Sorta gə́ wɔji dɔ néra Israɛlje gə́ ləw
1 Pa lə Asap gə́ ar bao-pa mba karee ɔs sə dee gə goo ka̰ Jedutun lé.
Seḭ koso-dəwje ləm, ooje néje gə́ m’ndoo sí lé ləm,
Tugaje mbi sí ooje ne taje gə́ teḛ tam’g lé ləm tɔ.
2 M’teḛ tam m’pa ne gosotaje ləm,
M’ila mber ta kəmkàr gə́ mee ndəaje gə́ ləw lé ləm tɔ .
3 Né gə́ jeḛ j’oo gə mbi sí ləm,
Né gə́ jeḛ n’gər ləma,
Né gə́ bɔ síje-je d’ɔr gée d’ar sí ləm tɔ lé
4 J’a kiya dəa gə ŋgan deeje el,
Ta pidi Njesigənea̰ ləm,
Gə ta siŋgamoŋ ləa ləma,
Gə néreaje gə́ dumkoo gə́ yeḛ ra ləm tɔ lé
J’a pa taree kar ŋgaka deeje gə́ gogo.
5 Yeḛ unda nékɔrgoota mbuna Jakobje’g ləm,
Yeḛ unda godndia mbuna Israɛlje’g ləm tɔ
Ndá yeḛ un ndia ar bɔ síje-je
Mba kar dee ndoo ŋgan deeje taree,
6 Mba kar ŋgaka deeje gə́ gogo gər
Deḛ gə́ to ŋgan deeje gə́ d’a gə koji dee lé
Mba kar deḛ kara loo gə́ deḛ tɔg mba̰ ndá
D’a ndoo ne ŋgan deeje ya tɔ,
7 Gə mba kar dee d’unda ne meḛ dee dɔ Ala’g lé ləm,
Gə mba kar meḛ dee wəi ne dɔ néraje’g lə Ala el ləma,
Gə mba kar dee tɔs ne kəm dee bao-bao dɔ godndiaje’g lé ləm tɔ
8 Ɓó gə mba kar dee ra ne né to gə́ bɔ deeje-je bèe el,
Mbata deḛ lé to gə́ mbim-oo-ta-elje gə njékɔsta-rəwje ləm,
D’wa meḛ dee kɔgərɔ el ləma,
Deḛ to majikojije lə Ala el ləm tɔ.
9 Eprayimje gə́ d’ɔm nérɔje rɔ dee’g ləm,
Deḛ gə́ rɔ gə ɓandaŋgje rɔ dee’g lé
Deḛ tel gir dee d’ila d’ar njéba̰je ndɔ rɔ’g neelé d’aḭ.
10 D’ila ŋgonkoji dɔ manrɔ’g lə Ala el ləm,
Deḛ mbad njaa gə goo torndia ləm tɔ.
11 D’ar meḛ dee wəi dɔ néreaje’g ləm,
Gə dɔ néreaje gə́ maji dum gə́ yeḛ ar dee d’oo lé ləm tɔ.
12 Yeḛ ra néje gə́ dumkoo
Kəm bɔ deeje-je’g mee ɓee gə́ Ejiptə’g
Gə mee ɓee-boo gə́ Soa̰’g ya .
13 Yeḛ kai baa-boo-kad lé dana ya̰ ne rəw ar dee ləm,
Yeḛ ur manje tar to gə́ ndògo-bɔrɔ bèe ləm tɔ .
14 Yeḛ ɔr no̰ dee dan kàrá gə mum ləm,
Loondul’g kara pər gə́ ndogó jol-jol
Ɓa yeḛ ɔr ne no̰ dee ləm tɔ .
15 Yeḛ ta̰ biri mbalje gə́ dɔdilaloo’g lé dana
Ar dee d’iŋga ne mán-kai gə́ uba tir-tir lé .
16 Biri mbal lé yeḛ ar kəm-rəw-manje teḛ keneŋ tir-tir ləm,
Yeḛ ar mán ula keneŋ tar gɔl-gɔl to gə́ mán baa bèe ləm tɔ.
17 Nɛ deḛ ra kaiya kəm dee gə́ kédé-kédé,
D’ɔs ne ta ləa rəw ləm,
Deḛ d’ḭ koma̰ ne Njekurdɔloo dɔdilaloo’g neelé ya ləm tɔ.
18 Deḛ d’aḭ mee Ala
Dejee ne nésɔ gə́ deḛ ndiŋga lé .
19 Deḛ pata gə́ majel d’ila dɔ Ala’g lé pana:
See Ala askəm ɓar neḛje gə nésɔ dɔdilaloo’g neelé wa.
20 Aa ooje, yeḛ unda biri mbal ar mán ula keneŋ,
Manje gə́ turu tuma̰-tuma̰ taa loo keneŋ yəŋgəm-yəŋgəm.
See yeḛ askəm kar dəwje ləa muru əsé kar dee da ya to wa.
21 Loo gə́ Njesigənea̰ oo ndá mée ḭ səa jugugu
Asəna gə pər gə́ mbudu ɔn dɔ Jakob’g bèe ləm,
Oŋg ḭ səa dɔ Israɛl’g ləm tɔ,
22 Mbata deḛ lé d’ɔm meḛ dee dɔ Ala’g lé el,
Deḛ d’unda meḛ dee dɔ la gə́ yeḛ la ne sə dee el tɔ.
23 Yeḛ un ndia ar kilje lə ndi
Ndá yeḛ ɔr tarəw dara lé ila tag.
24 Yeḛ ar dee muru gə́ ḭ dara
Aree gəḭ dɔ dee’g to gə́ ndi bèe lé
Ndá yeḛ ar dee kó gə́ dara.
25 Deḛ lai d’o̰ muru ko̰ njésiŋgamoŋje ləm,
Yeḛ ula gə nésɔ aree as dee nag-nag ləm tɔ.
26 Yeḛ ar lel ḭ bər ula mee dara’g ləm,
Siŋgamoŋ ləa ɓa yeḛ ar lel ḭ ne kel dɔkɔl ula ne ləm tɔ.
27 Yeḛ ar da gəḭ ɔm dɔ dee’g
Asəna gə nduji naŋg bèe,
Yee ɓa gə́ yelje gə́ bula yaa̰ gə́ gəḭ naŋg
Asəna gə nagəra gə́ ta baa-boo-kadje’g bèe.
28 Yeḛ ar dee toso naŋg dan loo-si dee’g
Gir kəije’g lə deḛ lai.
29 D’usɔ d’ar meḛ dee ndan tub-tub,
Ala ar dee né gə́ deḛ ndiŋga lé.
30 Mal né gə́ meḛ dee’g wəi el ɓəi ləm,
Nésɔ dee kara to ta dee’g bura ya ɓəi ləm tɔ
31 Ndá oŋg lə Ala ḭ ɔm dɔ dee’g,
Yeḛ kunda deḛ gə́ siŋga dee to kɔgərɔ-kɔgərɔ tɔl dee ləm,
Basaje gə́ Israɛl lé yeḛ kunda dee ne mbugu-mbugu ya ləm tɔ.
32 Lé bèe ya kara deḛ d’əw ne rɔ dee ra kaiya el ləm,
D’ɔm meḛ dee dɔ néreaje gə́ dumkoo’g lé el ləm tɔ.
33 Kṵji təa gə́ teḛ lé yeḛ tuji ne ndɔje lə dee ləm,
Né gə́ to ɓəl kədm-kədm teḛ ne dɔ dee’g wai rudu ləbje’g lə dee lé ləm tɔ.
34 Loo gə́ yeḛ unda dee ar yoo tɔl dee ndá
Deḛ tel saŋgee ləm,
Deḛ d’ɔs badm tel ree ne rɔ Ala’g lé ya ləm tɔ.
35 D’ar meḛ dee olé dɔ Ala gə́ to biri mbal lə dee ləm,
Dɔ Ala gə́ to Njekurdɔloo gə́ to njetaa dɔ dee lé ləm tɔ.
36 Nɛ deḛ su kəmee gə ta dee ləm,
Deḛ d’ulá taŋgɔm ya ləm tɔ.
37 Deḛ d’wa meḛ dee kɔgərɔ reḛ́ ne rəa’g rḛ́-rḛ́ el ləm,
D’ila koji dɔ ndu manrɔ’g ləa lé el ləm tɔ.
38 Nɛ lé bèe kara gə goo meekɔrjol ləa ɓa
Yeḛ ar mée ti ne mbidi dɔ néra gə́ kori-kori’g lə dee
Ɓó yeḛ tuji dee ne el:
Ta-ta yeḛ wa goo oŋg ləa sud
Ɓó ya̰ rəa yag dan boo-oŋg’g ləa el.
39 Yeḛ ar mée olé dɔ dee’g to gə́ deḛ to dakasrɔ gə́ kari ba,
Deḛ to d’asəna gə kṵji ta dəw gə́ teḛ pu ndá
Tel ree gogo el lé tɔ.
40 Gɔl bula ndá deḛ d’ḭ d’oma̰ səa dɔdilaloo’g ləm,
Gɔl bula ndá d’ar oŋg ḭ səa dɔ dee’g
Mee looje gə́ tudu kurum-kurum’g ləm tɔ.
41 D’əw rɔ dee kaḭ mee Ala el ləm,
D’əw rɔ dee kar mee Njerɔkunda lə Israɛlje ea̰ lé el ləm tɔ.
42 D’ar meḛ dee wəi dɔ siŋgamoŋ’g ləa lé ləm,
Gə dɔ ndɔ gə́ yeḛ ɔr dee ne ji njeba̰’g lə dee lé ləm tɔ.
43 D’ar meḛ dee wəi dɔ némɔrije
Gə́ yeḛ ra mee ɓee gə́ Ejiptə’g ləm,
Gə dɔ néje gə́ dumkoo
Gə́ yeḛ ra mee ɓee-boo gə́ Soa̰’g lé ləm tɔ.
44 Yeḛ ar mán baaje lə dee tel to məs
Ar dee d’askəm kai manee el ləm ,
45 Yeḛ ula gə kəm mbàje dɔ dee’g ar dee to̰ dee ləma,
Yeḛ ula gə́ kurkuduje dɔ dee’g ar dee tuji néje lə dee ləm tɔ .
46 Yeḛ ula beedéje dɔ koje’g lə dee ləm,
Gə dɔ néje lai gə́ mee ndɔje’g lə dee ləm tɔ .
47 Yeḛ ar ndi kwɔji tuji nduúje lə dee pugudu ləm,
Kag-ɓɔlje lə dee kara ko̰ ndi ɓa tuji ləm tɔ .
48 Yeḛ uba nékulje lə dee ya̰ dee dan ndi kwɔji’g ləm,
Ar pər gə́ dara tɔl koso-nékulje lə dee ləm tɔ.
49 Yeḛ ḭ sə dee gə oŋg ləa gə́ nuŋga kəd-kəd ləm,
Gə boo-oŋg ləa ləm, gə meekḭ jugugu ləa ləma,
Gə néurtije ləa ləm tɔ,
Néje neelé to kudu njékaḭkulaje ləa gə́ wɔji dɔ némeeko̰.
50 Yeḛ ya̰ loo ar oŋg ləa ɓugu dɔ dee’g
Ɓó taa dee ta yoo’g el ləm,
Yeḛ ya̰ dee yag ta yoo-koso’g ləm tɔ.
51 Yeḛ kunda ŋgandər Ejiptəje’g lai vaga-vaga tɔl dee,
Deḛ gə́ to bao-siŋgamoŋje gə́ d’isi mee kəi-kubu’g lə Kam lé .
52 Yeḛ ar koso-dəwje ləa d’unda loo teḛ to gə́ badje bèe ləm,
Yeḛ ɔn dee dɔdilaloo’g to gə́ koso-nékulje bèe ləm tɔ .
53 Yeḛ ɔr no̰ dee gəd-gəd
Ar dee ɓəl né kára kara bèe el
Ndá baa-boo-kad tula dɔ njéba̰je lə dee yal .
54 Yeḛ ree sə dee par gə́ rəw-nim loo’g ləa
Gə́ to gə kəmee doi lé
Par gə́ dɔ mbal gə́ jikɔlee-yeḛ ɓa taa ne gə́ né kea̰ .
55 Yeḛ tuba ginkoji dəwje gə raŋg no̰ dee’g
Ya̰ ɓee lə dee kai dee gə́ nédɔji lə dee ləm,
Yeḛ ar ginkoji Israɛlje lé d’isi mee kəi-kubuje’g lə dee ya ləm tɔ .
56 Nɛ deḛ d’aḭ mee Ala gə́ Njekurdɔloo’g d’ḭ komá̰ ne ləm,
Deḛ d’aa dɔ torndiaje kər-kər el ləm tɔ .
57 D’unda rɔ dee ɓad rəa’g d’ila ne koji dəa’g el
To gə́ bɔ deeje-je bèe,
Deḛ rəm gogo to gə́ kúla ɓandaŋg gə́ ŋgəŋ el.
58 D’ar oŋg ḭ ne səa pu
Dɔ looje lə dee gə́ ndəw’g lé ləm,
D’ɔs ne gel kəmkəḭ ləa
Gə Magəpoleje lə dee lé ləm tɔ.
59 Ala oo ndá oŋg ḭ səa
Aree ɔs Israɛl lé rəw gə siŋgamoŋ ləa.
60 Yeḛ uba ne loo-siée gə́ Silo ya̰,
Yee ɓa to kəi-kubu gə́ yeḛ si ne mbuna dəwje’g lé .
61 Nésiŋgamoŋ ləa gə boo-ronduba ləa lé
Yeḛ ya̰ meḛ ji njéba̰je’g ləa ar dee d’aw ne ɓee gə́ raŋg .
62 Yeḛ ya̰ goo koso-dəwje ləa ar dee d’wəi yoo-kiambas mburug-mburug ləm,
Yeḛ ar mée ḭ səa jugugu dɔ nédɔji’g ləa ləm tɔ.
63 Pər ḭ roo basaje ləa lé dula-dula ləm,
Ŋganeeje gə́ ma̰də lé d’ɔs pa pidi dee ne el ləm tɔ.
64 Njékinjanéməsje ləa lé d’wəi yoo-kiambas ləm,
Njékəisiŋgaje ləa lé deḛ no̰ dee el ləm tɔ.
65 Mbaidɔmbaije lé teḛ kəmee
Asəna gə dəw gə́ ḭ dɔ ɓi’d bèe ləm,
Asəna gə bao-rɔ gə́ mán-nduú gə́ mḭ lé tɔlee ɓa ḭ ndel dɔ ɓi’g ɓəi ləm tɔ.
66 Yeḛ kunda njéba̰je ləa gə́ d’aḭ nea̰’g ləm,
Yeḛ ar rɔkul-boo gə́ to gə no̰ lé dəb dɔ dee’g ləm tɔ.
67 Lée togə́bè kara yeḛ mbad kəi-kubu lə Jisəb ləm,
Yeḛ mbər ginkoji lə Eprayim el ləm tɔ.
68 Nɛ yeḛ ɔr kəm ginkoji lə Juda ləm,
Gə mbal gə́ Sio̰ gə́ yeḛ unda dan kəmee’g ləm tɔ.
69 Yeḛ unda kəi-siée gə́ to gə kəmee doi lé
Asəna gə loo gə́ to tar sab ləm,
Asəna gə naŋg gə́ yeḛ unda aree ŋgəŋ ŋgəŋ-ŋgəŋ gə no̰ bèe ləm tɔ.
70 Yeḛ mbər Dabid, kura ləa lé
Oree loo-kaar koso-nékulje’g .
71 Yeḛ ɔree goo ko̰ badje gə́ d’ar ŋgan deeje d’aar d’il mbà dee
Gə mba karee ul ŋgaka Jakob gə́ to koso-dəwje ləa lé ləm,
Gə Israɛl gə́ to gə́ nédɔji ləa lé ləm tɔ.
72 Ndá Dabid lé ul dee gə mée gə́ kára ba sur ləm,
Yeḛ ɔr no̰ dee gə jia gə́ gər goso kul néje ləm tɔ.
© Ngambai Bible © Alliance Biblique du Tchad 1989, 2015.
