Kula ra ŋgaka Ləbije gə́ wɔji dɔ dee dɔ dee
1 Njesigənea̰ ula Moyis gə Aaro̰ pana: 2 Turaje ŋgalə Keatje mbuna ŋgalə Ləbije’g, gə goo gel-bɔje lə dee ləm, gə goo njémeekəije lə bɔ deeje-je ləm tɔ, 3 un kudee dɔ deḛ gə́ ra ləb dee rɔ-munda gə́ tar saar teḛ ne ləb deḛ gə́ rɔ-mi’g, deḛ lai gə́ d’askəm ra kula gə́ wɔji dɔ dee dɔ dee mee kəi-kubu-kiŋga-na̰’g. 4 Aa ooje, kulaje gə́ wɔji dɔ ŋgalə Keat gə́ mee kəi-kubu-kiŋga-na̰’g lé ɓa nee: to kulaje gə́ wɔji dɔ loo gə́ to gə kəmee doi lé. 5 Loo gə́ d’a gə kḭ mba kaw ndá Aaro̰ gə ŋganeeje gə́ diŋgam d’a ree kɔr kubu gaŋg mee kəi lé ndá d’a kila kubu neelé dɔ sa̰duk kɔrgoota’g, 6 d’a kila nékɔn dəa gə́ ra gə ndar da gə́ ɓaree dopḭ ləm, d’a lab kubu gə́ ndul piro-piro dɔ’g ləm tɔ, tɔɓəi d’a tula kunda kagje gə́ ka̰ kodo sa̰duk neelé keneŋ tɔ. 7 D’a lab kubu gə́ ndul piro-piro dɔ tabul’d gə́ wɔji dɔ pil muru gə́ to gə kəmee lé ndá d’a kunda kaje gə karmbije gə ŋgo-dɔ-manje gə baije gə́ ka̰ tər ne néje naŋg lé dɔ kubu gə́ lab dɔ’g lé, ndá pil muru a lal dəa el tɔ, 8 d’a lab kubu gə́ kas njir-njir dɔ néje’g neelé ndá d’a ndèm gə nékɔn dəa gə́ ra gə ndar da gə́ ɓaree dopḭ lé, tɔɓəi d’a tula kunda kagje gə́ ka̰ kodo ne tabul neelé keneŋ. 9 D’a kun kubu gə́ ndul piro-piro ndá d’a kilá dɔ kag pərndɔ’g ləm, gə dɔ néje gə́ wɔji dəa gə́ to gə pərndɔje ləa ləm, gə nétɔl pərje ləa ləm, gə nékɔm bu pərje ləa ləma, gə nékɔm ubuje ləa lai ləm tɔ, 10 d’a kundá gə nékulaje ləa lai mee nékɔn dəa gə́ reá gə ndar da gə́ ɓaree dopḭ lé, tɔɓəi d’a kundá dɔ kag kunee’g. 11 D’a kila kubu gə́ ndul piro-piro dɔ loo-tuu-né gə́ ə̰də sululu gə́ ra gə larlɔr tɔɓəi d’a ndèm gə nékɔn dəa gə́ ra gə ndar da gə́ ɓaree dopḭ lé, tɔɓəi d’a tula kunda kagje gə́ ka̰ kodo loo-tuu-né’d gə́ ə̰də sululu keneŋ. 12 D’a kodo nékulaje lai gə́ deḛ ra ne kula mee kəi-kubu-si-Ala’g ndá d’a kɔm dee mee kubu gə́ ndul piro-piro’g, tɔɓəi d’a ndèm dee gə nékɔn dəa gə́ ra gə ndar da gə́ ɓaree dopḭ lé, tɔɓəi d’a kundá dɔ kag kodo dee’g. 13 D’a kɔr bu pər gə́ to loo-nékinjaməs’g lé ndá d’a kila kubu gə́ kas gəḭ dɔ’g, 14 nékulaje lai gə́ deḛ ra ne kula keneŋ lé d’a kunda dee dɔ kubu’g lé togə́bè: jo-pərje ləm, kag-larje gə́ ta dee tɔ ja̰-ja̰ ləm, əbje ləm, baije ləma, gə nékulaje lai gə́ wɔji dɔ loo-nékinjaməs ləm tɔ, tɔɓəi d’a lab nékɔn dəa gə́ ra gə ndar da gə́ ɓaree dopḭ dɔ’g, tɔɓəi d’a tula kunda kagje ka̰ kodo loo-nékinjaməs lé keneŋ tɔ. 15 Loo gə́ Aaro̰ gə ŋganeeje gə́ diŋgam d’a tɔl kula gə́ wɔji dɔ kɔm né lé dɔ loo’d gə́ to gə kəmee doi’g, gə dɔ nékulaje lai gə́ wɔji dɔ kəi-kubu-si-Ala bém tɔ ndá ŋgalə Keatje d’a ree loo gə́ d’a gə kḭ kaw keneŋ lé mba kodo dee, nɛ d’a kɔrɔ rɔ néje gə́ to gə kəmee neelé el nà d’a kwəi. Yee nee ɓa to kula gə́ wɔji dɔ njékodo néje gə́ d’ɔm ji ŋgalə Keatje’g mee kəi-kubu-kiŋga-na̰’g lé. 16 Eləajar, ŋgolə Aaro̰ gə́ to njekinjanéməs lé a kaa dɔ ubu gə́ wɔji dɔ kag pərndɔ lé ləm, gə né gə́ ə̰də sululu gə́ ka̰ su ləm, gə nékar gə́ to nduji gə́ d’ar gə ndɔ dee ndɔ dee ləma, gə ubu gə́ ka̰ kwa dɔ dəw ləm tɔ, yeḛ a kaa dɔ kəi-kubu-si-Ala bura gə néje lai gə́ to keneŋ ləm, gə loo gə́ to gə kəmee gə nékulaje ləa ləm tɔ.
17 Njesigənea̰ ula Moyis gə Aaro̰ pana: 18 Undaje kəmkàr dɔ rɔ sí’g mba kar ginkojije lə gel-bɔje lə Keatje lé d’a kɔr dee mbuna Ləbije’g el. 19 Loo gə́ d’a gə tibi mbɔr loo gə́ to gə kəmee doi lé néje gə́ seḭ a raje mbata lə dee mba kar dee d’isi ne kəmba ɓó kar dee d’wəi el lé ɓa nee: Aaro̰ gə ŋganeeje gə́ diŋgam d’a ree mba kunda nana kara loo kula’g ləa gə́ wɔji dəa-dəa ləm, gə d’a tɔjee nékodo ləa-ləa ləm tɔ. 20 Bèe ɓa Keatje d’a kandə kaw keneŋ gə mba koo néje gə́ to keneŋ lé el nà d’a kwəi.
Kula ra Gerso̰je
21 Njesigənea̰ ula Moyis pana: 22 Tura ŋgalə Gerso̰je tɔ, gə goo kəije lə bɔ deeje-je ləm, gə goo gel-bɔje lə dee ləm tɔ, 23 i a tura bula lə diŋgamje lai gə́ ra ləb rɔ-munda gə́ tar saar teḛ ne ləb rɔ-mi’g, deḛ lai gə́ d’askəm ra kula gə́ wɔji dɔ dee dɔ dee mee kəi-kubu-kiŋga-na̰’g. 24 Aa oo, kulaje gə́ wɔji dɔ gel-bɔje lə Gerso̰je ləm, kula gə́ kəm kar dee ra ləma, gə néje gə́ kəm kar dee d’odo ləm tɔ ɓa to nee. 25 Deḛ d’a kodo pal-kubuje lə kəi-kubu lé gə kəi-kubu-kiŋga-na̰ lé ləm, gə nékɔn dəa gə́ ra gə ndar da gə́ ɓaree dopḭ gə́ d’ila dɔ’g ləma, gə kubu gə́ tɔ tarəw kəi-kubu-kiŋga-na̰’g ləm tɔ, 26 gə pal-kubuje gə́ d’ila gə́ ndògo gə kubu gə́ tɔ tarəwkɔg’d ləm, gə loo gə́ gugu dɔ kəi-kubu lé gə loo-nékinjaməs ləma, gə kulaje lə dee gə nékulaje lai gə́ wɔji dɔ dee ləm tɔ. Deḛ ɓa d’a ra kulaje gə́ wɔji dəa ya. 27 Ŋgalə Gerso̰je lé kula gə́ wɔji dɔ dee dɔ dee lé d’a ra gel ndukun’g lə Aaro̰ gə ŋganeeje gə́ diŋgam mbata lə néje lai gə́ d’a kodo ləm, gə kulaje lai gə́ kəm kar dee ra ləm tɔ, néje lai gə́ kəm kar dee d’odo lé seḭ a kɔmje ji dee’g mba kar dee d’aa dəa kər-kər ya. 28 Yee nee ɓa to kulaje gə́ wɔji dɔ gel-bɔje lə ŋgalə Gerso̰je gə́ mee kəi-kubu-kiŋga-na̰’g ləm, gə néje gə́ kəm kar dee d’aa dəa ləm tɔ, gə́ Itamar, ŋgolə Aaro̰ gə́ to njekinjanéməs a tɔji dee loo rəa lé.
Kula ra Merarije
29 I a tura ŋgalə Merarije, gə goo gel-bɔje lə dee ləm, gə goo njémeekəije lə bɔ deeje-je ləm tɔ, 30 i a tura diŋgamje lai gə́ ləb dee aḭ rɔ-munda gə́ tar saar teḛ ne dɔ deḛ gə́ ləb dee rɔ-mi’g, deḛ lai gə́ d’askəm ra kula gə́ wɔji dɔ dee dɔ dee mee kəi-kubu-kiŋga-na̰’g lé. 31 Aa ooje, néje gə́ kəm kar dee d’aa dəa kər-kər ləm, gə kulaje gə́ wɔji dɔ dee gə mba kar dee ra mee-kəi-kubu-kiŋga-na̰’g ɓa nee: kodo kagje gə́ wɔji dɔ loo gə́ to gə kəmee doi lé, kunda kagje ləm gajeeje ləma, gə ŋgan-méeje ləm tɔ, 32 gaji kagje gə́ gugu dɔ gad ndògo ləm, gə bəgərə gel deeje ləm, gə bia̰je gə́ ka̰ ɓər naŋg ləm, gə kulaje gə́ wɔji dɔ dee ləm, gə kagje gə́ tɔl dee ləm, gə kulaje lə dee ləm, gə néra kulaje lai gə́ wɔji dɔ deḛ gə́ d’a ra ne kula ləm tɔ. Néje lai gə́ kəm kar dee d’aa dəa kər-kər lé, seḭ a tɔjije nana kara néje gə́ wɔji dəa-dəa kar deeje d’oo ya. 33 Yee nee ɓa to kulaje gə́ wɔji dɔ ŋgalə Merarije ya, to kulaje lai gə́ wɔji dɔ dee dɔ dee mee kəi-kubu-kiŋga-na̰’d gə́ Itamar, ŋgolə njekinjanéməs Aaro̰ a tɔji dee loo rəa lé ya.
Kula ra Keatje
34 Moyis gə Aaro̰ gə njékɔrno̰ koso-dəwje lé tura bula lə ŋgalə Keatje, gə goo gel-bɔje lə dee ləm, gə goo kəi lə bɔ deeje-je ləm tɔ, 35 un kudee dɔ deḛ gə́ ra ləb rɔ-munda’g saar teḛ ne dɔ deḛ gə́ ləb dee rɔ-mi’g, deḛ lai gə́ d’askəm ra kula gə́ wɔji dɔ dee mee kəi-kubu-kiŋga-na̰’g lé.
36 Deḛ lai gə́ tura dee gə goo gel-bɔje lə dee lé d’aḭ tɔl-dɔg-loo joo gə dɔ dee tɔl-siri gə rɔ-mi (2.750). 37 Yee ɓa to kula lə gel-bɔje lə Keatje lai gə́ d’askəm ra kula mee kəi-kubu-kiŋga-na̰’d gə́ deḛ tura dee lé. Moyis gə Aaro̰ tura bula lə dee gə goo ndukun lə Njesigənea̰ gə́ un ar Moyis lé tɔ. 38 Ŋgalə Gerso̰ gə́ deḛ tura dee gə goo gel-bɔje lə dee ləm, gə goo njémeekəije lə bɔ deeje-je ləm tɔ lé 39 un kudee dɔ deḛ gə́ ra ləb rɔ-munda’g saar teḛ ne dɔ deḛ gə́ ra ləb rɔ-mi’g lé, to deḛ lai gə́ d’askəm ra kula gə́ wɔji dɔ dee dɔ dee mee kəi-kubu-kiŋga-na̰’g lé ya.
40 Deḛ gə́ tura dee gə goo gel-bɔje lə dee ləm, gə goo njémeekəije lə bɔ deeje-je ləm tɔ lé d’aḭ tɔl-dɔg-loo joo gə dɔ dee tɔl-misa̰ gə dəa rɔ-munda (2.630). 41 Deḛ ɓa to gel-bɔje lə ŋgalə Gerso̰ gə́ deḛ tura dee lé, to deḛ lai gə́ d’askəm ra kula gə́ wɔji dɔ dee dɔ dee mee kəi-kubu-kiŋga-na̰’g lé. Moyis gə Aaro̰ tura bula lə dee gə goo ndukun lə Njesigənea̰ ya.
42 Ŋgaka Merarije gə́ deḛ tura dee gə goo gel-bɔje lə dee ləm, gə goo njémeekəije lə bɔ deeje ləm tɔ lé 43 un kudee dɔ deḛ gə́ ra ləb rɔ-munda’g saar teḛ ne dɔ deḛ gə́ ra ləb rɔ-mi’g, deḛ lai gə́ d’askəm ra kula gə́ wɔji dɔ dee dɔ dee mee kəi-kubu-kiŋga-na̰’g lé, 44 deḛ gə́ tura bula lə dee, gə goo gel-bɔje lə dee lə dee lé d’aḭ tɔl-dɔg-loo munda gə dɔ dee tɔl-joo (3.200). 45 Deḛ ɓa to gel-bɔje lə ŋgalə Merari gə́ Moyis gə Aaro̰ tura bula lə dee gə goo ndukun gə́ Njesigənea̰ un ar Moyis lé tɔ.
46 Bula lə ŋgaka Ləbije lai gə́ Moyis gə Aaro̰ gə njékɔrno̰ Israɛlje tura dee gə goo gel-bɔje lə dee ləm, gə goo njémeekəije lə bɔ deeje-je ləm tɔ lé, 47 un kudee dɔ deḛ gə́ ra ləb rɔ-munda’g saar teḛ ne dɔ deḛ gə́ ra ləb rɔ-mi’g, deḛ lai gə́ d’askəm ra kula gə́ wɔji dɔ dee dɔ dee mee kəi-kubu-kiŋga-na̰’g, 48 deḛ lai gə́ deḛ tura bula lə dee lé d’aḭ tɔl-dɔg-loo jinaijoo gə dɔ dee tɔl-mi gə rɔ-jinaijoo (8.580).
49 Deḛ tura bula lə dee gə goo ndukun gə́ Njesigənea̰ un ar Moyis lé ndá nana kara d’aree kula gə́ wɔji dəa-dəa ləm gə néje gə́ yeḛ a kodo ləm tɔ, to gə́ Njesigənea̰ un ne ndia ar Moyis lé ya.
© Ngambai Bible © Alliance Biblique du Tchad 1989, 2015.
