TA GƎ NJESIGƎNEA̰ TEL ILA JOB’G
1 Njesigənea̰ tel gə ta dəji Jɔb dan lel-boo’g pana:
2 See na̰ ɓa saŋg loo mba kar loondul dəb dɔ néje’d gə́ m’wɔji mba̰ lé
Gə tapeaje gə́ lal gosonégər lé wa.
3 Maji kari ɔm mina wuri’g asəna gə́ dəw gə́ diŋgam,
Ma gə dəjii ta ndá i a kɔr gelee kam.
Ala to mbai dɔ nékundaje gə́ to ndiŋ
4 See loo gə́ m’tum gin naŋg lé i si ra wa.
Ɓó lé i to gə́ njegosonégər ndá ulam.
5 See i gər njekwɔji ŋgaŋgee wa.
Esé see na̰ ɓa gə́ njekwɔjee gə kúla wa.
6 See ɗi ɓa gəd gelee dɔ’g wa.
Esé see na̰ ɓa un pil mbal kunda dɔkumee gədee ne
7 Mee ndəa gə́ kéréméje gə́ gə ndɔ nduba rɔ dee gə pa kalrɔ ləm,
Kuraje lə Ala gə́ dara d’ɔr ndu dee gə́ tar wəl gə rɔlel ləm tɔ lé wa.
8 See na̰ ɓa udu ta baa-boo-kad gə tabidi
Loo gə́ yee unda loo mee naŋg’d teḛ ləm ,
9 Loo gə́ ma m’ar kil-lə-ndi ɓa to kubu ləa ləm,
M’ar loo gə́ ndul njudu-njudu to gə́ kubu ɓiree ləm,
10 Loo gə́ ma m’unda godndum dəa’g ləm,
Gə m’wɔji ŋgaŋgee ləm, gə m’ula kɔgərɔ gə́ tarəbeeje’g ləm,
11 Gə loo gə́ ma m’ulá m’pana: Yee a ree saar kunda ŋgaŋgee nee ɓó
Yee a dəs kaw raŋg el ləma,
Lée neelé tuŋga poŋgm-poŋgm lə paŋgəm manee a kaar naŋg nee ləm tɔ lé wa.
12 Un kudee gə́ i si ne kəmba lé see i ɓa un ndui ar loo gə́ gə ndɔ wa
See i ɓa ar loo kuba lə kàr gər loo ləa
13 Gə mba karee un ŋgaŋ naŋg nee lad
Gə mba yə ne njémeeyèrje ləm,
14 Gə mba kar naŋg tel to asəna gə a̰ji gə́ unda nétorjia dɔ’g ləm,
Gə mba karee ɗɔi rəa to gə́ kubu bèe ləm,
15 Gə mba kɔg njémeeyèrje lookàr lə dee ləma,
Gə mba təd kagji-dəw gə́ un gə́ tar ləm tɔ lé wa.
16 See i aw saar teḛ kəm-rəw-kaḭ’g lə baa-boo-kad wa.
See i njaa ɓuleje gə́ uru’g wa.
17 See tarəwkɔgje lə yoo to tag ari oo wa.
See i oo tarəwkɔg lə ndil yoo wa.
18 See kəmi un tad lə naŋg nee lad wa.
Ɓó lé i oo néje ne lai ya ndá ulam.
19 See rəw gə́ ra ɓa dəw a kun mba teḛ ne loo gə́ lookàr si keneŋ wa.
See loondulje lé loo-si dee to par gə́ ra wa.
20 See i askəm kwa dee ŋgaŋ loo’g lə dee
Gə mba gər kila rəw gə́ aw gə́ loo-si dee’g wa.
21 I ɓa yḛ̀ i gər gao ya mbata d’oji kédé mba̰ ləm,
Ndɔje ləi kara bula ləm tɔ!
22 See i aw saar teḛ loo gə́ kwɔji mbo̰ na̰ keneŋ wa.
See i oo loo-ŋgəm ndi kwɔji
23 Gə́ ma m’ŋgəm ɓəd gə mba ndɔ nékəmndoo ləm,
Gə mba ndɔ rɔ gə́ rɔ na̰ ləm tɔ wa.
24 See rəw gə́ ra ɓa lookàr kai ne rəa ləm,
Lel gə́ ḭ bər ula ne dɔ naŋg nee ləm tɔ wa.
25 See na̰ ɓa wɔji loo-kaw lə ndi ləm,
Gə wɔji rəw tel ləa gə ndaŋg ləa ləm tɔ
26 Gə mba kar ndi ər ne ndɔ naŋg gə́ dəwje d’isi keneŋ el ləm,
Gə dɔdilaloo gə́ dəw kára kara godo keneŋ ləm tɔ
27 Gə mba karee yɔm looje gə́ wa ŋgɔ njag-njag gə́ tudu kurum-kurum ləm,
Gə mba kar muje d’uba d’ḭ ma̰də keneŋ ləm tɔ lé wa.
28 See ndi lé bɔbeeje si keneŋ wa.
See na̰ ɓa oji ma̰-tàlje ar dee ndəi ɗəŋ-ɗeŋ wa.
29 See mán gə́ kul gə́ ɓi lé na̰ ɓa to kea̰je wa.
Mum gə́ ndá gə́ ḭ dara lé na̰ ɓa ojee wa.
30 Manje tel kədərə to gə́ kɔr mbal bèe ləm,
Loo gə́ kul o̰ yaa̰ ndá kula lə ɓul mán to ndiŋ ləm tɔ.
31 See i askəm tɔ kéréméje gə́ ri dee lə Ŋgama̰dje-gə́-siri
Esé tudu né gə́ wa kéréméje gə́ ri dee lə Bisi-tɔb-talje lé wa .
32 Dujeje gə́ wɔji dɔ naḭ-naḭ lé see i askəm kar dee teḛ ləm,
I askəm kɔr no̰ kéréméje gə́ ɓar dee Ŋgawgel gə́ boo gə ŋganeeje na̰’d ləm tɔ wa.
33 See i gər godnduje gə́ wɔji dɔ boo-néje gə́ dara lé wa.
See i ɓa gɔl kula ra deeje gə́ wɔji dɔ naŋg nee wa.
34 See i ɔr ndui gə́ tar saar teḛ ne loo-kil-lə-ndi’g
Ɓar ne kəm-rəw-manje gə́ rɔi’g wa.
35 See i ila tèlje lə ndi tar wa. See d’ɔd d’aw wa.
See dee d’ulai pana: Yḛ̀ j’aar nee wa.
36 See na̰ ɓa ila kəmkàr mee yèl-ŋgala-mán’g wa.
Esé na̰ ɓa gə́ njekar gosonégər to dan takə̰ji’g lə kona-kṵja wa.
37 See na̰ ɓa gə goo kəmkàr ləa askəm tura kilje-lə-ndi
Gə mba mbél mán dɔ naŋg nee ləm,
38 Gə mba kar babur aḭ iŋga na̰ ləma,
Gə mba kar kɔr naŋgje tia̰ rɔ na̰’d ləm tɔ wa.
Yeḛ to mbai dɔ daje
39 See i aw ndo̰ wa né mbata lə ko̰ toboḭ wa.
See i gaŋg ɓó lə ŋgan toboḭje wa.
40 Loo gə́ deḛ to naŋg loo-to dee’g ləm,
Loo gə́ d’um loo-kum’g lə dee ləm tɔ wa.
41 See na̰ ɓa gə́ njekwa dɔ nésɔje lə ga̰-ga̰
Loo gə́ ŋganeeje no̰ gə́ rɔ Ala’g lé ləm,
Loo gə́ deḛ d’ila rima-rima lal nésɔ dee ləm tɔ wa.
© Ngambai Bible © Alliance Biblique du Tchad 1989, 2015.
