Pa njaa kaw kəi-Ala’g
1 Pakɔs lə Koréje gə́ d’ar bao-pa mba karee ɔs sə dee lé. D’ɔs gə nékim gə́ ɓaree gitit.
2 Njesigənea̰, mbai gə́ njeboo-néje lé
Kəi-siije taa kəm rəgm ya,
3 Ma lé m’ndiŋga rɔm
M’əmə ta biriri-biriri par gə́ gadlooje’g lə Njesigənea̰ ləm,
Darɔm gə ŋgaw məəm bura ra né wəl par gə́ rɔ Ala gə́ njesikəmba’g lé ləm tɔ.
4 Tḭtḭ iŋga kəi kula dəa keneŋ ləm,
Ləbmsiri kara iŋga kəi ləa ɔm ŋganeeje keneŋ ya ləm tɔ
Mbɔr loo-nékinjaməs’g ləi-i Njesigənea̰ gə́ njeboo-néje lé
I gə́ to mbai ləm, gə Ala ləm lé ya.
5 Deḛ gə́ d’isi mee kəi’g ləi lé rɔlel nai sə dee ya,
D’askəm pidi ya ɓəi.
6 Deḛ gə́ d’iŋga loo-gəd-rɔ lə dee rɔi’g lé
Rɔ dee lel dee yaa̰,
Rəwje lai gə́ teḛ rɔi’g lé
D’wɔji meḛ dee’g kédé mba̰.
7 Loo gə́ deḛ d’unda kəm wəl-loo gə́ Baka gaŋg lé
D’aree tel to loo gə́ kəm-rəw-manje taa loo keneŋ pəl-pəl ləm,
Ndi gə́ ər dɔ loo’g neelé ar néje gə́ maji kinja keneŋ ləm tɔ.
8 Loo gə́ d’aw njaa lé ndá
Siŋga dee ḭ dɔ maree’d gə́ kédé-kédé
Ar dee teḛ ne Sio̰’g d’aar ne no̰ Ala’g lé ya.
9 Njesigənea̰, Ala gə́ njeboo-néje lé
Maji kari oo tamaji gə́ m’ra tai’g ya,
Ala lə Jakob, maji kari ur mbii gə́ rɔm’g ya tɔ.
10 Ǝi Ala, i gə́ to dər-rɔ lə sí lé maji kari oo ya,
Maji kar kəmi to jḛ̀ dɔ yeḛ gə́ i wa dəa gə́ ubu lé ya.
11 Kisi mee gadlooje’g ləi ndɔ kára ba lé
Maji yaa̰ unda si loo gə́ raŋg’d ndɔ tɔl-dɔg (1.000).
Karm m’aar tar tarəwkəi’g lə Ala ləm lé
M’ndigi yaa̰ unda karm m’isi kəi-kubuje’g lə njémeeyèrje.
12 Mbata Njesigənea̰, Ala to kàr ləm, gə dər-rɔ ləm tɔ,
Meenoji gə rɔnduba lé Njesigənea̰ ɓa ar dee,
Deḛ gə́ njaa gə goo rəw gə́ danasur lé
Yeḛ ɔg dee némaji kára kara bèe el.
13 Njesigənea̰, mbai dɔ bao-rɔje
Rɔlel a nai gə yeḛ gə́ ɔm mée dɔi’g jəb-jəb lé ya.
© Ngambai Bible © Alliance Biblique du Tchad 1989, 2015.
