Kunda njékinjanéməsje gə kəmee
1 Aa oo, né gə́ i a ra mba kunda dee ne gə kəmee mba kar dee ra ne kula gə́ wɔji dɔ nékinjaməs kam lé ɓa nee: I a kwa bɔ maŋg kára gə bàl badje joo gə́ rɔ dee mina̰ el. 2 I a ra muru gə́ lal əm-tiné ləm, gə mbə gə́ kila gə́ əm-tiné godo keneŋ ɓa saga ubu dɔ’g ləm tɔ, néje neelé i a ra dee gə nduji kó gə́ ndá léréré. 3 I a kɔm dee mee karè’g mba kaw ne korè dee na̰’d gə bɔ maŋg gə bàl badje gə́ joo gə́ a gə kinja deeje gə́ məs lé tɔ.
4 I a kar Aaro̰ gə ŋganeeje gə́ diŋgam rəm pər gə́ tarəw kəi-kiŋga-na̰ gə́ to gə kəmee’g ndá i a ndogo dee mán. 5 I a kodo kubuje neelé ndá a kula kubu gə́ gel maree’g rɔ Aaro̰’g ləm, gə kubu gə́ ŋgal yududu gə́ ka̰ épod ləm, gə épod ləma, gə ɓɔl kubu gə́ tɔ kaar dee’g ləm tɔ ndá i a tɔ gagəra gə́ ka̰ épod rḛgee’g tɔ. 6 I a kula dɔgugu dəa’g ləm, a tɔ mbɔr gə́ to gə kəmee lé no̰ dɔgugu’g lé ləm tɔ. 7 I a kun ubu gə́ ka̰ kunda ne né gə kəmee ndá a tər dəa’g. 8 I a kar ŋganeeje gə́ diŋgam rəm gə́ rɔi’g ndá a kula kubuje gə́ ŋgal yududu-yududu rɔ dee’g. 9 I a tɔ gagəra reŋ Aaro̰’g gə reŋ ŋganeeje gə́ diŋgam’g ləm, a tula jɔgje dɔ ŋgalə Aaro̰’g ləm tɔ. Kula nékinjaməs neelé a to ka̰ dee-deḛ gə goo godndu gə́ to gə no̰. Togə́bè ɓa i a kɔr ne Aaro̰ gə ŋganeeje gə́ diŋgam kunda dee ne gə kəmee ya.
10 D’a ree gə bɔ maŋg no̰ kəi-kubu-kiŋga-na̰ gə́ to gə kəmee’g ndá Aaro̰ gə ŋganeeje gə́ diŋgam d’a kila ji dee dɔ bɔ maŋg’g neelé. 11 I a kinja gwɔb bɔ maŋg neelé no̰ Njesigənea̰’g tarəw kəi-kubu-kiŋga-na̰ gə́ to gə kəmee’g neelé. 12 I a taa məs bɔ maŋg neelé ndá a kula ŋgon ji-i keneŋ mba rad dɔ kum loo-nékinjanéməsje gə́ ḭta lé ləm, a kɔm məs gə́ nai lé gɔl loo-nékinjaməs’g lé ləm tɔ. 13 I a tusu ubeeje lai gə́ dolè dɔ ŋgan siḭyeje ləm, gə wur ndulee ləm, gə ɓɔlɔlɔ-duneeje gə́ joo ləma, gə ubeeje gə́ dolè dɔ dee ləm tɔ ndá, a roo néje neelé lai dɔ loo-nékinjaməs’g. 14 Nɛ dakasrɔ bɔ maŋg ləm, gə ndaree ləma, gə siḭyee ləm tɔ lé i a roo dee gir loo-si dee’g raga, yee neelé ɓa to nékinjaməs gə́ ka̰ kuga dɔ kaiya tɔ.
15 D’a kwa bàl badə gə́ kára ndá Aaro̰ deḛ gə ŋganeeje gə́ diŋgam d’a kila ji dee dɔ bàl badə’g lé. 16 I a kinja gwɔb bàl badə neelé ndá a taa məsee mba saga gugu ne dɔ loo-nékinjaməs neelé sub. 17 I a gaŋg bàl badə neelé dana ɗugugu-ɗugugu ndá, a togo ŋgan siḭyeje ləm gə gɔleeje ləm, tɔɓəi a kɔm dɔ mbidáje’g ləm, gə dɔ dəa’g ləm tɔ. 18 I a roo bàl badə neelé bura loo-nékinjaməs’g, yee ɓa to nékinjaməs gə́ ka̰ roo kar Njesigənea̰ ləm, to nékinjaməs gə́ ka̰ roo dula-dula gə́ baḭyee ə̰də lel Njesigənea̰ ləm tɔ . 19 D’a kwa bàl badə gə́ raŋg ndá Aaro̰ gə ŋganeeje gə́ diŋgam d’a kila ji dee dɔ bàl badə’g neelé tɔ. 20 I a kinja gwɔb bàl badə neelé ndá, a taa məsee mba rad gel mbi Aaro̰ gə́ dɔkɔl ləm, gə gel mbi ŋganeeje gə́ diŋgam gə́ dɔkɔl ləm, gə ko̰ ji dee gə́ dɔkɔl ləm, gə ko̰ gɔl dee gə́ dɔkɔl ləm tɔ ndá, a saga məs gugu ne dɔ loo-nékinjaməs neelé sub ya. 21 I a taa məs gə́ a to dɔ loo-nékinjaməs’g lé lam ləm, gə ubu gə́ ka̰ tər dɔ’g lé ləm tɔ ndá, a saga dɔ Aaro̰’g gə dɔ kubuje’g ləa ləm, dɔ ŋganeeje gə́ diŋgam’g gə dɔ kubuje’g lə dee ləm tɔ. Togə́bè ɓa Aaro̰ gə kubuje ləa ləm, gə ŋganeeje gə́ diŋgam gə kubuje lə dee ləm tɔ lé i a kɔr dee ne kunda dee ne gə kəmee kam tɔ. 22 I a kodo ubu bàl badə neelé ləm, gə ɓo̰gee ləm, gə ubee gə́ dolè dɔ ŋgan siḭyeje ləm, gə wur ndulee ləm, gə ɓɔlɔlɔ-duneeje gə́ joo gə ubee gə́ dolè dɔ dee’g ləma, gə biŋgee gə́ dɔkɔl ləm tɔ mbata to bàl badə gə́ ka̰ kɔr dee kunda dee ne gə kəmee. 23 Mee karè’d gə́ d’ɔm muru gə́ əm-tiné godo keneŋ, gə́ d’unda no̰ Njesigənea̰’g lé i a kun pil muru kára keneŋ ləm, gə mbə gə́ ra gə ubu kára ləma, gə mbə gə́ kila kára ləm tɔ. 24 I a kɔm néje lai neelé ji Aaro̰’g gə ji ŋganeeje gə́ diŋgam’g ndá, a kar dee d’ula gə́ yo gə́ nee gə goo nduree no̰ Njesigənea̰’g. 25 Gée gə́ gogo i a taa néje neelé ji dee’g ndá, a kɔm dee dɔ nékinjaməs gə́ ka̰ roo’g lé, tɔɓəi i a roo dee dɔ loo-nékinjaməs’g lé. Yee ɓa gə́ nékinjaməs gə́ pər roo dula-dula no̰ Njesigənea̰’d gə́ baḭyee ə̰də lel Njesigənea̰ ya. 26 I a kun kaar bàl badə gə́ wɔji dɔ kunda Aaro̰ gə kəmee lé ndá, a kula gə́ yo gə́ nee no̰ Njesigənea̰’g, yee neelé a to gesee gə́ wɔji dɔi-i ya.
27 Kaar bàl badə gə biŋgee gə́ wɔji dɔ kɔr Aaro̰ gə ŋganeeje gə́ diŋgam kunda dee gə kəmee lé i a kunda dee gə kəmee ya, kaaree lé i a kula gə́ yo gə́ nee ləm, biŋgee kara i a kunee gə́ tar ləm tɔ. 28 Néje neelé d’a to ka̰ Aaro̰ gə ka̰ ŋganeeje gə́ diŋgam gə goo godndu gə́ to gə no̰ gə́ Israɛlje d’a kaa dəa kər-kər mbata to nékar gə́ d’unee gə́ tar ndá mbuna nékinjanéməsje gə́ ka̰ kɔm na̰’d gə́ Israɛlje d’a kinja lé nékar gə́ d’unee gə́ tar lé a to ka̰ Njesigənea̰ ya.
29 Kubuje gə́ to gə kəmee gə́ wɔji dɔ Aaro̰ lé gée gə́ gogo ndá d’a to mbata lə ŋganeeje gə́ diŋgam ya, bèe ɓa d’a kula rɔ dee’g loo gə́ d’a tər ubu dɔ dee’g gə mba kɔr dee kunda dee ne gə kəmee mbata lə Ala. 30 Ŋgonee gə́ a taa toree loo kula gə́ wɔji dɔ nékinjaməs lé ləm, gə́ a kandə mee kəi-kubu-kiŋga-na̰ gə́ to gə kəmee mba ra kula mee loo gə́ to gə kəmee doi’g ləm tɔ lé a kula kubuje neelé rəa’g as ndəa siri.
31 D’a kun bàl badə gə́ wɔji dɔ kɔr dee kunda dee gə kəmee mbata lə Ala ndá d’a ndiri dakasee mee loo gə́ to gə kəmee’g lé. 32 Tarəw kəi-kubu-kiŋga-na̰ gə́ to gə kəmee’g neelé ɓa a to loo gə́ Aaro̰ gə ŋganeeje gə́ diŋgam d’a sɔ dakas bàl badə neelé keneŋ ləm, gə muru gə́ to mee karè’g lé ləm tɔ. 33 D’a sɔ né gə́ wɔji dɔ kuga dɔ kaiya togə́bè tɔ, gə mba kɔr dee ne kunda dee gə kəmee ɓəd mbata lə Ala ya ləm, a kunda dee gə kəmee doi ləm tɔ, nɛ dəw-dɔ-ɓee kára kara a sɔ néje neelé el mbata to néje gə́ to gə kəmee ya. 34 Ɓó lé ges dakasrɔ da gə́ wɔji dɔ kɔr dee kunda dee ne gə kəmee kar Ala nai əsé ges muru lé nai saar bèlè gə ndɔ ndá i a roo ges né gə́ nai ɓó d’a sɔ el mbata to né gə́ to gə kəmee.
35 I a ra gə Aaro̰ gə ŋganeeje gə́ diŋgam lé gə goo ndukunje lai gə́ ma m’un ne ndum m’ari lé. I a kwɔji ndɔ siri mba kɔr dee ne kunda dee ne gə kəmee ya. 36 Ndɔje kára-kára lai lé i a kinja bɔ maŋg kára gə́ nékinjaməs mba kuga ne dɔ kaiya, nékoga dɔ kaiya neelé ɓa i a kɔr ne won loo-nékinjaməs ndá, a tər ubu dɔ dee’g gə mba kunda ne gə kəmee. 37 As ndɔ siri lé i a ra nékoga dɔ kaiyaje dɔ loo-nékinjaməs’g ndá, a kunda loo-nékinjaməs neelé gə kəmee kar Ala ya, loo-nékinjaməs neelé a to gə kəmee doi ləm, dəw gə́ rara əsé né gə́ rara gə́ ɔrɔ rɔ loo-nékinjaməs neelé kara a to gə kəmee ləm tɔ.
Nékinjaməs gə́ ka̰ roo gə ndɔje kára-kára lai
38 Aa oo, néje gə́ d’a kinja dee gə́ məs loo-nékinjaməs’g neelé ɓa to nee: ŋgan bàl badje joo-joo gə́ ləb koji dee kára-kára ɓa d’a kinja dee gə ndɔje kára-kára lai saar gə no̰. 39 D’a kinja ŋgon bàl badə gə́ kára gə́ məs teḛ gə ndɔ ləm, ŋgon bàl badə gə́ raŋg lé a kḭjá gə́ məs loo gə́ kàr andə ləm tɔ. 40 Loo gə́ d’a kinja ŋgon bàl badə gə́ dɔtar gə́ məs lé ndá i a kun nduji gə́ ndá léréré as nékwɔji kwɔi-lə-né munda gə́ mbɔḭ gə ubu koiyo gə́ kas as litər kára gə gesee ləm, gə mán-nduú as litər kára gə gesee gə́ ka̰ tər naŋg ləm tɔ. 41 Ŋgon bàl badə gə́ njekɔm’g joo lé d’a kḭjá gə́ məs loo gə́ kàr a gə kandə ndá d’a kunee na̰’d gə nékar gə né-tər-naŋg asəna gə yee gə́ ra gə ndɔ bèe ya ləm tɔ, yee neelé to nékinjaməs gə́ ka̰ roo gə́ baḭyee ə̰də lel Njesigənea̰. 42 Aa oo, yee ɓa to nékinjaməs gə́ ka̰ roo ta-ta gə́ ŋgakadɔg síje d’a kḭjá tarəw kəi-kubu-kiŋga-na̰ gə́ to gə kəmee’g no̰ Njesigənea̰’g, lé gə́ neelé ɓa m’a ree kiŋga si keneŋ ləm, m’a kwɔji səi ta keneŋ ləm tɔ.
43 Lée gə́ neelé ɓa m’a ree kiŋga Israɛlje keneŋ ndá rɔnduba ləm lé a kɔr loo neelé kunda gə kəmee ya. 44 Kəi-kubu-kiŋga-na̰ gə́ to gə kəmee ləm, gə loo-nékinjaməs ləm tɔ lé m’a kunda dee gə kəmee doi, m’a kunda Aaro̰ gə ŋganeeje gə́ diŋgam gə kəmee mba kar dee ra kula gə́ wɔji dɔ loo-nékinjaməs kam tɔ. 45 M’a si mbuna Israɛlje’g ləm, m’a to Ala lə dee ya ləm tɔ. 46 Deḛ d’a gər gao to gə́ ma m’to Njesigənea̰ Ala lə dee gə́ m’ar dee d’unda loo mee ɓee gə́ Ejiptə teḛ lé gə mba kam m’isi mbuna dee’g ya.
Ma m’to Njesigənea̰ Ala lə dee tɔ.
© Ngambai Bible © Alliance Biblique du Tchad 1989, 2015.
