Kwəi lə Sawul deḛ gə ŋganeeje
1 Pilistije d’ɔr rɔ d’aw rɔ gə Israɛlje ndá Israɛlje d’aḭ no̰ Pilistije’g ndá njé gə́ na̰je bula toso d’wəi dɔ mbal’d gə́ Gilboa. 2 Pilistije tuba Sawul gə ŋganeeje pir-pir ndá deḛ tɔl Jonatan gə Abinadab gə Malki-sua, ŋgalə Sawul lé. 3 Rɔ lé nuŋga kəd-kəd dɔ Sawul’g ar njérɔ-ɓandaŋgje d’uree d’aree iŋga doo gə́ to ɓəl. 4 Yen ŋga Sawul ula njekodo nérɔje ləa pana: Ɔr kiambas ləi ɔsm ne tɔlm nà njépole-magəje d’a ree kula sul dɔm’g.
Nɛ njekodo nérɔje ləa lé mbad kɔḭ mbata ɓəl undá badə gaŋgee. Ndá Sawul ya ɔr kiambas ləa mbad rəa piriŋ oso dɔ’g. 5 Njekodo nérɔje lə Sawul lé oo to gə́ yeḛ wəi mba̰ ndá yeḛ kara mbad rəa piriŋ oso dɔ kiambas’g ləa-yeḛ wəi səa na̰’d tɔ.
6 Togə́bè ɓa Sawul gə ŋganeeje gə́ munda ləm, gə njekodo nérɔje ləa ləma, gə njérɔje ləa lai ləm tɔ lé d’wəi na̰’d mee ndəa’g neelé.
7 Israɛlje gə́ d’aar kel wəl-loo gə́ nee ləm, gə deḛ gə́ d’aar kel Jurdɛ̰’d gə́ nee ləm tɔ lé, loo gə́ d’oo to gə́ Israɛlje d’aḭ ləm, Sawul gə ŋganeeje d’wəi ləm tɔ ndá deḛ d’uba ɓee-booje lə dee d’ya̰ d’aḭ tɔ. Bèe ɓa Pilistije ɓa d’aw d’isi keneŋ tɔ.
8 Bèlè lookàree ndá Pilistije ree mba tɔr néje gə́ to rɔ dee gə́ d’wəi’g lé ndá deḛ d’iŋga nin Sawul gə ŋganeeje gə́ munda gə́ to naŋg dɔ mbal’d gə́ Gilboa lé. 9 Deḛ tuga dɔ Sawul gaŋg ləm, tɔr nérɔje ləa ləm tɔ. Tɔɓəi deḛ d’ar dee d’ila mber ta gə́ maji neelé mee ɓeeko̰’g lə Pilistije lai mee kəi-magəje’g lə dee ləm, gə mbuna dəwje’g lə dee ləm tɔ. 10 Deḛ d’ɔm nérɔje lə Sawul mee kəi-magə Astarte’g ndá deḛ tɔ yée dɔ ndògo-bɔrɔ’g lə Bet-Səan tɔ.
11 Loo gə́ dəwje gə́ Jabɛs gə́ Galaad d’oo ta né gə́ Pilistije ra gə Sawul ndá 12 bao-rɔje lai d’ḭ njaa loondul’g saar loo a gə kàr ndá deḛ d’ɔr yoo Sawul ləm, gə yoo ŋganeeje ləm tɔ dɔ ndògo-bɔrɔ’d gə́ Bet-Səan. Tɔɓəi deḛ tel gə nin dee d’aw ne Jabɛs d’aw roo dee keneŋ tɔ. 13 Deḛ d’odo siŋga dee d’aw dubu dee gel mas’g ɓee gə́ Jabɛs ndá deḛ d’ɔg meḛ dee ɓoo as ndɔ siri.
© Ngambai Bible © Alliance Biblique du Tchad 1989, 2015.
