Pa pidi Bao-siŋgamoŋ
1 Pidi Ala lə sí lé to né gə́ kəm ra ləm,
Kila riɓar dəa’g lé to né gə́ maji gə́ kəm ra ləm tɔ.
2 Njesigənea̰ lé tel gɔl Jerusalem aree to lée’g gogo ləm,
Israɛlje gə́ sané kad-kad lé
Yeḛ tel mbo̰ dee dɔ na̰’d keneŋ ya ləm tɔ.
3 Yeḛ aji deḛ gə́ ɓəŋgərə dee ti dus ləm,
Yeḛ tɔ ta dooje lə dee ləm tɔ.
4 Yeḛ tura bula lə kéréméje
Unda ne ri dee kára-kára lai.
5 Mbaidɔmbaije lə sí lé to gə́ boo gə goo bao-siŋgamoŋ ləa ləm,
Gosɔnégər ləa kara rudee godo ləm tɔ.
6 Njesigənea̰ lé to njegəd deḛ gə́ kəm dee to ndòo,
Nɛ njémeeyèrje lé yeḛ rəm sə dee orè dee naŋg més.
7 Ɔsje pa arje Njesigənea̰ reaje ne oiyo ləm,
Ilaje riɓar dɔ Ala’g lə sí gə kṵdu-kagje ya ləm tɔ.
8 Yeḛ ar ndiil taa mee dara pəl-pəl ləm,
Yeḛ wa dɔ gɔl ma̰-ndi
Mbata lə naŋg nee ləma,
Yeḛ ar muje kara d’ḭ ma̰də dɔ mbalje’g ləm tɔ.
9 Nékulje lé yeḛ ar dee nésɔ dee ləm,
Loo gə́ ŋgan ga̰-ga̰je no̰ ndá
Yeḛ ar dee nésɔ dee ya ləm tɔ.
10 Siŋgamoŋ lə kunda ɓa taa kəmee el ləm,
Gɔl dəw kara ar mée lelee el ləm tɔ.
11 Njesigənea̰ lé unda deḛ gə́ ɓəlee
Deḛ gə́ d’unda meḛ dee yel gə́ dɔ meemaji’g ləa lé dan kəmee’g.
12 Seḭ gə́ Jerusalem, maji kar sí ilaje riɓar dɔ Njesigənea̰’g,
Seḭ gə́ Sio̰, pidije Ala lə sí,
13 Mbata yeḛ ar pəgərə tarəwkəije lə sí kiriŋ kiriŋ-kiriŋ ləm,
Yeḛ tɔr ndia dɔ ŋganje síje gə́ d’isi mbuna sí’g ləm tɔ.
14 Yeḛ ar dɔ naŋg ɓee lə sí si dan meelɔm’g ləm,
Yeḛ ar meḛ sí nda̰ tub gə kó néje gə́ maji dum ləm tɔ.
15 Yeḛ ula gə ndukunje ləa dɔ naŋg nee ləm,
Ar ta ləa kara aḭ ne ŋgwɔd kalaŋ ləm.
16 Yeḛ ar ndi ər gə kwɔji gə́ to asəna gə bḭ badə bèe ləm,
Yeḛ ar kul gə́ o̰ yaa̰ lé tel ndá to gə́ bu bèe ləm tɔ.
17 Kwɔji neelé yeḛ rɔ naŋg gə kɔree-kɔree
Ŋga see na̰ ɓa a kaar naŋg gəs no̰ kul’g ləa wa.
18 Yeḛ ula gə ta ləa ndá kwɔji lé léḛ sələlə ləm,
Yeḛ ar lel ləa ula ndá manje d’ula ne ləm tɔ.
19 Ta ləa lé yeḛ riba dəa ar njé’g lə Jakob lé
Godndiaje gə ndukunje ləa lé yeḛ riba dəa ar Israɛlje.
20 Yeḛ ra togə́bè ar ginkoji dəwje gə raŋg lai el,
Deḛ lé gər ndukunje ləa lé el.
Maji kar sí pidije Njesigənea̰ ya.
© Ngambai Bible © Alliance Biblique du Tchad 1989, 2015.
