1 Josapat wəi ndá deḛ dubee dɔɓar’g lə bɔbeeje-je mee ɓee-boo’g lə Dabid. Ndá ŋgonee Joram ɓa o̰ ɓee toree’g tɔ.
Joram mbai gə́ Juda
2Mb 8.16-242 Joram lé ŋgakea̰je gə́ to ŋgalə Josapat lé d’isi keneŋ’gən, ri dee ɓa nee: Ajaria, Jehiel, Jakari, Ajaria. Mikaɛl gə Sepatia, deḛ lai to ŋgalə Josapat, mbai gə́ Israɛl lé. 3 Bɔbeeje daa dee dege-dege gə nékiŋgaje gə́ to larnda, gə larlɔr, gə néje gə́ gad dee ur kugu ləm, gə ɓee-booje gə́ d’ila ndògo-bɔrɔ gugu ne dɔ deḛ gə́ mee ɓee gə́ Juda ləm tɔ, nɛ yeḛ ya̰ ɓeeko̰ ar Joram mbata yeḛ ɓa to ŋgondəree.
4 Loo gə́ Joram o̰ ɓee tor bɔbeeje’g ləm, loo gə́ siŋga ɓeeko̰ ləa ŋgəŋ ləm tɔ ndá yeḛ tɔl ŋgakea̰je ləm, gə mbaije gə́ Israɛl gə́ d’isi Israɛl mbuna mar deeje’g ləm tɔ gə kiambas. 5 Joram ra ləbee rɔ-munda-giree-joo ɓa yeḛ tel to mbai ndá yeḛ si Jerusalem o̰ ne ɓee as ləbee jinaijoo. 6 Yeḛ un dɔ gɔl mbaije gə́ Israɛl ya lad-lad to gə́ gel-bɔje lə Akab mbata yeḛ taa ŋgolə Akab gə́ dené ləa, bèe ɓa yeḛ ra ne né gə́ majel kəm Njesigənea̰’g tɔ. 7 Nɛ Njesigənea̰ ndigi tuji gel-bɔje lə Dabid el mbata man gə́ yeḛ man rəa aree ləm, gə ndukun gə́ yeḛ un aree gə mba kar ŋgokea to néndogó nea̰’g mbata ləa-yeḛ ləm, gə mbata lə ŋganeeje ləm tɔ, saar gə no̰ lé .
8 Mee ndɔje’g ləa lé Edɔmje d’ḭ d’ɔs godndu ɓeeko̰ lə Juda rəw ndá d’unda mbai lə dee-deḛ ya dɔ dee’g . 9 Joram ḭ gə mbaije ləa gə pusu-rɔje ləa lai loondul’g aw tɔl ne Edɔmje gə́ gugu dəa sub ləm, gə mbai dɔ njépusu-rɔje ləm tɔ. 10 Kɔstarəw gə́ Edɔmje d’oma̰ ne gə godndu ɓeeko̰ lə Juda lé to saar teḛ mee ndəa gən tɔ.
Njé gə́ mee ɓee-boo gə́ Libna kara d’ḭ mee ndəa gən ya tɔ, d’ɔs godndu ɓeeko̰ ləa rəw to mbata Joram lé uba Njesigənea̰ Ala lə bɔbeeje lé ya̰. 11 Joram ra dɔ looje gə́ ndəw dɔ mbalje gə́ Juda, ndá yeḛ ɔs ne dəwje gə́ Jerusalem ɓɔḭ-ɓɔḭ ar dee ra kaiya d’ɔs ne ta lə Ala rəw ləm, yeḛ su ne kəm Judaje ləm tɔ.
12 Deḛ ree gə maktub lə njetegginta Eli d’aree pana: Njesigənea̰, Ala lə bɔbije gə́ Dabid lé pa togə́bè pana: To gə́ i un dɔ gɔl bɔbije Josapat el ləm, i un dɔ gɔl Asa, mbai gə́ Juda el ləm tɔ 13 nɛ i un dɔ gɔl mbaije gə́ Israɛl mbata i ar Judaje gə Jerusalemje ra kaiya d’ɔs ne Ala rəw to gə́ gel-bɔje lə Akab kara ra gə Israɛlje ləm, i tɔl ŋgakɔḭje gə́ maji d’ur dɔi’d gə́ d’oji dee səi ləm tɔ 14 ndá aa oo, Njesigənea̰ a kunda koso-dəwje ləi gə yoo-koso. Ŋganije gə denéje ləi ləm, gə nékiŋgaije lai ləm tɔ, 15 i ndá yeḛ a kundai gə rɔko̰ gə́ to ɓəl ŋgansiḭ’g karee ḭ dɔ maree’d gə́ kédé-kédé saar kar ŋgansiḭje teḛ raga gə goo siŋga lə rɔko̰ lé.
16 Njesigənea̰ ɔs kudu Pilistije gə Arabə gə́ to njéboataɓeeje lə Etiopije mba kar dee rɔ gə Joram. 17 Deḛ d’aw rɔ gə Judaje ndá d’aw mee ɓee’g d’odo nébaoje gə́ to mee kəi’g lə mbai ləm, d’wa ŋganeeje gə́ diŋgam gə denéje ləa ləm tɔ ndá ar Joakas, ŋgonee gə́ ndɔḭ ɓa nai kára ba kiao.
18 Goo néje lai neelé ndá Njesigənea̰ undá gə rɔko̰ ŋgansiiḛ’g, to rɔko̰ gə́ kuma̰ gə́ wɔji dəa godo, 19 Rɔko̰ neelé ḭ dɔ maree’g gə ndɔje kára-kára lai ndá rudu ləb gə́ njekɔm’g joo lé ŋga̰siḭ Joram unda loo teḛ raga gə goo siŋga lə rɔko̰ ləa lé ya. Yeḛ wəi dan rɔko̰ gə́ ulá ndubu yaa̰ ndá koso-dəwje ləa tuu né gə́ ə̰də sululu d’ula ne rɔnduba dəa’g el to gə́ yeḛ ra mbata lə bɔbeeje lé tɔ.
20 Yeḛ ra ləbee rɔ-munda-giree-joo ɓa yeḛ tel to mbai ndá yeḛ si Jerusalem o̰ ne ɓee gə́ Jerusalem ləb jinaijoo. Yeḛ aw lal kar dəw kára kara ndiŋga rəa gə mbata ləa ndá deḛ dubee mee ɓee-boo’g lə Dabid ɓó dubee mee dɔɓar mbaije’g el.
© Ngambai Bible © Alliance Biblique du Tchad 1989, 2015.
