1 Mee naḭ gə́ njekɔm’g siri lé Ismael, ŋgolə Netania gə́ to ŋgolə Elisama, gə́ ginkojee to gə́ mbai lé ree gə dəwje lə mbai gə́ boo-boo ləm, gə dəwje dɔg ləm tɔ rɔ Gedalia’g, ŋgolə Ahikam mee ɓee gə́ Mispa. Lée neelé d’usɔ né keneŋ na̰’d mee ɓee gə́ Mispa . 2 Yen ŋga Ismael, ŋgolə Netania uba naŋg ḭta gə dəwje gə́ dɔg gə́ danee lé ndá deḛ tɔs Gedalia, ŋgolə Ahikam gə́ to ŋgolə Sapan lé gə kiambas kib-kib tɔlee. Yee ɓa yeḛ tɔl ne dəw gə́ mbai gə́ Babilɔn undá gə́ njeguburuɓee lé. 3 Tɔɓəi Ismael tɔl Judaje lai gə́ d’isi mbɔr Gedalia’g mee ɓee gə́ Mispa lé ləm, gə Kaldeje gə́ to njérɔje gə́ d’isi lée’g neelé ləm tɔ.
Ismaelje tɔl njékaw mbáje rɔ-jinaijoo
4 Ndɔ gə́ njekɔm’g joo goo tɔl gə́ yeḛ tɔl ne Gedalia loo gə́ dəw kára kara oo taree el ɓəi lé ndá 5 dəwje rɔ-jinaijoo gə́ d’ḭ Sikem, gə Silo, gə Samari ree, deḛ neelé ndisa mbaita dee ləm, kubuje lə dee ŋgisi ləma, deḛ tḭja rɔ dee pədərə-pədərə ləm tɔ. Deḛ ree gə nékarje gə néje gə́ ə̰də sululu mba kaw ne mee kəi’g lə Njesigənea̰. 6 Ismael, ŋgolə Netania ḭ Mispa unda loo teḛ aw tila kəm dee gə mán-no̰ kəmee’g. Loo gə́ yeḛ iŋga dee ndá yeḛ ula dee pana: Gə́ reeje rɔ Gedalia’g, ŋgolə Ahikam.
7 Loo gə́ deḛ teḛ dan mee ɓee-boo’g dana bab ndá Ismael, ŋgolə Netania tḭja gwɔs dee ar dəwje gə́ d’aw səa la səa mba kɔm dee mee bwa-mán’g. 8 Nɛ dəwje dɔg mbuna dee’g lé d’ula Ismael pana: Maji kari tɔl sí el mbata nḛ́gəmrɔje gə́ to kó-wa, gə kó-ɔrj, gə ubu, gə ubu-tḛji lé jeḛ j’iya mee wala’g.
Yen ŋga yeḛ ya̰ dee ɓó tɔl dee gə ŋgako̰ deeje lé na̰’d el. 9 Nin dəwje gə́ Ismael tɔl dee mbɔr Gedalia’g lé yeḛ ɔm dee bwa-mán gə́ mbai Asa ur loo gə́ yeḛ ɓəl Baesa, mbai gə́ Israɛl lé, to mee bwa-mán’g neelé ɓa Ismael, ŋgolə Netania ɔm nin dee keneŋ aree rusu tub ya.
10 Dəwje lai gə́ nai Mispa lé Ismael wa dee daŋgai, ŋgalə mbai gə́ ma̰də ləm, gə njé gə́ mbuna koso-dəwje lai gə́ nai mee ɓee gə́ Mispa, deḛ gə́ Nebujaradan, mbai dɔ njéŋgəmlooje ɔm dee ji Gedalia’g, ŋgolə Ahikam ləm tɔ. Ismael, ŋgolə Netania wa dee ɓər aw sə dee mba dəs ne mee ɓee’g lə Amo̰je.
11 Jokana, ŋgolə Karea gə mbai dɔ kudu-njérɔje lai gə́ d’isi səa lé d’oo sor némajelje lai gə́ Ismael, ŋgolə Netania ra lé. 12 Yen ɓa deḛ mbo̰ dəwje lai d’aw mba rɔ gə Ismael, ŋgolə Netania. Deḛ d’iŋgá mbɔr duu-manje gə́ boo gə́ to Gabao̰. 13 Loo gə́ koso-dəwje lai gə́ d’aw gə Ismael lé d’oo Jokana, ŋgolə Karea gə kudu ɓée njérɔje lai gə́ d’aw səa lé ndá rɔ dee lel dee, 14 tɔɓəi koso-dəwje lai gə́ Ismael ḭ sə dee Mispa aw sə dee lé d’ɔs tel ree d’ɔm gel Jokana, ŋgolə Karea’g. 15 Nɛ Ismael, ŋgolə Netania aḭ gə dəwje jinaijoo no̰ Jokana’g ndá aw ɓee lə Amo̰je.
16 Jokana, ŋgolə Karea gə mbai dɔ kudu-njérɔje lai gə́ d’aw səa lé taa ges koso-dəwje lai gə́ nai ji Ismael’g, ŋgolə Netania, deḛ gə́ yeḛ ɔr dee Mispa aw sə dee lé goo tɔl gə́ yeḛ tɔl Gedalia, ŋgolə Ahikam’g lé. Jokana ar diŋgamje gə́ to njérɔje, gə denéje, gə ŋganje, gə njékaa dɔ néje d’ḭ Gabao̰ tel ree səa. 17 Deḛ njaa saar d’aw d’aar naŋg ta Kəi-to-mbàje gə́ to Kimham mbɔr Betlehem’g dəb ɓa gə mba sa rɔ dee kaw Ejiptə gə́ əw gə Kaldeje mbata 18 deḛ ɓəl mbata Ismael, ŋgolə Netania tɔl Gedalia, ŋgolə Ahikam gə́ mbai gə́ Babilɔn undá gə́ njeguburuɓee lé.
© Ngambai Bible © Alliance Biblique du Tchad 1989, 2015.
