Ndɔ ree lə Njesigənea̰ nai dəb
1 Imje to̰to̰ mee ɓee gə́ Sio̰’g!
Arje ndia ɓar ɔr loo lɔi-lɔi
Dɔ mbal’g ləm gə́ to gə kəmee!
Maji kar dəw-mee-ɓeeje lai d’unda bala tigi-tigi!
Mbata ndɔ lə Njesigənea̰ si ree,
Yee nai dəb ba ŋga.
2 To ndɔ ka̰ loo gə́ ndul njudu-njudu
Gə loo gə́ dəb bigim ləm,
To ndɔ gə́ mum a koso ləm
Ndi a kḭ loḭ-loḭ ləm tɔ.
Yee ree asəna gə kàr gə́ uba kuji’d
Gə́ ar loo àr dɔ mbalje’g bèe.
Aa ooje, ginkoji dəwje gə́ bula digi-digi
Gə́ to njésiŋgamoŋje
Gə́ dəw oo gar dee kédé el ləm,
D’a koo gar dee gə́ togə́bè gogo nda̰ el ləm tɔ.
3 Loo gə́ to no̰ dee’g lé
To asəna gə pər gə́ roo loo dula-dula bèe ləm,
Loo gə́ goo dee’g lé
To asəna gə ndo̰ pər gə́ o̰ loo rug-rug bèe ləm tɔ,
Dɔ naŋg gə́ no̰ dee’g kédé lé
To asəna gə loo-ndɔ gə́ Edḛ bèe,
Nɛ goo dee’g gogo ndá
Loo tel to dɔdilaloo gə́ majel,
Né kára kara nai keneŋ el.
4 Deḛ to tana gə kundaje bèe ləm,
Deḛ d’aiŋgwɔd kalaŋ to gə́ njékal kundaje bèe ləm tɔ .
5 Kaa dee gə́ ɓar lé
To asəna gə kaa pusu-rɔje
Gə́ tal dɔ sém mbalje’g tar bèe ləm,
To asəna gə ndo̰ pər gə́ o̰ ndɔb rududu-rududu
Gə́ aw to̰ ləm muje bèe ləma,
To asəna gə kudu njérɔje gə́ siŋga dee to yaa̰
Gə́ d’wa dɔ gɔl rɔ dee gə mba kaw rɔ bèe ləm tɔ.
6 Koso-dəwje ɓəl d’unda bala tigi-tigi no̰ dee’g.
Dəwje lai lé kəm dee tel wagəsa gə kəm ɓəl.
7 Deḛ d’unda na̰ gə kudu dee kudu dee to gə́ bao-rɔje bèe ləm,
Deḛ tal dɔ ndògo-bɔrɔ to gə́ njérɔje bèe ləm tɔ,
Nana kara aw gə́ rəw ləa-ləa
Ar dəw kára kara ndəm rəw-kabee’g el.
8 Deḛ d’usu na̰ wuduru-wuduru el,
Nana kara njaa gə kíla rəw ləa-ləa,
Deḛ dəs kalaŋ mbuna ndo̰ nékadje’g
Lal kaar naŋg.
9 Deḛ yal na̰ pə mee ɓee-boo’g ləm,
D’aiŋgwɔd dɔ ndògo-bɔrɔje’g ləm,
Tuba dɔ kəije ləma,
Ta̰d kəmbolèje’g to gə́ njéɓogoje bèe ləm tɔ.
10 Naŋg yə ɓugu-ɓugu no̰ dee’g ləm,
Dara kara yə ləm,
Kàr gə naḭ tel ndul njudu-njudu ləma,
Kéréméje kara rɔndɔḭ lə dee godo ləm tɔ .
11 Njesigənea̰ pata ar dee d’oo ndia no̰ bao-rɔje’g ləa,
Mbata loo-siée un loo lad-lad,
Njekar ta ləa aw lée’g béréré lé
To Njesiŋgamoŋ,
Mbata ndɔ lə Njesigənea̰ lé
To ndɔ gə́ boo ləm, to ɓəl kədm-kədm ləm tɔ,
See na̰ ɓa a kaskəm kaar dɔ gɔlee’g njaŋg wa .
Kàr tel ree rɔ Njesigənea̰’g teḛ mba̰
12 Njesigənea̰ pa tɔɓəi pana:
Ɓasinè lé, gə́ telje reeje rɔm’g gə ŋgaw meḛ sí bura ləm,
Gə kɔg-mee-ɓoo ləm, gə no̰ ləma,
Gə no̰ sii mbigi-mbigi ləm tɔ.
13 Arje ɓəŋgərə sí ɓa ti dus
Ɓó tilje kubuje lə sí ɓa ba el,
Ɔsje badm telje gə́ rɔ Njesigənea̰, Ala’g lə sí,
Mbata yeḛ to njemeekaw taḭ-taḭ ləm,
Gə njemeekɔrjol ləm,
Oŋg ḭ səa kalaŋ el ləma,
Yeḛ to bao-meemaji ləm tɔ
Ndá yeḛ rəm gə ndia dɔ némajelje’d
Gə́ yeḛ wɔji mba ra lé.
14 See na̰ gər wa.
Banelə yeḛ a tel ree gə mba tel gə ndia
Kar mée oso lemsé dɔ sí’g
Tɔr ne ndia dɔ sí’g
Esé a kya̰ ne loo kar sí areeje ne nékar gə́ to nduji
Esé nékar gə́ ka̰ tər naŋg kar Ala lə sí gə́ Njesigənea̰ lé.
Kàr kɔg-mee-ɓoo gə kàr ra ndòo rɔ Ala’g lé
15 Imje to̰to̰ mee ɓee gə́ Sio̰’g!
Ilaje mbər kɔg-mee-ɓoo ləm,
Gə kwa-dɔ-na̰ gə́ to gə kəmee ləm tɔ.
16 Mbo̰je koso-dəwje ar deeje d’wa dɔ na̰
Mee loo’d gə́ to gə kəmee!
Mbo̰je ɓugaje ləm,
Mbo̰je ŋganje
Deḛ gə́ ta mbà’g ya kara ləm tɔ!
Maji kar njedené-sigi gə njeŋgao-sigi
D’unda loo mee kəi-si dee’g teḛ tɔ.
17 Maji kar njékinjanéməsje
Gə́ to kuraje lə Njesigənea̰ lé
D’aar mbuna loo-nékinjaməs gə gel jala’g lé
Ra tamaji no̰ gə mán-no̰ kəm dee’g pana:
Ǝi Njesigənea̰, maji kari aji koso-dəwje ləi!
Maji kari ya̰ né gə́ to nédɔji ləi aree tel to nérɔkul
Gə nékunda-kogo lə ginkoji dəwje gə raŋg el.
Maji kari ya̰ loo mba kar gel ɓeeje lə dəwje-dəwje lé
D’a pa ne pana:
Ala lə dee lé see si ra ɓəi wa bèe el.
Njesigənea̰ ila koso-dəwje ləa ta’g
18 Kəm Njesigənea̰ əḭ dɔ ɓee’g ləa
Ar mée aw taḭ-taḭ,
Bèe ɓa yeḛ oo ne kəmtondoo lə koso-dəwje ləa.
19 Njesigənea̰ ila koso-dəwje’g ləa pana:
M’a kula gə kó gə mán-nduú gə́ kul gə ubu
Gə mba karee as sí nag ya.
Tɔɓəi m’a kya̰ loo kar ginkoji dəwje gə raŋg
D’ila rɔkul dɔ sí’g bèe el ŋga.
20 M’a kɔs njéba̰je lə sí gə́ par gə́ dɔgel lé rəw no̰ sí’g ləm,
M’a tuba dee par gə́ dɔdilaloo’d
Gə́ tudu kurum-kurum ləm
Kar deḛ gə́ njékɔrno̰ deeje
D’oso dan baa-boo-kad’g par gə́ bər ləma,
Kar njékaa goo deeje
D’a koso dan baa-boo-kad’g par gə́ dɔ-gó ləm tɔ.
D’a ndum kar nin dee ə̰də mbo̰ ləm,
Ndum dee a kḭ kaar tar dan lel’g ləm tɔ
Mbata deḛ ra sə sí némajelje gə́ boo.
21 I dɔ naŋg lé, maji kari gə́ ɓəl el
Nɛ maji kari al rɔi ləm, ra rɔlel ləm tɔ
Mbata Njesigənea̰ ra néje gə́ boo.
22 Seḭ daje gə́ wala lé ɓəlje el
Mbata ndag-looje gə́ dɔdilaloo’g lé
D’a tel kidi gogo ləm,
Kagje d’a kandə gə kandə dee njim-njim ləma,
Kag-kodé gə kag-nduú d’a kar sí nébaoje lə dee ləm tɔ.
23 Seḭ dəwje gə́ Sio̰ lé
Maji kar sí alje rɔ sí ləm, raje rɔlel
Gin Njesigənea̰, Ala’g lə sí ləm tɔ.
Mbata yeḛ a gə kar sí mán ndi
Gə naḭyee-naḭyee ləm,
Yeḛ a kar sí ndi gə́ doŋgɔr
Gə yee gə́ gogo ləm tɔ
To gə́ yeḛ ra kédé gə́ ləw lé tɔ.
24 Ko a taa loo-kundaje pəl-pəl ləm,
Man-nduú gə́ kul gə ubu d’a rusu dura mbula Kandə-nduúje rḛ́dḛ́g-rḛ́dḛ́g ləm tɔ.
25 Tɔgərɔ ya, néje gə́ beedéje
Gə baigo̰je gə lámje gə ma̰daŋje
Gə́ to bao-rɔje ləm tuji mee ləbje gə́ kédé lé
M’a tel ne kar sí gogo.
26 Seḭ a sɔje né kaareeje as sí nag-nag ləm,
Seḭ a kulaje ne rɔnduba dɔ ri Njesigənea̰ Ala’g lə sí ləm tɔ
Mbata néje gə́ dum koo gə́ yeḛ ra ar sí,
Bèe ɓa rɔkul a dəb dɔ dəwje’g ləm nda̰ el ŋga.
27 Togə́bè ɓa seḭ a gərje gao
To gə́ ma m’isi mbuna Israɛlje’g ya,
Ma m’to Ala lə sí gə́ Njesigənea̰,
Ɓó yeḛ gə́ raŋg godo,
Bèe ɓa rɔkul a dəb dɔ dəwje’g ləm nda̰ el ŋga.
© Ngambai Bible © Alliance Biblique du Tchad 1989, 2015.
