Amɔs 6 - Ngambai Bible révision (SBA2015)

Meeko̰ a koso dɔ Israɛlje’g

1 Meeko̰ a koso dɔ deḛ gə́ d’isi lɔm mee ɓee’g Sio̰ ləm,

Gə deḛ gə́ d’isi gə́ majee dɔ mbal’g Samari

Lal ɓəl ləm tɔ.

Mbata deḛ gə́ to mbaije gə́ boo lə ginkoji dəwje

Gə́ d’uru dɔ mar deeje’g lé

Ɓa Israɛlje d’aw rɔ dee’g!

2 Dəsje awje ɓee gə́ Kalne ooje ləm,

Ḭje keneŋ awje saar teḛje Amat

Gə́ to ɓee-boo lə Pilistije ləma,

Awje Gat, ɓee lə Pilistije ləm tɔ.

See ɓee-booje gə́ neelé

To maji d’ur dɔ ɓeeko̰je’g lə sí gə́ joo nee wa.

Esé see dɔ naŋg lə dee tad yaa̰ unda ka̰ sí-seḭ wa.

3 Seḭ ə̰jije meḛ sí’g

Mba kɔs ndɔ némeeko̰ neelé

Karee nai gə kuree ɓəi ləm,

Seḭ arje néra gə́ kərm-kərm taa sí loo ləm tɔ.

4 Deḛ d’wa rɔ dee dɔ tiraje’g

Gə́ ra gə ŋgaŋ kər ləm,

Deḛ naji rɔ dee loo-to dee’g ləm tɔ,

Deḛ d’usɔ ŋgan badje mbuna koso-badje’g ləm,

Gə bɔ maŋgje gə́ d’aar kəi-kul dee’g ləm tɔ.

5 Deḛ d’ɔs pa gə mḭdé ba gə kṵdu-ko̰dè ləm,

Deḛ d’oo rɔ dee gə́ njégoso nékimje to gə́ Dabid bèe ləm tɔ.

6 Deḛ d’ai mán-nduú mee baije gə́ boi-boi ləm,

Deḛ d’wa rɔ dee gə ubu

Gə́ maji ur dɔ mareeje’g ləm tɔ

Nɛ meḛ dee o̰ dee

Dɔ tuji gə́ oso dɔ ginkoji’g lə Jisəb lé el.

7 Gelee gə́ nee ɓa, d’a kwa dee gə́ ɓər

Kaw sə dee kédé no̰ mar deeje’g

Ndá deḛ gə́ d’ya̰ rɔ dee yag dan mal néje gə́ ka̰ darɔ’g lé

Ndu kii rɔlel lə dee a gaŋg ŋgəji.

8 Mbaidɔmbaije gə́ Njesigənea̰ lé

Maa̰ rəa gə ria-yeḛ nja,

Njesigənea̰, Ala gə́ njeboo-néje lé ɓa pa bèe pana:

Beelé lə Jakob lé to kḛji kəm neḛ’g ləm,

Kəi-mbaije ləa kara neḛ n’ə̰ji bəḭ-bəḭ ləm tɔ,

Togə́bè ɓa n’a kila ɓee neelé

Gə néje lai gə́ to keneŋ lé ji njéba̰je’g lə dee tɔ.

9 Bèe ɓa ɓó lé dəwje dɔg nai mee kəi gə́ kára ndá d’a kwəi ya. 10 Loo gə́ ŋgoko̰ dəw un ninee mba roo ɓa yeḛ teḛ gə siŋgaje gə́ raga ndá yeḛ a dəji dəw gə́ sí duu-loo’g mee kəi’g lé pana: See dəw kára nai səi ɓəi wa. Ndá yeḛ a kilá keneŋ pana: Wah, dəw godo... Tɔɓəi yeḛ a pa pana: Wa tai. Ɓasinè lé to kəm kar sí m’ɓar ri Njesigənea̰ el.

11 Mbata aa ooje, né gə́ Njesigənea̰ un ndia dɔ’g lé ɓa nee:

Yeḛ a kar kəi gə́ boo lé təd kuyum-kuyum ləm,

Ŋgon kəi gə́ lam kara a kiri budu-budu ləm tɔ.

12 See kundaje d’aiŋgwɔd dɔ biri mbal’g wa.

Esé see deḛ ndɔ-ndɔ keneŋ gə bɔ maŋgje

Ɓa seḭ telje néra gə́ danasur areeje to gə́ kuma̰ yoo ləm,

Kandə meekarabasur lé

Seḭ teleeje gə́ kandə né gə́ adə ləm tɔ lé wa.

13 Seḭ raje rɔlel dɔ né gə́ to gə́ né el ar sí pajena: See to mbɔl dɔ siŋga sí-seḭ ɓa seḭ iŋgaje ne siŋgamoŋ lé el wa. 14 Gelee gə́ nee ɓa, aa ooje, Njesigənea̰, Ala gə́ njeboo-néje lé pa bèe pana: Seḭ gel-bɔje lə Israɛl lé n’a kar ginkoji dəwje gə́ kára d’ḭ d’oma̰ sə sí un kudee Lebo-Amat saar teḛ ne kəm-rəw-mán gə́ Araba.