Jeju lé to njekaar dana gə́ gəd
1 Tɔgərɔ ya, ŋgɔ-njekinjanéməs gə́ rara kara deḛ d’ɔree mbuna dəwje’g mba karee nai gə dəwje rɔ Ala’g, mba karee mbo̰ nénojije gə nékoga-kaiyaje kar Ala. 2 Yeḛ oo loo mba gaŋg no̰ kəm deḛ gə́ to njérəmje ləm, gə deḛ gə́ ndəm ləm tɔ mbata yeḛ kara sí loo rəm’g tɔ. 3 Rəm ləa-yeḛ ɓa aree un ne nékoga kaiyaje ar Ala mbata kaiya ləa-yeḛ ləm, gə ka̰ koso-dəwje lé ləm tɔ .
4 Dəw kára kara as kila riɓar gə́ togə́bè dəa’g gə dɔrea el. Nɛ Ala nja ɓaree ila riɓar dəa’g to gə́ ila ne dɔ Aaro̰’g kédé tɔ . 5 Togə́bè ɓa rɔnduba gə́ wɔji dɔ ŋgɔ-njekinjanéməs lé Kristi kara ula dəa’g gə dɔrea el tɔ. Nɛ yeḛ iŋga rɔ yeḛ gə́ pana:
I to Ŋgonəm, ɓogənè ɓa m’ojii .
6 Loo gə́ raŋg yeḛ pa to pana:
I to njekinjanéməs gə no̰,
Gə goo ka̰ Melkisedek .
7 Jeju lé loo gə́ yeḛ nai gə darəa ɓəi lé, yeḛ ra ndòo gə ndia gə́ boi wəl gə mán-no̰ kəmee’g ləm, yeḛ ra tamaji ta yeḛ gə́ askəm teá ta yoo’g ləm tɔ. Ndá Ala ndigi səa rəgm mbata Jeju nda mée gə bɔbee . 8 Yeḛ to ŋgon mee bɔbee ya nɛ yeḛ kara némeeko̰ gə́ rəa ɓa yeḛ ndoo ne loo kila ne ŋgonkoji dɔ bɔbeeje’g. 9 Yee ɓa, loo gə́ yeḛ to ne dəw gə́ maji ɔr njoroŋ ɓəi ndá yeḛ tel tum ne gin kaji gə́ a to gə no̰ mbata lə deḛ lai gə́ d’ila ŋgonkoji dəa’g lé. 10 Ala nja ɓaree ne ŋgɔ-njekinjanéməs gə goo ka̰ Melkisedek.
11 J’isi gə ta yaa̰ gə́ wɔji dɔ ta neelé, to kədərə mba ndoo sí mbata kəm sí kara inja dɔ’g njaŋg el. 12 Seḭ gə́ sije keneŋ kàr bèe nḛ seḭ asjekəm ndooje mar síje né ləw ba mba̰, nɛ ɓasinè dəw gə́ njetum sə sí kudu né lə Ala gə́ dɔtar ɓa seḭ awje ndée nja tɔɓəi. Mbà kil ɓa seḭ tel awje ndée ɓó muru gə́ kədərə kaw-kaw el . 13 Tɔgərɔ ya nana ɓa gə́ il mbà ɓəi ndá yeḛ gər gin ta gə́ wɔji dɔ meekarabasur el ɓəi mbata yeḛ to gə́ ŋgonkas gə́ ta mbà’g ɓəi. 14 Muru lé wɔji dɔ njé gə́ tɔg gə́ takə̰ji lə dee inja pao gə́ d’askəm kɔr kəmta gə́ wɔji dɔ né gə́ maji gə né gə́ majel lé.
© Ngambai Bible © Alliance Biblique du Tchad 1989, 2015.
