Tuji lə Babilɔn lé
1 Tɔɓəi kura gə́ dara kára mbuna deḛ gə́ siri gə́ d’aar gə bai gə́ siri ji dee’g lé ulam ta pana: Maji kari gə́ ree, m’a kari oo rəwta-gaŋg gə́ d’a gə gaŋg dɔ kaiya-dené’g yeḛ gə́ nérea to ɓəl kədm-kədm gə́ si dɔ mán baa-boo’g lé . 2 Yeḛ nja ɓa mbaije gə́ dɔ naŋg nee ra səa kaiya ndá dəwje dɔ naŋg nee d’ai mán-nduú gə́ wɔji dɔ kaiya rəa aree tɔl dee ne tɔ .
3 Ndil unm aw səm dɔdilaloo’g. M’oo dené si gir da-kas’g, da lé ri néndɔlje taa rəa pəl-pəl. Dəa siri ləm, gajee dɔg ləm tɔ . 4 Dené lé ula kubu gə́ ndul piro-piro gə kas njir-njir rəa’g ləm, yeḛ ɗɔi rəa gə larlɔr gə jərje gə́ gad dee to yaa̰ gə mərkwɔjije ləm tɔ. Bai gə́ ra gə larlɔr to jia’g ndá néndɔlje ləm, gə ram néje gə́ naŋg nee gə́ mina̰ jɔmri-jɔmri gə́ wɔji dɔ mɔdkaiya ləa ləm tɔ lé rusu bai lé njḭ-njḭ . 5 Ria gə́ to gə ndəree lé deḛ ndaŋg ŋgo nea̰’g pana: Babilɔn, ɓee-boo, ko̰ njémɔdkaiyaje gə néndɔlje gə́ dɔ naŋg nee. 6 Ma m’oo dené lé, məs deḛ gə́ to gə kəmee ləm, gə ka̰ njékɔrgootaje lə Jeju gə́ d’wəi mbata ləa ləm tɔ tɔl dené lé asəna gə mán-nduú gə́ mḭ gə́ ai. 7 Ndá kura gə́ dara ulam pana: See ban ɓa kaarm wam paḭ wa. N’a kulam ginta lə dené gə́ to gə ndəree ləm, gə ka̰ da gə́ unee gə́ dəaje siri gə gajeeje dɔg lé ləm tɔ. 8 Da gə́ m’ée kédé lé ɓasinè yeḛ godo mba̰. Yeḛ a gə kḭ bwa gə́ suna godo ndá a kaw gə́ loo gə́ tuji pugudu’g. Dəwje gə́ dɔ naŋg nee gə́ ndaŋg ri dee mee maktub kəmə’g un kudee mee ndəa gə́ tum ne gin naŋg saar lé el ndá kaar dee a kwa dee paḭ loo gə́ deḛ d’oo da lé mbata yeḛ si gən nɛ yeḛ sané pa tɔɓəi nai dəb ndá a tel ree ɓəi .
9 Yee neelé ɓa gə́ gosonégər gə́ wɔji dɔ kəmkàr. Dəa gə́ siri lé to mbalje gə́ siri gə́ to loo-si dené lé. 10 Dəaje gə́ siri lé wɔji dɔ mbaije gə́ siri tɔ. Deḛ gə́ mi ɓa tuji mba̰ nɛ ləm, njekɔm dee gə́ misa̰ si gən ɓəi ləma, njekɔm dee gə́ siri lé ree el ɓəi ləm tɔ nɛ loo gə́ a ree ndá a si kuree əw el. 11 Da gə́ kédé si gən nɛ ɓasinè godo lé yee nja ɓa to mbai gə́ njekɔm dee’g jinaijoo ləm, yee to mbuna njé gə́ siri ləma, yeḛ si aw loo gə́ a gə tuji pugudu’g ləm tɔ.
12 Gajeje gə́ dɔg gə́ ma m’oo lé to mbaije gə́ dɔg gə́ d’iŋga ɓeeko̰ lə dee el ɓəi, nɛ d’un ndu dee gə mba kar dee d’isi gə́ mbaije na̰’d gə da lé waga ba . 13 Deḛ d’ɔm meḛ dee na̰’d sad ndá deḛ to dərgel da lé tɔ. 14 D’a rɔ gə Ŋgonbad lé nɛ Ŋgonbad lé a dum dee mbata yeḛ to Mbaidɔmbaije ləm, yeḛ to Mbai gə́ ur dɔ mbai mareeje’g ləm tɔ ndá deḛ gə́ yeḛ ɓar dee ləm, yeḛ ɔr dee unda dee gə kəmee ləma, deḛ to ŋgankojije gə́ nai səa ləm tɔ lé deḛ nja d’a dum dee ya tɔ.
15 Yeḛ ulam pana: Man baa-boo gə́ kaiya-dené si dɔ’g gə́ i oo lé yee nja to koso-dəwje ləm, gə ginka dəwje-dəwje ləma, gə dəwje gə́ tapa dee gə ria-ria ləm tɔ. 16 Gajee dɔg gə́ i oo lé deḛ gə da lé deḛ nja d’a kḛji kaiya-dené lé bəḭ-bəḭ ləm, d’a ti ne kubu rəa’g mbidi-mbidi karee aw gə kudee dum ba ləm, d’a sɔ darəa ləma, d’a rée dula-dula ləm tɔ. 17 Mbata Ala sula dee dan né gə́ yeḛ ɓa wɔji mba kar né gə́ yeḛ nja wɔji lé aw na̰’d kára ba gə ka̰ dee-deḛ ləm, mba kar da lé o̰ ɓee ləm tɔ saar kar ta gə́ Ala pa lé aw lée’g béréré ya.
18 Dené gə́ ma m’ée lé to ɓee-boo gə́ o̰ mbaije gə́ dɔ naŋg nee ya.
© Ngambai Bible © Alliance Biblique du Tchad 1989, 2015.
