Jotam tel to mbai gə́ Juda
2Mb 15.32-381 Jotam lé ləbee as rɔ-joo-giree-mi ɓa yeḛ tel to mbai ndá yeḛ si Jerusalem o̰ ne ɓee as ləb dɔg-giree-misa̰. Kea̰je ria lə Jerusa, ŋgolə Sadɔk. 2 Yeḛ ra né gə́ danasur kəm Njesigənea̰’g aree aw na̰’d béréré gə né gə́ bɔbeeje Ojias ra ya tɔ. Nɛ né kára ba lé yeḛ ila gɔlee kəi’g lə Njesigənea̰ el. Lée togə́bè kara dəwje nai dan néraje gə́ yèr’g gə́ kédé-kédé ya ɓəi.
3 Jotam ra tabidi rəw-kəi gə́ to dɔ maree’g tar gə́ wɔji dɔ kəi’g lə Njesigənea̰, tɔɓəi yeḛ ar dee ra ŋgan kəije yaa̰ dɔ ndògo-bɔrɔje’d gə́ gugu dɔ dɔdərloo lé. 4 Yeḛ unda ɓee-booje dɔ mbal gə́ Juda ləm, yeḛ ra kəi-mbaije gə kəije gə́ duu dɔ loo mee kag kɔr’g ləm tɔ.
5 Yeḛ rɔ gə mbai lə Amo̰je ndá yeḛ dum dɔ dee. Mee ləb gə́ neelé Amo̰je d’aree larnda as nékwɔji kwɔi-lə-né tɔl-dɔg-loo-munda (3.000) ləm, gə kó as nékwɔji kwɔi-lə-né tɔl-dɔg-loo-munda (3.000) ləma, gə kó-ɔrj as nékwɔji kwɔi-lə-né tɔl-dɔg-loo-munda (3.000) ləm tɔ, ndá ləb gə́ njekɔm’g joo gə munda lé deḛ d’uga togə́bè ya tɔ. 6 Jotam tel to njesiŋgamoŋ mbata yeḛ aar njaŋg dɔ rəw kabeeje’g no̰ Njesigənea̰ Ala’g ləa.
7 Ges sorta néraje lə Jotam gə rɔje ləa lai, gə néje lai gə́ yeḛ ra lé ndaŋg taree mee Maktub-sorta néraje’g lə mbaije gə́ Israɛl gə Juda tɔ. 8 Yeḛ ra ləb rɔ-joo-giree-mi ɓa tel to mbai ɓəi ndá yeḛ si Jerusalem o̰ ne ɓee as ləb dɔg-giree-misa̰ ya. 9 Jotam wəi ndá deḛ dubee mee ɓee-boo’g lə Dabid. Bèe ɓa ŋgonee gə́ Ahas o̰ ɓee toree’g tɔ.
© Ngambai Bible © Alliance Biblique du Tchad 1989, 2015.
