Rudu ta kila’g lə Jɔb ɓəi
1 Nɛ ɓasinè! ... Deḛ gə́ ləb dee as səm el lé d’undam gə́ nékogo,
Deḛ gə́ kédé ma m’oo bɔ deeje gə́ né el
Ɓa ma mbad kɔm dee mbuna bisije gə́ njékaa dɔ koso-nékulje ləm.
2 Nɛ see ɗi ɓa siŋga ji dee askəm ra kam wa.
Deḛ d’askəm kaw saar ɓuga el.
3 Ɓó gə ndòo ar dee d’əŋ kəŋ-kəŋ ləm,
Deḛ d’aḭ d’aw looje gə́ tudu kurum-kurum
Gə́ dəwje d’uba d’ya̰ ləw ba gə́ wa ŋgɔ njag-njag ləm tɔ.
4 Deḛ tɔr muje gə́ uba mee bèmèje gə́ wala ləm,
Ŋgira samje ɓa gə́ muru ko̰ dee ləm tɔ.
5 Deḛ tuba dee mbuna dəwje’g ləm,
Deḛ turu kii goo dee’g to gə́ njéɓogoje bèe ləm tɔ.
6 Deḛ d’isi wəl-looje gə́ majel’g ləm,
Gə mee bwaje gə́ naŋg gə mbuna mbalje’g ləm tɔ.
7 Ndu no̰ lə dee ɓar mee bèmèje’g ləm,
Deḛ mbo̰ na̰ gel kunje’g ləm tɔ.
8 Deḛ to gə́ mbə-dəwje gə́ d’ə̰ji dee bəḭ-bəḭ
Ndá deḛ tuba dee mee ɓee’g.
9 Nɛ ɓasinè ma m’to nékɔspa lə dee
Gə nékunda kogo lə dee.
10 Deḛ d’oom gə́ né gə́ to kḛji ləm,
Deḛ tel gir dee d’ila d’am ləma,
Deḛ tibi yiro kəm’g ləm tɔ.
11 Mbata Ala ula kəm ndòo ar siŋgam godo,
Bèe ndá né gə́ njekɔg dee loo ra səm némajel lé godo ŋga.
12 Dəwje gə́ majel neelé d’ḭ d’aar dɔ jikɔlm’g d’unda gɔlm gə́ raŋg,
Deḛ d’wa dɔ gɔl rəw mba teḛ ne rɔm’g gə mba tujim ne.
13 Deḛ tuji kila rəw gə́ wɔji dɔm lé
Deḛ ra kula mba karm m’udu ne,
Deḛ lé dəw kára kara a la sə dee el.
14 Deḛ ree gə kəmbolè gə́ ta̰ gə́ tad teḛ ne rɔm’g ləm,
Deḛ ree ɓugu na̰ wɔlɔg dɔm’g ləm tɔ.
15 Ɓəl-boo gugu dɔm sub ləm,
Rɔnduba ləm dəs to gə́ lel bèe ləma,
Si maji ləm dəs to gə́ mum gə́ dəs bèe ləm tɔ.
16 Tɔgərɔ, ɓasinè siŋgam teḛ rɔm’g wudu-wudu,
Ndɔ némeekonje lé d’wam kérég.
17 Loondul lé sɔ siŋgam rug-rug ləm,
Némeeko̰ gə́ aw yɔməm lé əw rəa el ləm tɔ.
18 Néramajel gə́ al dɔ loo sula lé ɓa ar kubu ləm tel majel ne ləm,
Yee tia̰ ne rɔm’g to gə́ kubu ləm gə́ ŋgal yududu bèe ləm tɔ.
19 Ala ɔsm ilam dan bɔrɔ’g
Am m’tel to asəna gə babur əsé bu bèe.
20 Ma m’no̰ m’ɓari nɛ i ilam’g el.
M’ḭ m’aar tar nɛ i un kəmi mbaŋ dɔm’g.
21 I tel ra səm kədərə ləm,
I rɔ səm gə jii gə́ ɓar mèr-mèr ləm tɔ.
22 I unm am m’nar dɔ lel’g ləm,
I tujim pugudu gə kaa lel-boo gə́ ula gigigi ləm tɔ.
23 Mbata ma m’gər gao i unm aw səm loo-yoo’g
Loo-kiŋga-na̰ gə́ wɔji dɔ deḛ lai gə́ d’isi kəmba!
24 Nɛ see yeḛ gə́ a gə tuji lé ula jia ndiŋ el wa.
Esé yeḛ gə́ si dan némeeko̰’g lé see no̰ ɓar njela səa el wa.
25 See ma lé kédé mán-no̰ teḛ kəm’g
Mbata lə yeḛ gə́ né gə́ kədərə teḛ dəa’g el wa.
See m’oo kəmtondoo lə njendoo el wa.
26 Ma lé m’ŋgina si dan maji’g nɛ meeko̰ ɓa ree.
Ma m’unda məəm yel dɔ lookàr’g nɛ loondul ɓa ree tɔ.
27 Meem ndiri njigi-njigi ɓó əw el,
Ndɔ nékəmndooje ubam naŋg bus.
28 M’isi dan loondul’g ɓó m’isi dan lookàr’g el,
Ma m’ḭta loo-mbo̰-dɔ-na̰’g ndá m’no̰ wəl m’ɓar njela səm.
29 M’tel m’to ŋgoko̰ tàlje ləm,
M’to njeboalookaw lə miruje ləm tɔ.
30 Ndarəm pélé tɔr wuyum-wuyum ləm,
Siŋgarɔmje guru rug-rug gə rɔnuŋga ləm tɔ.
31 Kunda ko̰dè ləm tel to nékim gə́ wɔji dɔ no̰ ndòo ləm,
Tébé ləm tɔ ndu no̰ lə njéno̰je ya doŋgɔ ləm tɔ.
© Ngambai Bible © Alliance Biblique du Tchad 1989, 2015.
