Parao̰ tuba goo Israɛlje
1 Njesigənea̰ ula Moyis pana: 2 Maji kari ula Israɛlje ar dee d’ɔs tel d’un rəw gə́ raŋg mba kisi gir Pi-Hahirot’d gə́ to mbuna Migdɔl’g gə baa-boo gə́ wɔji dɔ Baal-Sepo̰ njoroŋ lé, loo neelé seḭ a síje keneŋ kwaje rɔ sí mbɔr baa-boo’g. 3 Parao̰ a pata kwɔji ne dɔ Israɛlje pana: Deḛ ndəm rəw gə́ ndəm, dɔdilaloo lé o̰ bia̰ dɔ dee’g. 4 Ndá m’a kar mee Parao̰ ndər gə mba karee tuba goo dee, nɛ Parao̰ gə bao-rɔje ləa d’a tel to ne né gə́ a kar rɔnduba ləm kila ne rəa kɔd, bèe ɓa njé gə́ Ejiptə d’a gər ne gao to gə́ ma m’to Njesigənea̰ ya. Ndá Israɛlje ra togə́bè ya.
5 D’ula mbai gə́ Ejiptə d’aree oo to gə́ koso-dəwje neelé d’aḭ gə́ kaḭ. Togə́bè ɓa mee Parao̰ gə meḛ kuraje ləa tel to ɓəd dɔ koso-dəwje’g neelé ar dee pana: See ɗi ɓa neḛ n’raje bèe ɓa n’ya̰je ne Israɛlje n’ar deeje d’uba ne ta kula lə neḛje d’ya̰ d’aw bèe wa. 6 Togə́bè Parao̰ un kúla kunda tɔ pusu-rɔ’g ləa tɔɓəi yeḛ ar njérɔje ləa d’aw səa na̰’d. 7 Ndá yeḛ odo pusu-rɔje gə́ maji dum mareeje as tɔl-misa̰ (600) ləm, gə pusu-rɔje gə́ Ejiptə lai ləm tɔ. Ɓé-njérɔje d’isi mee pusu-rɔje’g kára-kára lai ya. 8 Njesigənea̰ ar mee Parao̰ mbai gə́ Ejiptə ndər ya tɔ ndá yeḛ tuba goo Israɛlje. Njé gə́ Israɛl lé d’unda loo teḛ gə ji dee gə́ ɓar tar mèr-mèr. 9 Njé gə́ Ejiptə tuba goo dee, kundaje lai ləm, gə pusu-rɔje lə Parao̰ ləm, gə njérɔ gə kundaje ləa ləm, gə njérɔje ləa ləm tɔ, deḛ d’iŋga dee loo kisi gə́ d’isi mbɔr baa-boo’g par gə́ Pi-Hahirot gə́ wɔji dɔ Baal-Sepo̰’g njoroŋ lé.
10 Parao̰ unda dɔ dee dəb. Israɛlje lé d’ɔm rəd ndá aa oo, deḛ d’oo njé gə́ Ejiptə gə́ d’aw tuba goo dee lé. Njé gə́ Israɛl lé ɓəl unda dee badə gaŋg dee ar dee no̰ gə́ rɔ Njesigənea̰’g. 11 Deḛ d’ula Moyis pana: See loo-dubu-dəwje godo mee ɓee gə́ Ejiptə ɓa i ree sə sí mba kar sí j’wəije dɔdilaloo’g nee wa. See gə mba ɗi ɓa i ra sə sí né togə́bè ar sí j’undaje ne loo mee ɓee gə́ Ejiptə n’teḛje wa. 12 See ta neelé j’ulaije Ejiptə el wa. Jeḛ m’pajena: Maji kari ya̰ sí ar sí n’raje né j’ar njé gə́ Ejiptə ɓa, mbata ra né kar njé gə́ Ejiptə lé yee ɓa maji yaa̰ unda k’aw kwəi dɔdilaloo’g ya. 13 Moyis ila koso-dəwje keneŋ pana: Ɓəlje el, aarje loo kaar sí’g mba kooje ne kaji lə Njesigənea̰ gə́ yeḛ a gə kaji sí kɔm sí ne tar mee ndɔ gə́ ɓogənè lé, mbata njé gə́ Ejiptə gə́ seḭ oo deeje ɓogənè neelé seḭ a koo deeje gogo el ŋga. 14 Njesigənea̰ a rɔ mbata lə sí, nɛ seḭje lé aarje dɔ mundu.
Ala ra rəw dan baa-boo’g
15 Njesigənea̰ ula Moyis pana: See ban ɓa ila boo ndui naŋg no̰ ɓarəm bèe wa. Ula Israɛlje lé ar dee d’ḭta d’aw. 16 I lé un kag-tɔs ləi gə́ tar, ula jii ndiŋ dɔ mán baa-boo’g lé kaiyee ne dana, bèe ɓa Israɛlje d’a dəs mee baa-boo’g lé loo gə́ tudu kurum-kurum’g ya. 17 Nɛ ma lé m’a gə kar meḛ njé gə́ Ejiptə ndər gə mba kar dee d’andə goo dee’g, togə́bè Parao̰ gə njérɔje ləa lai, gə pusu-rɔje ləa ləm, gə njérɔ gə kundaje ləa ləm tɔ lé d’a kar rɔnduba ləm kila ne rəa kɔd ya. 18 Bèe ɓa njé gə́ Ejiptə lé loo gə́ Parao̰ gə pusu-rɔje ləa, gə njérɔ gə kundaje ləa lé d’a kar rɔnduba ləm kila rəa kɔd ndá d’a gər gao to gə́ ma lé m’to Njesigənea̰ ya.
19 Kura lə Ala gə́ dara gə́ aw no̰ Israɛlje’g lé ḭ keneŋ aw aar goo dee’g gogo, mum gə́ aw ɔr no̰ dee lé kara ḭ par aw goo dee’g gogo tɔ. 20 Mum lé aar loo gə́ dana mbuna njé gə́ Ejiptə’g ləm, gə Israɛlje’g ləm tɔ. Mum neelé debee gə́ kára to loondul nɛ debee gə́ raŋg ndogó loondul’g tɔ. Togə́bè ɓa mee tilee’g neelé kudu dəwje gə́ joo neelé tibi mbɔr na̰ el.
21 Moyis ula jia ndiŋ dɔ mán baa-boo’g. Ndá Njesigənea̰ ar lel-boo ḭ bər ula gigigi-gigigi loondul’g ya saar ar loo àr ndá ɔs ne mán baa-boo gə́ gogo, yeḛ ar rəw-kaw dee gə́ dan baa-boo’g neelé tudu kurum-kurum mbata mán lé kai rəa dana. 22 Israɛlje d’andə mee baa-boo’g lé njaa loo gə́ tudu kurum-kurum’g ləm, mán baa-boo lé tel asəna gə ndògo bèe par gə́ dɔ jikɔl dee’g gə dɔ jigel dee’g ləm tɔ . 23 Njé gə́ Ejiptə lé tuba goo dee ya ɓəi, kundaje lə Parao̰ lai, gə pusu-rɔje ləa, gə njérɔ gə kundaje ləa lé d’andə goo dee’g mee baa-boo’g lé tɔ. 24 Ta lookàr’g dəb ndá, Njesigənea̰ gə́ si dan pər’g gə dan mum’g lé aa loo oo loo-si njé gə́ Ejiptə ndá, yeḛ ra né ar njé gə́ Ejiptə lé d’aw dɔ na̰’d bèe pum-pum loo-si dee’g. 25 Yeḛ tɔr gɔl pusu-rɔje lə dee ar loo kaw gə́ kédé lə dee kədərə ya. Togə́bè njé gə́ Ejiptə pana: Ar sí j’aḭje no̰ Israɛlje’g mbata Njesigənea̰ ɓa aw rɔ sə sí gə mbata lə dee.
26 Njesigənea̰ ula Moyis pana: Ula jii ndiŋ gə dɔ mán baa-boo’g, bèe ɓa mán lé a tel tula dɔ njé gə́ Ejiptə gogo ləm, gə dɔ pusu-rɔje lə dee ləma, gə dɔ njérɔ gə kundaje lə dee ləm tɔ.
27 Moyis ula jia ndiŋ gə́ dɔ mán baa-boo’g. Loo àr yərərə mba̰ ndá mán baa-boo lé tel ula pujuju-pujuju, ndá njé gə́ Ejiptə d’aḭ, loo gə́ mán si jura gə́ dɔ dee’g, nɛ Njesigənea̰ ɓugu njé gə́ Ejiptə dan baa-boo’g wɔlɔg. 28 Manje lé tel o̰ ménéné tur dɔ pusu-rɔje, gə dɔ njérɔ gə kundaje, gə dɔ njérɔje lə Parao̰ lai gə́ d’andə goo Israɛlje’g dan baa-boo’g lé ndá dəw kára kara al ɗiga teḛ raga el. 29 Nɛ Israɛlje njaa loo gə́ tudu kurum-kurum’g ya dan baa-boo’g tɔɓəi mán lé gaŋg ndəŋ aar asəna gə ndògo-bɔrɔ bèe dɔjikɔl dee’g ləm, gə dɔjigel dee’g ləm tɔ.
30 Mee ndəa’g neelé Njesigənea̰ ɔr Israɛlje ji njé gə́ Ejiptə’g ya, tɔɓəi Israɛlje d’oo yoo njé gə́ Ejiptə kaar baa-boo’g. 31 Israɛlje d’oo ji siŋgamoŋ lə Njesigənea̰ gə́ ɓar mèr-mèr gə́ yeḛ ula ndiŋ dɔ njé gə́ Ejiptə’g lé. Togə́bè ɓa koso-dəwje ɓəl ne Njesigənea̰, tɔɓəi deḛ d’ɔm ne meḛ dee dɔ Njesigənea̰’g ləm, gə dɔ Moyis gə́ to kura ləa ləm tɔ.
© Ngambai Bible © Alliance Biblique du Tchad 1989, 2015.
