1 Dəw kára kara a to gə dené lə bɔbeeje el, mbata to gə́ sul ɓa yeḛ ula dɔ bɔbeeje’g tɔ .
Dəwje gə́ kəm kar dee d’isi loo-mbo̰-dɔ-na̰’g lə Israɛlje el
2 Yeḛ gə́ kɔrgəmeeje tɔ əsé mɔdee gaŋg ndá a kandə loo-mbo̰-dɔ-na̰’g lə koso-dəwje lə Njesigənea̰ el.
3 Yeḛ gə́ to gə́ bɔkoré lé a kandə loo-mbo̰-dɔ-na̰’g lə koso-dəwje lə Njesigənea̰ el, lé ŋgakeaje d’ɔs goo na̰ saar ŋgakadɔgeeje gə́ dɔg kara d’a kandə loo-mbo̰-dɔ-na̰’g lə Njesigənea̰ el ya saar.
4 Deḛ gə́ to Amo̰je gə Moabje lé d’a kandə loo mbo̰ dɔ na̰’g lə dəwje lə Njesigənea̰ el, lé to ŋgakadɔg deeje gə́ njékɔm’g dɔg ya kara d’a kandə keneŋ el ya saar gə no̰ 5 mbata deḛ tila kəm sí gə muru əsé mán rəbə d’ar sí loo gə́ seḭ undaje ne loo mee ɓee gə́ Ejiptə teḛje lé el ləm, mbata deḛ ra né d’oma̰ ne sə sí loo gə́ d’ar Balaam, ŋgolə Beɔr mee ɓee gə́ Petor’g dɔ naŋg ɓee gə́ Mesɔpotami gə mba karee ila ne ndɔl dɔ sí’g ləm tɔ . 6 Nɛ Ala lə sí gə́ Njesigənea̰ ndigi koo ta lə Balaam el ndá, yeḛ ar ta ndɔl lé tel to ndutɔr dɔ sí’g mbata yeḛ unda sí dan kəmee’g ya . 7 Seḭ a saŋgje meelɔm lə dee əsé si maji lə dee nda̰ el loo gə́ seḭ síje ne kəmba lé saar-saar gə no̰ ya.
8 Seḭ a kḛjije Edɔmje bəḭ-bəḭ el mbata deḛ to ŋgako̰ síje, seḭ a kḛjije njé gə́ Ejiptə bəḭ-bəḭ el mbata kédé seḭ toje dəw-dɔ-ɓeeje mee ɓee’g lə dee, 9 ŋgan deeje gə́ d’a koji dee lé, lé as ŋgakadɔg deeje gə́ njekɔm’g munda kara d’a kandə loo-mbo̰-dɔ-na̰’g lə koso-dəwje lə Njesigənea̰ ya.
Godndu gə́ ka̰ kar loo-si dee àr ŋgad-ŋgad
10 Loo gə́ seḭ awje gə mba kaw rɔje gə njéba̰je lə sí ndá undaje rɔ sí ɓad dɔ néraje gə́ majel’g lai. 11 Ɓó lé njerɔ kára mbuna sí’g rəa mina̰ mbata lə né gə́ teḛ dəa’g wai loondul’g ndá yeḛ a kunda loo mee loo-si sí’g teḛ raga tɔɓəi a tel kandə loo-si sí’g lé el, 12 kàrkemetag ndá yeḛ a togo rəa gə mán, tɔɓəi loo gə́ kàr ur naŋg ndá yeḛ a kaskəm tel ree loo-si sí’g gogo.
13 Seḭ a kɔrje kəm loo gir loo-si sí’g raga ndá lé neelé ɓa seḭ a telje wala keneŋ.
14 Mbuna nékodoje’g lə sí lé seḭ a kilaje kwɔs kára keneŋ, ɓa a la sə sí gə mba kar sí urje ne bwa gə mba dubu ne siḭ sí loo gə́ seḭ a gə kawje wala lé. 15 Mbata Ala lə sí gə́ Njesigənea̰ njaa mbuna sí’g dan loo-si sí’g gə mba kaa ne dɔ sí ləm, mba kya̰ ne njéba̰je lə sí ji sí’g ləm tɔ, togə́bè ɓa loo-si sí a to ne gə kəmee gə mba kar Njesigənea̰ oo ne né gə́ mina̰ rɔ sí’g el ləm, karee tel ne giree ila ar sí el ləm tɔ.
Ɓər gə́ aḭ gə́ kaḭ
16 Ɓər gə́ ḭ kəi lə ɓéeje aḭ gə́ kaḭ teḛ rɔ sí’g gə mba kaji rəa ndá seḭ a tel kiláje ji ɓéeje’g gogo el ŋga. 17 Yeḛ a ra kəi ləa mbuna sí’g mee ɓee-boo gə́ kára mbuna ɓee-booje’g lə sí to gə́ mée ndigi ndá seḭ a kulaje kəmee ndòo el.
Godnduje gə́ ɓəd-ɓəd
18 Maji kar kaiya-dené kára kara godo mbuna denéje gə́ Israɛl ləm, diŋgamje gə́ njéra nérɔkulje d’a godo mbuna diŋgamje’d gə́ Israɛl ləm tɔ . 19 Seḭ a kawje mee kəi’g lə Ala lə sí gə́ Njesigənea̰ gə lar kaiya lə dəwje gə́ togə́bè əsé lar ndogo bisi gə mba tɔl ne ta ndukun lə sí gə́ rara kara el, mbata dee joo bɔr to néje gə́ mina̰ kəm Njesigənea̰ Ala’g lə sí.
20 Ŋgoko̰ sí gə́ tona sí né lé seḭ a dəjeje manee dɔ’g el, lé to gə́ lar əsé nésɔ əsé né gə́ rara gə́ ŋgoko̰ sí tona sí lé seḭ a taaje manee dɔ’g el . 21 Dəw-dɔ-ɓee ɓa tona sí né lé ndá seḭ a kasjekəm taaje manee dɔ’g ya, nɛ ŋgoko̰ sí ɓa tona sí né ndá seḭ a taaje manee dɔ’g el, gə mba kar Njesigənea̰, Ala lə sí tɔr ne ndia dɔ sí’g gə dɔ kulaje lai gə́ seḭ a raje mee ɓee gə́ seḭ a kawje kaw taaje gə́ né ka̰ sí lé.
22 Loo gə́ seḭ unje ndu sí njaŋg arje Ala lə sí gə́ Njesigənea̰ ndá seḭ a tilaje gə́ tila lal ra née el, mbata Ala lə sí gə́ Njesigənea̰ a dəji sí gée . 23 Ɓó lé seḭ ɔgje rɔ sí dɔ kun ndu’g ndá to kaiya el tɔ. 24 Nɛ ta né gə́ teḛ ta sí-seḭ’g lé seḭ a kaaje dəa kər-kər gə goo ndukun gə́ seḭ ḭje gə meḛ sí unje arje Ala lə sí gə́ Njesigənea̰ lé gə mba ra née karee aw lée’g béréré gə goo taree gə́ seḭ paje lé ya.
25 Ɓó lé dəw aw mee ndɔ-nduú’g lə ŋgokea̰ ndá yeḛ a sɔ kandə nduú lé as lé karee asee ɓó a kinja kɔm mee ɓɔl’g ləa nda̰ el. 26 Ɓó lé dəw aw mee ndɔ kó’g lə ŋgokea̰ ndá yeḛ a kaskəm riba barkəm kó lé gə jia tem sɔ ɓa ɓó a kila marm ləa gə mbɔree kinja ne dɔ kó lə ŋgokea̰ lé el tɔ.
© Ngambai Bible © Alliance Biblique du Tchad 1989, 2015.
