Ja̰ Njera-batɛm ula kula rɔ Jeju’g
Lug 7.18-351 Loo gə́ Jeju tɔji njékwakiláje gə́ dɔg-gir-dee-joo ta neelé lai mba̰ ndá yeḛ ḭ keneŋ aw mee ɓee-booje’g lə ɓee neelé mba ndoo dəwje ləm, gə ndəji dee ləm tɔ.
2 Ja̰ gə́ si daŋgai’g lé loo gə́ yeḛ oo ta néraje lə Kristi lé ndá yeḛ ula njékwakiláje mba kar dee dəjee pana: 3 See i to yeḛ gə́ a gə ree lé nja, əsé jeḛ j’a ŋgina dəw gə́ raŋg ɓəi wa.
4 Jeju ndigi ta dee’g pana: Maji kar sí awje ulaje Ja̰ né gə́ seḭ ooje gə mbi sí gə kəm sí: 5 njékəmtɔje d’oo loo ləm, njémədje njaa ləm, njéba̰jije rɔ dee ɔr ɓə̰dərə-ɓə̰dərə ləm, njégwɔskuduje d’oo ta ləm, njé gə́ d’wəi d’unda loo teḛ ləma, njéndooje kara d’oo tagə́maji lé ta njékilamberje ləm tɔ . 6 Rɔlel a nai gə yeḛ gə́ oom gə́ dəw gə́ njekun gɔlee karee oso el lé.
Dəw gə́ njekur dɔ Ja̰ Njera-batɛm’g lé godo
7 Loo gə́ d’ḭ loo gə́ nee’g d’ɔd d’aw mba̰ ndá Jeju dəji koso-dəwje ta gə́ wɔji dɔ Ja̰ lé pana: See ɗi ɓa seḭ awje dɔdilaloo’g gə mba kooje wa. See awje gə mba kooje mu-kwaa gə́ lel ula keneŋ aree yə lé wa. 8 See né ɗi ɓa seḭ awje keneŋ gə mba kooje wa. See awje gə mba kooje diŋgam gə́ ula kubu gə́ kura rəa’g wa. Nɛ deḛ gə́ njékula kubuje gə́ kura rɔ dee’gje lé to deḛ gə́ d’isi mee kəije’g lə mbaije ya. 9 See né ɗi ɓa seḭ awje keneŋ mba kooje wa. See awje mba kooje njetegginta wa. To togə́bè ya, ma nja m’ula sí, yeḛ lé ur dɔ njetegginta’g ya, 10 Mbata to yeḛ gə́ maktub pata wɔji ne dəa pana: Aa ooje, m’ula njekaḭkula ləm nɔḭ’g ndá yeḛ a gɔl rəw ləi nɔḭ’g ya . 11 Ta gə́ tɔgərɔ ɓa m’ula sí ya, dəwje gə́ denéje d’oji dee lé dəw kára kara gə́ njekur dɔ Ja̰ Njera-batɛm’g lé godo mbuna dee’g. Nɛ dəw gə́ nai kas ɓeeko̰ gə́ dara lé yeḛ nja kára ba ɓa ur dəa’g. 12 Un kudee mee ndɔ’g lə Ja̰ Njera-batɛm saar ɓasinè lé ɓeeko̰ gə́ dara lé d’aw səa kərm-kərm ar njéra-né-kərmje ɓa taa ɓee neelé ya. 13 Mbata godndu lə njéteggintaje lé deḛ ɓa teḛ gə ginee saar ndəa’g lə Ja̰. 14 Ɓó lé seḭ ndigi taaje ta neelé ndá yeḛ nja to gə́ Eli gə́ a gə ree lé . 15 Nana ɓa mbia to gən mba koo ne ta neelé ndá maji karee oo ne ya.
16 See na̰je ɓa m’a kwa dee kwɔji ne dɔ ginka dəwje gə́ nee wa. To d’asəna gə ŋganje gə́ d’isi loo-nada. Deḛ ɓar ŋgan mar deeje pana: 17 Jeḛ j’im tébé nɛ seḭ làje ne el ləm, jeḛ j’un pa yoo nɛ seḭ no̰je ne el ləm tɔ. 18 Mbata Ja̰ lé ree ndá yeḛ sɔ né njagm el ləm, ai né surum el ləm tɔ ndá deḛ pana: Ndil gə́ yèr to mée’g. 19 Ŋgon-dəw lé ree, yeḛ sɔ né ləm, yeḛ aḭ né ləm tɔ ndá deḛ pana: Yeḛ to njembula nésɔ ləm yeḛ to njḛdi mán-nduú ləm tɔ. Yeḛ ɔr kura gə́ njétaa lar-gədɓeeje ləm, kaiya-dəwje kara yeḛ ɔr sə dee kura ləm tɔ. Kəmkàr lé ŋganeeje ɓa tegginee gə́ raga pai-pai.
Tuji a koso dɔ ɓeeje gə́ reḛ́ dɔ néra gə́ majel’g lé
Lug 10.13-1520 Yen ɓa yeḛ un kudu ndaŋg ɓeeje gə́ yeḛ ra némɔrije bula keneŋ nɛ d’wa ndòo rɔ dee dɔ kaiya’g lə dee el. 21 Ndɔl a koso dɔi’g, i ɓee gə́ Korajḭ! ndɔl a koso dɔi’g, i ɓee gə́ Besayida. Némɔrije gə́ deḛ ra mbuna sí’g lé ɓó lé deḛ ra mee ɓeeje gə́ Tir gə Sido̰ togə́bè ndá d’a kwa ne ndòo rɔ dee si gə kubu-kwa-ndòo ɓa rɔ dee’g ləw ba ŋga ləm, kəm dee a kwa ne kor kor-kor ləm tɔ . 22 Ma nja m’ula sí, ndɔ gaŋg-rəwta lé ta gə́ a kwa dɔ sí lé a kur dɔ ka̰ Tir gə Sido̰’g ya. 23 I ɓee gə́ Kapernawum, see d’a kuni kundai tar dara wa. Wah! D’a rəm səi yəm saar gə́ ɓee lə yoo. Némɔrije gə́ deḛ ra mbuna sí’g, ɓó lé deḛ ra Sɔdɔm ndá saar ɓogənè kara Sɔdɔm a nai keneŋ ɓəi . 24 Ma nja m’ula sí, ndɔ gaŋg-rəwta lé ta gə́ a kwa dɔi a kur dɔ ka̰ Sɔdɔm’g .
Gə́ reeje rɔm’g mba kiŋga loo-kwa-rɔ sí
Lug 10.21-2225 Ndəa neelé Jeju un ta pa pana: Bɔm, ma m’pidii, i gə́ to Mbai dɔ dara ləm, gə Mbai dɔ naŋg nee ləm tɔ mbata néje neelé i iya ne njékəmkàrje gə njégosonégərje kág nɛ i tegginee ar deḛ gə́ nai gə́ ŋganje ba ɓa d’oo. 26 Oiyo, Bɔm, ma m’pidii mbata i ndigi ra togə́bè ya.
27 Néje lai lé i Bɔm ɓa ɔm jim’g. Dəw kára kara gə́ njegər Ŋgon lé gə dɔrea godo nɛ Bɔbee ɓa gəree. Dəw kára kara gə́ njegər Bɔbee lé gə dɔrea kara godo tɔ nɛ Ŋgonee ɓa gəree ləm, dəw gə́ Ŋgonee lé a ria səa dəa gə́ raga ɓa a gəree ləm tɔ .
28 Reeje rɔm’g, seḭ gə́ nékodo gə́ wɔi to dɔ sí’g ar sí daoje ne ɓa m’a kun dɔ sí’g. 29 Ulaje dɔ sí ləm, taaje néməməna̰ ləm ləma, taaje ne ta ləm gə́ m’wɔji sí lé ndaŋgje dɔɓəŋgərə sí’g ləm tɔ mbata ma m’to dəw gə́ kul ləm, m’ula dɔm m’aw yururu ləm tɔ. Togə́bè ɓa seḭ a kiŋgaje loo-kwa-rɔ sí keneŋ . 30 Mbata néməməna̰ ləm lé a kul gwɔb sí’g kwɔji-kwɔji ləm, nékodo ləm kara wɔilɔ pélé-pélé ləm tɔ.
© Ngambai Bible © Alliance Biblique du Tchad 1989, 2015.
