1 Bo̰ néra Samarije a kɔs ta dee’g
Mbata deḛ d’ḭ d’ɔs ta lə Ala lə dee rəw.
D’a kwəi yoo-kiambas ləm,
D’a twa ŋgan deeje kunda dee naŋg vaga-vaga tɔl dee ləma,
Denéje lə dee gə́ d’aw gə kèm lé
D’a riba meḛ dee ŋgərərə-ŋgərərə ləm tɔ.
Ojee ɓar Israɛlje mba kar dee d’ɔs badm tel gə́ rɔ Njesigənea̰’g
2 Ǝi Israɛlje! ɔsje badm telje gə́ rɔ Njesigənea̰ Ala’g lə sí
Mbata néra gə́ kori-korije lə sí ɓa
Seḭ tugaje ne loo osoje ne.
3 Gə́ telje gə́ rɔ Njesigənea̰’g
Tɔrje ndu sí areeje
Uláje pajena:
Maji kari ar məəi ti mbidi dɔ néra kori-korije’g lə sí lai
Wa sí gə́ rɔi’g ɓó ɔs sí rəw el!
J’a kula rɔnduba dɔi’g gə ta gə́ teḛ ta sí’g
Yee ɓa maji unda kar sí j’injaje bɔ maŋgje ɓa gə́ nékinjaməs j’arije ya.
4 Asirije d’a kaji sí el ləm,
Kunda-kaw-rɔje lé j’a kuba dee el ləma,
Néje gə́ jeḛ n’raje gə ji sí lé kara
J’a kula dee pana:
Deḛ to gə́ Ala lə sí bèe el ləm tɔ.
Mbata I ɓa to gə́ njekookəmto̰doo lə ŋgonal ya.
5 Njesigənea̰ pa togə́bè pana:
M’a gɔl dee dɔ rəmje’g lə dee ləm,
M’a kunda dee dan kəm’g
Gə meenda kɔr jol-jol ləm tɔ,
Mbata oŋg ləm gə́ ḭ səm pu dɔ dee’g lé
Wəi bèm mba̰.
6 M’a to kasəna gə mán-tàl bèe
Mbata lə ɓee gə́ Israɛl ləm,
Yeḛ a nduba rəa to gə́ pudu nduja bèe ləma,
Yeḛ a kula ŋgirá naŋg to gə́ kagje gə́ Liba̰ bèe ləm tɔ.
7 Barkəmeeje d’a tɔ kalè,
Boo-ronduba ləa a to kasəna gə boo-ronduba lə kag-koiyo ləm,
Baḭyee a kə̰d sululu asəna gə kagje gə́ Liba̰ bèe ləm tɔ.
8 Dəwje gə́ d’isi ndilee’g lé
D’a tel ree ləm,
D’a ndɔ kó yaa̰ ləm,
D’a kidi pug-pug to gə́ nduú bèe ləma,
Riɓar lə dee a to kasəna gə riɓar lə mán-nduú gə́ Liba̰ bèe ləm tɔ.
9 Seḭ Eprayimje, see ɗi ɓa a raje gə magə-poleje tɔɓəi wa.
Ma nja m’a koo tamaji lə Eprayimje ləm,
M’a kaa dɔ dee ləm tɔ,
M’a to kasəna gə kag-siprɛs gə́ kamee ndòlé el mbata lə dee bèe.
Seḭ a kiŋgaje kandə sí rɔm ma’g ya.
10 Yeḛ gə́ to njekəmkàr lé
Ndá maji karee unda kəmkàr dɔ rəa’g dɔ néje’g neelé ləm,
Yeḛ gə́ to njegosonégər lé
Ndá maji karee gər ginee ləm tɔ!
Mbata kila-rəwje lə Njesigənea̰ lé
To kila-rəwje gə́ danasur ya,
Njémeekarabasurje d’a njaa keneŋ,
Nɛ njékaltaje ɓa d’a tuga loo koso keneŋ.
© Ngambai Bible © Alliance Biblique du Tchad 1989, 2015.
