Pilistije d’ɔr rɔ d’aw rɔ gə Israɛlje
1 Mee ndəa’g neelé Pilistije mbo̰ kudu-njérɔje lə dee dɔ na̰’d mba kar dee to njérɔje gə́ gel kára ɓa mba kaw rɔ ne gə Israɛlje. Yen ŋga Akis ula Dabid pana: Maji kari gər to gə́ i seḭ gə njérɔje ləi a gə kawje səm na̰’d loo-rɔ’g ya.
2 Dabid tel ila Akis’g pana: I a koo né gə́ kura ləi a gə ra gao ya.
Ndá Akis tel ula Dabid pana: Bèe ya, m’a kari to njekaa dɔm ya saar gə no̰.
3 Samel lé wəi mba̰. Israɛlje mbo̰ dɔ na̰ no̰ yée ləm, dubee dɔ naŋg’d ləa gə́ Rama ləm tɔ. Sawul lé tuba njéɓar ndil dəwje gə́ d’wəi ləm, gə njéndo̰-ərje ləm tɔ mee ɓeeko̰’g ləa lai .
4 Pilistije mbo̰ dɔ na̰ ree d’wa loo-si dee Sunem ləm, Sawul mbo̰ njérɔje gə́ Israɛl ar dee ree d’wa loo-si dee Gilboa ləm tɔ. 5 Loo gə́ Sawul oo loo-si Pilistije ndá ɓəl undá badə gaŋgee ar ɓəŋgəree ɓar ɗigi-ɗigi tɔ. 6 Sawul dəji Njesigənea̰ ta ndá Njesigənea̰ ilá ta’g gə ni el ləm, gə néje lə njekinjanéməs gə́ ɓaree urim el ləma, gə ndu njéteggintaje el ləm tɔ . 7 Bèe ɓa Sawul ula kuraje ləa pana: Saŋje dené gə́ njeɓar ndil dəwje gə́ d’wəi amje mba kam m’aw rəa’g m’dəjee ta. Ndá kuraje ləa d’ulá pana: Aa oo, mee ɓee gə́ En-Dɔr lé dené gə́ njeɓar ndil dəwje gə́ d’wəi si keneŋ.
8 Yen ŋga Sawul tel rəa ɓəd ula kubuje gə́ raŋg rəa’g ndá aw gə dəwje joo. Deḛ ree loondul’g kəi lə dené lé. Sawul ulá pana: Maji kari ɓar ndil dəw gə́ wəi aree pata né gə́ a gə ree am ndá maji kari ɓar dəw gə́ m’a gə kulai ria nee.
9 Dené lé tel ilá keneŋ pana: Aa oo, i gər né gə́ Sawul ra lé gao ya: yeḛ tuba njéɓar ndil dəwje gə́ d’wəi gə njénékooje gə njéndo̰-ərje mee ɓeeko̰’g ləa. Nɛ see ban ɓa i iya gum gə mba kwam ne kam m’wəi wa.
10 Sawul man rəa gə ri Njesigənea̰ aree pana: Njesigənea̰ si kəmba ya! Némajel a rai gə mbəa el.
11 Dené lé dəjee pana: See na̰ ɓa i ndigi kam m’ɓaree m’aree teḛ wa.
Ndá yeḛ ilá keneŋ pana: Ɓar Samel ɓa aree teḛ am.
12 Loo gə́ dené lé oo Samel ndá yeḛ ur kii pénéné tɔɓəi tel dəji Sawul pana: See ban ɓa i su kəm wa. I to Sawul.
13 Mbai lé ulá pana: Ɓəl el. See ɗi ɓa i oo wa.
Dené tel ila Sawul’g pana: Ma m’oo njabaw ɓa ḭ naŋg unda loo teḛ raga.
14 Sawul dəjee pana: See kəmee to to gə́ ban wa.
Ndá yeḛ tel ilá keneŋ pana: To dəw gə́ ɓuga ɓa teḛ. Yeḛ ɓiri rəa gə kubu gə́ boi yul.
Bèe ɓa Sawul gər to gə́ to Samel ya ndá yeḛ ula dəa unda barmba dəb kəmee naŋg. 15 Samel dəji Sawul pana: See gelee ban ɓa i jɔgm am m’unda loo m’teḛ wa.
Sawul ilá keneŋ pana: M’isi dan boo-néurti’g. Pilistije ree rɔ səm ndá Ala ɔr rəa rɔm’g. Yeḛ ilam ta gə́ gə ndu njéteggintaje el ləm, gə nije el ləm tɔ. Yee gə́ bèe ɓa m’ɓari ne mba kari am m’gər ne né gə́ kəm ra ya.
16 Samel ulá pana: To gə́ Njesigənea̰ ɔr rəa rɔi’g ari to gə́ njeba̰ ləa mba̰ ŋga, see gelee ban ɓa i dəjim ma ta wa. 17 Njesigənea̰ ra səi to gə́ yeḛ am m’ulai taree lé ya. Njesigənea̰ wa ɓeeko̰ ləi lé jii’g wɔgədɔ ɔr ar mari gə́ to Dabid . 18 Mbata i ila koji dɔ torndu Njesigənea̰’g el ləm, i ar Amalek oo boo-oŋg lə Njesigənea̰ gə́ nuŋga kəd-kəd el ləm tɔ. Gelee gə́ nee ɓa Njesigənea̰ ra ne səi né gə́ togə́bè ɓogənè gə mbəa . 19 Israɛlje ya kara Njesigənea̰ a kya̰ dee səi na̰’d meḛ jii Pilistije’g. Bèlè ndá i seḭ gə ŋganije a síje səm na̰’d ləm, Njesigənea̰ a kya̰ njérɔje gə́ Israɛl jii Pilistije’g ləm tɔ.
20 Léegəneeya Sawul ɔr oso naŋg gə ŋgalee mərəŋ. Taje lə Samel ar ɓəl undá badə gaŋgee. Tɔɓəi siŋgá godo mbata dan kàrá gə loondul’g lé yeḛ sɔ né kára kara el. 21 Dené lé ree rɔ Sawul’g, ée to gə́ yeḛ ɓəl yaa̰ ndá yeḛ ulá pana: Aa oo, ma kura ləi gə́ dené lé m’oo ndui. Kila gə́ m’ila ŋgonkoji dɔ taje gə́ i ulam’g lé yee ɓa m’ila ne rɔm jii’g gə mbəa. 22 Ɓasinè m’ra ndòo rɔi’g, maji kari oo ndu kura ləi gə́ dené tɔ. Ya̰ loo am m’ari muru gə́ lam nee mba kari o̰ ar siŋgai to ɓa un ne rəw aw ɓəi.
23 Nɛ yeḛ mbad kɔḭ pana: M’a ko̰ el. Nɛ kuraje ləa ləm gə dené lé ləm tɔ d’ɔsee ɓɔḭ-ɓɔḭ ndá yeḛ tel oo ta lə dee tɔɓəi yeḛ ḭ naŋg aw si dɔ tira’g tɔ. 24 Dené lé aw gə ŋgon maŋg gə́ rəa to ndəb-ndəb kəi ləa ndá yeḛ ɔs rəa ɓad tɔlee tɔɓəi yeḛ dḭ nduji koro ne muru gə́ nétiee godo keneŋ. 25 Yeḛ unda no̰ Sawul’g gə no̰ kuraje’g ləa ndá deḛ d’o̰. Loo gə́ d’uba naŋg d’ḭ ndá d’ɔd d’aw loondul’g nee ya.
© Ngambai Bible © Alliance Biblique du Tchad 1989, 2015.
