm ya tɔ.
Yeḛ to njo̰loo-kula-dɔ ləm gə́ to tar sab.
Bèe ndá m’a kunda ndolé nda̰ el.
8 Ala nja kára ba ɓa kaji ləm gə rɔnduba ləm d’ḭ rəa’g.
Biri mbal gə́ to siŋgam ləm, gə njo̰loo-kula-dɔ ləm ləm tɔ lé to rɔ Ala’g lé ya.
9 Seḭ koso-dəwje lé kàr gə́ rara kara
Maji kar sí ɔmje meḛ sí dəa’g,
Tegje ginta gə́ to meḛ sí’g areeje!
Mbata Ala to njo̰loo-kula-dɔ lə sí ya.
10 Oiyo, dəwje lé to né gə́ əḭ el.
Dəwje lé to néŋgɔm to!
Ɓó lé orè dee na̰’d wɔji kwɔi lə dee dɔ nékwɔji-kwɔi lə néje ndá
D’wɔilɔ pélé-pélé unda lel gə́ tó pu bèe ba ya.
11 Undaje meḛ sí dɔ néraje gə́ kərm-kərm’g el ləm,
Undaje meḛ sí yel dɔ né gə́ taa gə buguru’g el ləm tɔ.
Loo gə́ nébaoje un kudu kḭ dɔ maree’d gə́ kédé-kédé ndá
Undaje meḛ sí yel gə́ dɔ’g el.
12 Ala pata gɔl kára ba ya,
Yee gə́ gɔl joo ləa lé m’oo oso mbim’g pana:
Siŋgamoŋ lé to ka̰ Ala nja kára ba.
13 Meemaji kara ḭ rɔi-i Mbaidɔmbaije’g
Mbata i lé uga nana kara gə goo kula rəa-rəa ya .
© Ngambai Bible © Alliance Biblique du Tchad 1989, 2015.
